योएल 2

यहोवे रा दिन जो आऊणे वाल़ा ए

1 सिय्योनो रे पाह्ड़ा दे रड़सिंगे बजाओ, परमेशरो रे पवित्र पाह्ड़ो पाँदे साआ बानी की बजाओ! देशो रे सब रणे वाल़े डरी गे, कऊँकि यहोवे रा दिन आओआ, बल्कि से नेड़े ए। 2 से दिन दु:खो वाल़ा ओर घोर न्हेरे वाल़ा ऊणा। काल़े बादल़ छाए दे रणे। एक बड़ी सेना आऊणे लगी री। ये प्यागा रे प्रयासे जेड़ी पाह्ड़ो दे दिशणी। एड़ी महान सेना पईले कदी पनि आई री। ओर ये आऊणे वाल़े साला दे फेर कदी नि आऊणी। 3 आगी जेड़े तिना आपणियां बाटा दे आऊणे वाल़ी हर चीज फूकी देणी। तिना रे पीछे एड़ा लगोआ मानो आगी रिये लूपिये जमीन फूकी ती ए। तिना रे आगे जो जमीन ए से अदनो रे बगीचे जेड़ी ए। तिना रे पीछे एक सूका ओर खाली रेगिस्तान ए। तिना ते कुछ नि बचदा।

4 टिड्डिया रे सिर एड़े दिशणे लगी रे थे, मानो कोड़े आऊणे लगी रे। लड़ाईया रे कोड़ेया जेड़े टिड्डिया चूण्डो दे दौड़ने लगी रिया ए। 5 सेयो पाह्ड़ो री चूँडिया पाँदे उटकदे ऊए रथा री जी छेड़ करोईया। सेयो सूके काओ रे आगी दे जल़ने जेड़ी चटचट करोईया। सेयो एक तागतबर सेना जेड़िया ए, जो लड़ाईया खे त्यार रओई। 6 तेसा सेना रे सामणे सब लोक दु:खी ओए, सबी रे मूँ डरो रे मारे पिऊँल़े पड़ी जाओए। 7 सिपाईया जेड़े सेयो अमला करोए, सिपाईया जेड़े सेयो दवाला पाँदे चढ़ोए। हर टिड्डिया रे चूण्ड सेना जेड़े आपणियां बाटा रिये जाओए; सेयो आपणी बाट नि बदलदे। 8 सेयो एकी-दूजे खे ताक्का नि देंदे, सेयो तिना सबी चीजा पाँदे अमला करोए जो तिना खे रोकणे री कोशिश करोए। पर तेबे बी सेयो आपणियां पाल़िया देई रओए। 9 सेयो शईरो दे ओरे-पोरे दौड़ोए ओर दवाला पाँदे चढ़ोए, सेयो कअरो दे एड़े कूसोए, जिंयाँ चोर द्वारिया ते कूसोए। 10 तिना ते आगे तरती ईलोई ओर सर्ग थरथराओआ। सूरज ओर चाँदो रा प्रयासा चली जाणा ओर तारे नि चमकदे। 11 यहोवा आपणे तेस दलो ते आगे आपणी आवाज सुणाओआ, कऊँकि तेसरी सेना बऊत ई बड़ी ओर तागतबर ए, जो तेसरा कईणा मानोई, कऊँकि यहोवे रा दिन बड़ा ओर बऊत खतरनाक ए, तीजी खे सयीन करना नामुमकिन ए।

परमेशरो रिया तरफा खे आओ

12 तेबे बी, यहोवे री ये बाणी ए, "यबु बी सुणो, बअरतो साथे रोंदे-पीटदे ओर करलांदे आपणे पूरे पापा ते मन फिरी की मांगे आओ। 13 आपणा दु:ख बताणे खे तुसे आपणे टाल्ले फाड़ना बन्द करो। इजी ते कोई फाईदा नि ऊणा। इजी रे बजाए माखे दखाओ कि तुसे सच्चो मनो ते पछताणे लगी रे। आपणे परमेशर यहोवे रिया तरफा खे फिरो, कऊँकि से अनुग्रह करने वाल़ा, दयालु, गुस्सा करने रे देरी करने वाल़ा, करूणा करने वाल़ा ओर दु:ख देई की आपणा मन बदल़ने वाल़ा ए। 14 क्या पता से तुसा पाँदे तरस खाओ ओर जो सजा से तुसा खे देणा चाओ था तीजी रे बदले से तुसा खे एड़ी आशीष देयो जेते कि तुसे आपणे परमेशर यहोवे खे नज्जो री बलि ओर अर्घ चढ़ाई सको।" 15 सिय्योनो दे रड़सिंगे बजाओ, पवित्र बअरतो रा दिन ठराओ, बड़ी सभा रा प्रचार करो। 16 पक्का करो की लोक रीति रवाजा रे मुताबिक पवित्र ए, तिना खे कट्ठा करो। बुजुर्गा खे बुलाई लो, बच्चे ओर दूद पीणे वाल़े बच्चेया खे बी कट्ठे करो। नवें ब्या कित्ते रे लाड़ा लाड़ी बी आपणे कमरे ते निकल़ी की आओ। 17 पुरोईत जो यहोवे री सेवा करने वाल़े ए, सेयो आँगण ओर बेदिया बीचे रोई-रोई की ये प्रार्थना करो, "ओ यहोवा, आपणी प्रजा खे बचा ओर आपणे इस्से री बेज्जती नि ऊणे दे, ना दूजी जातिया तिजी रा उदारण देई सको। जातिया-जातिया रे लोका आपू बीचे ये बोलणा कि तिना रा परमेशर केई ए?"

परमेशर आपणे लोका री प्रार्थना रा ज्वाब देओआ

18 तेबे यहोवे खे आपणे देशो रिया तँईं फिकर ऊणे लगेया, तिने आपणे लोका पाँदे दया कित्ती। 19 यहोवे आपणी प्रजा रे लोका खे ज्वाब दित्तेया, "सुणो, आऊँ तुसा खे नज्ज, ताजा शराब ओर जैतूनो रा तेल पेजणे लगी रा। ओर जेबे से तुसा खे मिलणा तेबे तुसे रज्जी जाणे ओर मां आजो ते बाद दूजी जातिया ते तुसा री बेज्जती नि ऊणे देणी। 20 टिड्डिया रा एक ओर चूण्ड उत्तरा रिया तरफा ते तुसा पाँदे अमला करने खे आऊणा, पर मां सेयो यरूशलेमो ते आगे रेगिस्तानो दे जाणे खे मजबूर करी देणा। कुछ पूर्वा रिया तरफा खे मृत सागरो दे चली जाणे ओर कुछ पच्छमा दे बड़े समुद्रो दे चली जाणे। तेती सेयो सब मरी जाणे, ओर तिना रे शरीरो ते बास आऊणी।" 21 ओ देश, तूँ नि डर, तूँ मगन ओ ओर खुशी मना, कऊँकि यहोवे बड़े-बड़े काम करी राखे। 22 उजाड़ जगा रे जानवरो डरो नि। रेगिस्तानो दे काओ रिया काईणी फेर अरिया ऊणे लगी रिया। डाल़ आपणे फल़ देणे लगी रे। अंगूरा री बेला दे ओर दाऊगल़े रे डाल़ा दे फल़ लगणे लगी रे। 23 ओ सिय्योन पाह्ड़ो रे लोको खुश रओ, तुसे आपणे परमेशर यहोवे रिया बजा ते खुशी मनाओ, फेर मैं तुसा रिया तँईं पारी बर्खा करी राखी ए। पईले जेड़े ई मैं बरसाती री बर्खा ओर बसंत ऋतुआ री बर्खा करी राखी ए। 24 तुसा रे खल्याण नज्जो साथे परी जाणे ओर रसकुण्ड नवें शराबो साथे ओर जैतूनो रे तेलो साथे परी जाणे।

25 यहोवे बोलेया, "मां तुसा खे तिना सबी चीजा रा बदला देणा जो कुछ गाजाम*2:25 गाजाम कुतरने वाल़िया नाओं री टिड्डिये, अर्बे*2:25 अर्बे उडणे वाल़ी नाओं री टिड्डिये, येलेक*2:25 येलेक उटकणे वाल़ी नाओं री टिड्डिये ओर हारसील*2:25 हारसील छिलणे वाल़ी टिड्डिये खाई ला था। जो मैं तुसा पाँदे अमला करने खे पेजी राखिया थिया। 26 तुसा पेट परी की खाणा ओर रज्जी जाणे ओर आपणे परमेशर यहोवे रे नाओं री स्तुति करनी, जिने तुसा खे अचम्बे रे काम कित्ते ओर मेरी प्रजा री कदी बी बेज्जत नि ऊणी। 27 तेबे तुसा खे पता लगी जाणा कि आऊँ इस्राएलो लोका बीचे आ। आऊँ तुसा रा परमेशर यहोवा आ। ओर कोई दूजा परमेशर नि ए। इजी री खातर मेरे लोका खे फेर बेज्जत नि ऊणा पड़ना। यहोवे रा दिन आऊणे लगी रा।"

28 तिना गल्ला ते बाद मां सबी प्राणिया पाँदे आपणा आत्मा पेजणा, तुसा रे माठे-बेटिया भविष्यबाणी करनी ओर तुसा रे बुजुर्गा सुफने देखणे ओर तुसा रे जवाना दर्शण देखणे। 29 तिना दिना दे मां आपणा आत्मा आपणे दासा पाँदे पेजणा, से चाए मर्द ओ या जवाणस। 30 मां सर्ग ओर तरतिया दे चमत्कार, मतलब खून ओर आग ओर तुएँ रे खम्बे दखाणे। 31 यहोवे रे तेस खतरनाक ओर बड़े दिनो रे आऊणे ते पईले सूरजो रा प्रयासा चली जाणा ओ चाँद खूनो जेड़ा लाल ऊई जाणा। तेस बड़े ओर डराऊणे दिनो ते पईले जेबे मां, यहोवे, आऊणा ये सब ऊणा। 32 जेस केसी यहोवे ते प्रार्थना करनी से तेस बचाणे। आऊँ वादा करूँआ कि यरूशलेमो दे कुछ लोक बिपदा ते बची जाणे; जो मैं चूणी राखे सेयो बची जाणे।