1 परमेशरो रे रामो री जगा रे आऊणे रा वादा एबुए तक ए। तो आसे चौकस रईए कि तुसा बीचा ते कोई बी लोक नकम्मे नि ठईरो कि तिजी रे जाणे ते वंचित रई जाओ। 2 कऊँकि आसा खे बी इस्राएली लोका जेड़ा सुसमाचार सुणाया। पर तिना लोका खे सुणे रे वचनो ते कुछ फाईदा नि ऊआ, कऊँकि तिने लोके वचन विश्वासो साथे नि मानेया। 3 इजी खे आसे जिने परमेशरो रे वचना पाँदे विश्वास कित्तेया, तेस रामो रे प्रवेश करना, जेड़ा कि ओरी खे परमेशरे बोलेया,

"मैं आपणे रोषो रे कसम खाई कि

‘सेयो मेरे रामो री जगा रे आई नि सकदे।’ "

हालाँकि दुनिया री शुरूआता रे बखते तेसरे काम ऊई चुके थे। 4 कऊँकि सातुए दिनो रे बारे रे तिने केथी एड़ा बोली राखेया, "परमेशरे सातुए दिने आपणे सारे काम नपटयाई की राम कित्तेया।" 5 आसे ये बी पढ़ेया कि तिने बादो ते ये बी बोलोआ, "सेयो मेरे रामो री जगा रे आई नि सकदे।"

6 ये पक्का ए कि कुछ लोका खे रामो री जगा रे आऊणे री एबे बी खुली आजादी ए और जिना खे तेसरा सुसमाचार पईले सुणाया था, सेयो आज्ञा ना मानणे री बजअ ते तिदे नि जाई सके। 7 तेबेई तो से कोई खास दिन ठराई की इतणे दिन बाद दाऊदो री कताबा रे तिजी खे आजका दिन बोलोआ, जेड़ा पईले बोलेया,

"जे आज तुसे तेसरा शब्द सुणो,

तो आपणे मनो खे जठर नि करो।"

8 जे यहोशू इस्राएलिया खे परमेशरो रे वादे रे मुताबिक रामो री जगा रे प्रवेश कराई लंदा तो तिजी ते बाद दूजे दिनो री चर्चा नि ऊँदी। 9 इजी री खातर जाणी लो कि परमेशरो रे लोका खे एबे बी सातुए दिनो रा राम बाकि ए। 10 कऊँकि जिने तेसरे रामो रे प्रवेश करी राखेया तिने बी परमेशरो जेड़े आपणे काम पूरे करी की राम करी राखेया। 11 इजी री खातर आसे तेस रामो री जगा रे आऊणे री कोशिश करिए, एड़ा नि ओ कि कोई जणा तिना जेड़ी आज्ञा ना मानी की रूड़ी जाओ।

12 कऊँकि परमेशरो रा वचन जिऊँदा और प्रबल ए, से केसी दोधारी तलवारी ते बी बऊत पईना ए। से आत्मा और प्राण, गाठ-गाठ और गूद्दे-गूद्दे खे लग करी की वार-पार छेदोआ। से मनो री इच्छा और सोचा खे परखोआ। 13 और दुनिया री कोई बी चीज परमेशरो ते छिपी री निए। तेसरी आखी सामणे सब चीजा खुलिया और प्रकट ए। तेसखे ई आसा लेखा देणा पड़ना।

14 तेबे जेबे आसा रा इतणा बड़ा प्रदान पुरोईत ए, जो स्वर्गो रिये ऊई की गया, मतलब परमेशरो रा पुत्र प्रभु यीशु; तो आओ आसे आपणे विश्वासो रे अंगीकारो खे मजबूतिया साथे पकड़ी की राखूँए। 15 कऊँकि आसा रा प्रदान पुरोईत एड़ा निए, जो म्हारी कमजोरिया रे आसा साथे दु:खी नि ऊई सको, बल्कि से सबी गल्ला रे आसा जेड़ा परखेया, तेबे बी पापी नि निकल़ेया। 16 इजी री खातर आओ, आसे ईम्मत बानी की परमेशरो रे नेड़े चलूँए, जो कृपा ते परी रा। तेबे परमेशरो आसा पाँदे दया और कृपा दखाणी और जो जरूरता रे बखते म्हारी मताद करो।