1 इस्राएलो दे योना नाओं रा एक माणूं रओ था, जो अमित्तै रा पाऊ था। एक दिन यहोवे तेसते बोलेया, 2 "उठी की तेस बड़े शईर नीनवे खे जा ओर तेसरे खलाफ प्रचार कर, कऊँकि तेसरी बुराई मेरी नजरा दे बढ़ी गी री। 3 पर योना उठी की यहोवे ते दूर जाणे खे उल्टिया तरफा खे चलीगा। से याफा री बन्दरगाह पाँदे गया, जेती तेसखे तर्शीश जाणे वाल़ा एक जाह्ज मिलेया। तिने कराया दित्तेया ओर जाह्जो दे चढ़ीगा, ये सोची की कि से तर्शीशो खे जाई की यहोवे ते बची जाणा।" 4 पर यहोवे समुद्रो दे एक प्रचण्ड अवा चलाई ओर समुद्रो दे तूफान इतणा खतरनाक था कि जाह्ज टूटणे रा खतरा था।

5 तेबे मल्लाह डरी की आपणे-आपणे देवते री दुहाई देणे लगे ओर जाह्जो दे जो बपारो रा समान था तिजी खे समुद्रो दे सेटणे लगे, ताकि जाह्ज अल़्का ऊई जाओ। पर योना जाह्जो रे थालले इस्से दे उतरी की सयी गा था ओर गईरी नींजा दे पड़ी रा था। 6 तेबे जाह्जो रा कप्तान तेसरे नेड़े आई की बोलणे लगेया, "तूँ किंयाँ सयी सकेया? उठ, ओर मतादा रिया तँईं आपणे देवते ते प्रार्थना कर! क्या पता से आसा साथे जो ऊणे लगी रा तिजी पाँदे त्यान देयो। तेबे आसे नि मरने।" 7 तेबे तिने आपू-बीचे बोलेया, "आओ, आसे पर्ची पायी की जाणूंए कि ये मुसीबत आसा पाँदे किजी बजा ते पड़ी री।" तेबे तिने पर्ची पायी ओर पर्ची योना रे नाओं पाँदे निकल़ी। 8 तेबे तिने तेसखे बोलेया, "आसा गे बता कि ये मुसीबत आसा पाँदे किजी बजा ते पड़ी री? तेरा काम क्या ए? ओर तूँ केथा ते आई रा? तूँ केस देशो रा ओर कुणजी जातिया राए?"

9 तिने तिना खे बोलेया, "आऊँ इब्री ए ओर आऊँ समुद्र ओर तरतिया खे बनाणे वाल़े स्वर्गो रे परमेशर यहोवे रा पग्त आ।" 10 तेबे सेयो बऊत डरी गे ओर तेसखे बोलणे लगे, "तैं ये क्या करी राखेया?" कऊँकि तिना खे पता लगी गा था कि से परमेशरो रे सामणे ते नठी की आई रा, ओर तिने आपू ई तिना गे बताईता था। 11 तेबे तिने योने ते पूछेया, "आसे तां साथे क्या करुँ जेते कि समुद्र शांत ऊई जाओ?" तेस बखते समुद्रो रिया लईरा बढ़ने ई लगी रिया थिया। 12 योने तिना खे बोलेया, "माखे चकी की समुद्रो दे सेटी देयो, तेबे समुद्र शांत ऊई जाणा, कऊँकि माखे पता ए कि ये पारी तूफान तुसा पाँदे मेरी बजा ते ई आई रा।" 13 पर सेयो एड़ा नि करना चाओ थे। इजी रे बदले, तिने जाह्ज वापस जमीना पाँदे ल्याऊणे री कोशिश कित्ती। पर सेयो एड़ा नि करी सके, कऊँकि तूफान लगातार बढ़ने ई लगी रा था।

14 तेबे तिने परमेशरो खे आका पाई की बोलेया, "ओ परमेशर आसे प्रार्थना करूँए कि एस मर्दो रे प्राणो रे बदले आसे नाश नि ओऊँ ओर ना आसे निर्दोषो री अत्या रे दोषी ठराणे, कऊँकि ओ परमेशर, जो कुछ तेरी इच्छा थी सेई तैं करी राखेया।" 15 तेबे तिने योना चकी की समुद्रो दे सेटी ता ओर समुद्रो रिया खतरनाक लईरा रूकी गिया। 16 तिने लोके देखेया कि क्या ऊआ था। तेबे सेयो यहोवे रा आदर करने लगे। तिने तेसखे बलिदान चढ़ाया। ओर तिने तेसते मान्नता मानियां। 17 पर यहोवे योना खे निगल़ने खे एक बड़ी मच्छली ठराई राखी थी; ओर योना तेसा बड़ी मच्छलिया रे पेटो दे तीन दिन ओर तीन रात पड़ेया दा रया।