Daniel 8

खाडू ओर बाकरे रा दर्शण

1 बेबीलोनो रे बेलशस्सर राजे रे राजो रे तीजे साले तेस पईले दर्शणो ते बाद एक ओर गल्ल मां दानिय्येलो खे दर्शणो रे जरीये बताई। 2 जेबे आऊँ एलाम नाओं रे राज रे, शूशन शईरो रे राजगढ़ो दे रऊँ था, तेबे मैं दर्शणो रे देखेया कि आऊँ ऊलै नदिया रे कनारे ए। 3 तेबे मैं नजर दित्ती ओर देखेया कि तेसा नदिया सामणे दो सींग वाल़ा खाडू खड़ी रा, तेसरे एक सींग दूजे ते लाम्बा था, जेबे कि से दूजे ते बाद जम्मेया था। 4 मैं से खाडू देखेया कि से पच्छम, उत्तर ओर दक्खणा रिया तरफा खे नठेया। तिने आपणे सींग बाई की सबी डांगरा खे दूर ताका देणे लगेया। कोई बी डांगर तेसखे रोकी नि सकेया। कोई बी डांगर तेसरिया तागती ते ओरी खे बचाई नि सकेया। तिने जो करना चाएया से ई कित्तेया। तिने आपणी शक्तिया रा बखाण कित्तेया, आथो ते कोई केसी खे बचायी सकोआ ओर से आपणी इच्छा रे मुताबिक काम करी की कमण्डी ऊईगा। 5 आऊँ सोचणे ई लगी रा था कि मैं देखेया एक बाकरा पच्छमा रिया दिशा रे निकल़ी की सारी तरतिया पाँदे एड़ा फिरेया कि चलदे बखते जमीना दे पैर नि छवांया ओर तेस बाकरे रिया आखी बीचे एक देखणे जोगा सींग था। 6 तेबे से बाकरा तेस दो सींग वाल़े खाडूए गे जाई की, जो मैं नदिया सामणे खड़ेया दा देखेया था, तेस पाँदे गुस्सा करी की तेसरिया तरफा खे पूरे जोरे की दौड़ेया। 7 मैं देखेया कि से खाडूए रे नेड़े आई की तेस पाँदे रोषे ऊआ। तेबे तिने खाडूए पाँदे अमला कित्तेया ओर तेसरे दोनो सींग तोड़ी ते ओर तेसरा सामणा करने खे खाडूए दे कोई जोर नि रया, तेबे बाकरे से जमीना दे पटकी की माँडी ता ओर खाडूए खे तेसरे आथो ते छुड़ाणे वाल़ा कोई नि मिलेया। 8 तेबे बाकरा बऊत बडयाईया करने लगेया ओर जेबे तागतबर ऊआ, पर तेसरा बड़ा सींग टूटी गा ओर तेस जेड़े देखणे जोगे चार सींग निकल़ी की चारो दिशा रिया तरफा खे बढ़ने लगे। 9 तेबे तिना बड़ेया सींगा बीचा ते एक ओर छोटा जा सींग निकल़ेया, जो बऊत बड़ा ऊईगा, ओर पईले दक्खणा रिया तरफा खे, फेर पूर्ब दिशा रिया तरफा खे, ओर फेर सुन्दर इस्राएलो रिया तरफा खे बढ़ने लगेया। 10 तेसरे सिंगा री सामर्थ इतणी बड़ी गी कि से स्वर्गो री सेना तक पऊँची गा। स्वर्गो री सेना पाँदे ओर सर्गो रे तारेया पाँदे हमला कित्तेया। तिने तिना बीचा ते कुछ जमीना पाँदे सेटी ते ओर तिना पाँदे पैर राखी की करी केसी ते। 11 एथो तक कि तिने स्वर्गो री सेना रे परदानो खे बी ललकारेया, ओर तेसरा रोजका होमबलि बन्द करी ता ओर परमेशरो रे मन्दरो री पवित्र जगा अशुद्ध करिती। 12 स्वर्गो री सेना खे तेते बिद्रोह रा ज्वाब देणे खे रोकी ता। इजी री खातर बलि करना रोकी ता, ओर सच्चाई माट्टिया दे मलायी ती। तिने सींगे जो कुछ बी कित्तेया तिदे से सफल ऊईगा। 13 फेर मैं दो स्वर्गदूता खे आपू बीचे गल्ला करदे ऊए सुणेया। एकी पवित्र स्वर्गदूते दूजे ते पूछेया, "एते दर्शणो दे जो कुछ बी ऊआ, से कदुए तक ऊँदा रणा? ये बुरा जन्तु कदुए तक रोजके बलिदान चढ़ाणे ते रोकदा रणा? ये कदुए तक परमेशरो रे खलाफ खड़ा रणा ओर तेसरे मन्दरो खे ओर तेसरी सेना खे दबांदा रणा?"*8:13 प्रका. 11:2 14 दूजे स्वर्गदूते माखे ज्वाब दित्तेया, "जदुओ तक साँज ओर प्याग 2,300 बार नि ओ, तदुओ तक से ऊँदा रणा, तेते ते बाद परमेशरो रा पवित्र मन्दर शुद्ध ऊई जाणा।"

जिब्राएल स्वर्गदूतो रे जरीये दर्शणो रा मतलब बताणा

15 ये गल्ल दर्शणो रे देखी की, आऊँ दानिय्येल, इजी खे समजणे री कोशिश करने लगेया, तेबुई मां सामणे आई की कोई खड़ा ऊईगा। से मर्दो जेड़ा लगो था। 16 तेबे माखे ऊलै नदिया बीचा ते एक माणूंए री आवाज सुणी, जो आका पायी की बोलो था, "ओ जिब्राएल, तेस माणूंए खे तेसरी देखी रिया गल्ला समजयाई दे।" 17 तेबे जेती आऊँ खड़ी रा था, तेती जिब्राईल मां नेड़े आया ओर तेसरे आऊँदे ई आऊँ कबराईगा ओर मुंए रे पारे थाले पड़ीगा। तेबे तिने माखे बोलेया, "ओ माणूंए री ल्वाद, तिना देखी रिया गल्ला खे समजी लो, कऊँकि ये दर्शण अन्तो रे दिना रे बारे रे ए।"*8:17 दानि. 9:21 18 जेबे से मां साथे गल्ला करने लगी रा था, तेबे आऊँ आपणा मूँ जमीना रिया तरफा खे करी की पारी नींजा दे पड़ी रा था, पर तिने आऊँ छूँयां ओर आऊँ मेरे पैरा पाँदे खड़ा करी ता। 19 तेबे तिने बोलेया, "परमेशरो रा रोष पड़काणे रे अन्तो रे दिना दे जो कुछ ऊणा, से आऊँ ताखे बताऊँआ, कऊँकि अन्तो रे ठराए रे बखतो रे से सब पूरा ऊई जाणा। 20 जो दो सींग वाल़ा खाडू तैं देखेया, तिना दूई सींगा रा मतलब मादी ओर फारस दो राजा ए। 21 ओर से बाल़ो वाल़ा बाकरा यूनान रा राज ए ओर तेसरी आखी बीचे जो बड़ा सींग निकल़ेया, से पईला राजा ए। 22 ओर से सींग जो टूटी गा ओर तेसरी जगा पाँदे जो चार सींग निकल़े, इजी रा मतलब ए कि तेसा जातिया ते चार राज ऊणे, पर तिना री सामर्थ तेस पईलके जेड़ी नि ऊणी। 23 जेबे तिना राजेया रा राज खत्म ऊणे वाल़ा ऊणा, तेबे लोक पूरी तरआ ते दुष्ट ऊई जाणे। फेर एक कमण्डी ओर क्रूर राजा उठणा। तेस लोका खे तोखा देणा। 24 तेसरी सामर्थ जादा ऊणी, पर से तेस पईलके राजे जेड़ा नि ऊणा ओर ना तेस अद्भुत तरअ ते लोक नाश करने ओर सामर्थी परदान ओर परमेशरो रे पवित्र लोका रा समाज नाश करना। 25 तेस सफल ऊणे खे चूठ बोलणा। तेस सोचणा कि आऊँ सबी ते जादा जरूरी आ। जेबे लोका आपू खे बचेया दा समजणा, तेबे तेस तिना बीचा ते कई नाश करी देणे। से सबी ते महान परदाना*8:25 महान परदाना परमेशर, सबी ते बड़ा परदान रे खलाफ खड़ा ऊणा। तेबे परमेशरो से नाश करी देणा। पर से लोका नि काणा। 26 2,300 साँज ओर प्यागा रे बारे दे जो कुछ तैं देखेया ओर सुणेया से सच्च ए, पर जो कुछ तैं दर्शणो रे देखी राखेया तिजी खे बन्द राख, कऊँकि से कईया साला बाद फलणे।" 27 तेते ते बाद आऊँ दानिय्येल कमजोर पड़ीगा ओर कुछ दिन तक बमार रया, तेबे आऊँ उठी की राजे रा काम काज फेर करने लगेया, पर जो कुछ मैं देखेया था तिजी ते आऊँ हैरान रया, कऊँकि तिजी खे समजयाणे वाल़ा कोई नि था।