इब्रानियों 12

5 पर तुसे तिना इम्मती उपदेशा खे पूली चूकी रे जो परमेशरे तुसा खे पाऊ मानी कि देई राखे थे,

"ओ मेरे पाऊ, प्रभुए री ताड़ना खे अल़की गल्ल नि जाण

और जेबे से ताखे थिड़को, तो ईम्मत नि छाड।

6 कऊँकि प्रभु जेसखे प्यार करोआ, तेसखे डांटो बी आ

और जेसखे आपणा पाऊ बणाई लओआ, तेसखे सजा बी देओआ।"

7 तुसे दु:खो खे पिते री डांट समजी की सयी लो। परमेशर तुसा खे पाऊ समजी की तुसा साथे बर्ताओ करोआ। से कुण जा पाऊ ए जेसरी ताड़ना पिता नि करदा? 8 से ताड़ना जो सबी खे मिलोई, जे तेसखे नि मिली री ओ, तो तुसे परमेशरो रे असली पाऊ निए। 9 तेबे जबकि म्हारे शारीरिक पिता बी म्हारी ताड़ना करो था और आसे तिना री इज्जत कित्ती। ये आसा खे ओर बी जरूरी ए कि जेबे आसा रा आत्मिक पिता आसा खे ताड़ना देओ तो आसे ओर बी बढ़ी की तिना रे वशो रे रईए ताकि आसा खे अनन्तकालो री जिन्दगी मिलो।

10 आसा रा संसारिक पिता तो आपणी-आपणी समजा रे मुताबिक थोड़े दिना तक आसा री ताड़ना करो थे। पर परमेशर आसा री पलाईया खे ताड़ना करोआ ताकि आसे बी तेसरी पवित्रता रे इस्सेदार ऊई जाईए। 11 जेस बखते ताड़ना देई जाओई तेस बखते ताड़ना खरी नि लगदी बल्कि से दुःख देणे वाल़ी लगोई। पर जो ताड़ना रे जरिए शिक्षा पाओए बादो ते तिना खे चैनी साथे धार्मिकता रा फल मिलोआ।