1 सालो री बरसाती दे बर्खा रिया तँईं यहोवे ते प्रार्थना करो, सेई तूफान पेजोआ। सेई सबी पाँदे बर्खा करोआ। ओर हर एकी डोरूए दे अरयाली ल्याओआ। 2 कऊँकि तिना रे कअरो रिया घिनौनिया मूर्तिया बेकार गल्ला बोलोईया, ओर आत्मा साथे गल्ल करने वाल़े चूठा दर्शण देखोए ओर चूठा सुफना दखाओए ओर बेकार शान्ति देओए। ईंयाँ लोक पेडा जेड़े पटकी गे दे ए, ओर गवाल़े ना ऊणे रिया बजा ते बऊत दु:खी ए।। 3 परमेशर बोलोआ, "मेरा रोष गवाल़ेया पाँदे पड़की रा ओर मां मुखिया खे सजा देणी। यहोवे आपणे चूण्डो री देखपाल़ करनी। सेयो यहूदा रे लोक ए। तेस सेयो लड़ाईया दे तागतबर कोड़ेया जेड़े बणाई देणे। 4 सबी ते खास कूणे रा पात्थर यहूदा रे गोत्रो ते आऊणा। तम्बूए रा खूँडा बी तिजी तेई आऊणा। लड़ाईया दे इस्तेमाल ऊणे वाल़ा धनुष बी तिजी तेई आऊणा। मतलब हर राजा तेसते ई आऊणा। 5 सेयो एड़े वीरो जेड़े ऊणे जो लड़ाईया दे आपणे दुश्मणा खे सड़का दे चीकड़ो जेड़े केसोए, कऊँकि परमेशर तिना साथे रणा, इजी री खातर सेयो कोड़ेया पाँदे सवार आपणे दुश्मणा ते लड़ने ओर सेयो अराई देणे।"

6 मां यहूदा रा कराना मजबूत बनाणा। मां यूसुफो रा गोत्र बचाणा। मां सेयो वापस ल्याऊणे कऊँकि आऊँ तिना ते बऊत प्यार करूँआ। एड़ा लगणा जेड़े मैं सेयो पेजे ई नि थे। आऊँ तिना रा परमेशर यहोवा ए। मां तिना री मताद करनी। 7 एप्रैमी लोक वीरो जेड़े ऊणे ओर तिना रा मन एड़ा खुश ऊणा जेड़ा शराबो ते ओआ। ये देखी की तिना रे बच्चेया खुशी मनाणी ओर तिना रा मन परमेशरो रिया तँईं मगन ऊणा। 8 मां सीटी बजाई तिना खे आऊणे खे बोलणा ओर सेयो कट्ठे करने। कऊँकि आऊँ तिना खे छुड़ाणे वाल़ा ए ओर सेयो एड़े बढ़ने जेड़े पईले बढ़े थे। 9 तेबे बी मां सेयो जाति-जातिया रे लोका बीचे बखेरने, तेबे बी तिना दूर-दूर देशा दे आऊँ याद करना ओर आपणे बाल़का समेत आपणे देशो खे वापस आऊणे। 10 मां सेयो मिस्र देशो ते ओर अश्शूरो ते वापस ल्याऊणे; मां सेयो गिलाद ओर लबानोन इलाके ते वापस ल्याऊणे, ओर यहूदा दे तिना खे रणे खे शायद ई जरूरता जोगी जगा ऊणी। 11 सेयो मुसीबता रे समुद्रो ते ऊई की जाणे। समुद्रो रा तूफान शान्त ऊई जाणा। नील नदिया री सारिया गईरिया जगा सूकी जाणिया। अश्शूरो रा सारा कमण्ड चूर-चूर ऊई जाणा। मिस्रो रा राज करने रा अधिकार खत्म ऊई जाणा। 12 मां आपणी प्रजा तागतबर बनाणी। सेयो मेरिया बजा ते बिना डरो ते रणे, यहोवे री येई बाणी ए।