1 तेबे योने तेसा मच्छलिया रे पेटो ते आपणे परमेशर यहोवे ते प्रार्थना करी की बोलेया, 2 "मैं मुसीबता रे पड़े दे यहोवे री दुहाई दित्ती ओर तिने मेरी सुणी ली री, अधलोको बीचा ते आऊँ चींगेया ओर तैं मेरी सुणी ली। 3 तैं आऊँ गईरे पाणियो दे सेटिता, ओर आऊँ समुद्रो बीचे पड़ीगा। गईरे पाणिये आऊँ टकी ला। तैं मां पाँदे समुद्रो रिया बड़िया लईरा बईणे दित्तिया।" 4 तेबे मैं बोलेया, "आऊँ तां सामणे ते निकयाल़ी ता दा ए, एबे आऊँ फेर तेरे पवित्र मन्दरो खे नि देखी सकदा।" 5 आऊँ लगभग लईरा दे डुबी गया था। मेरे चऊँ कनारे गईरा पाणी था। मेरे सिरो पाँदे सबाल़ चिपकी गा था।

6 आऊँ पाह्ड़ो री जड़ा तक डूबी गा था। आऊँ जमीना दे कैद था, जेते रे द्वार सदा खे बन्द ऊईगे थे। तेबे बी ओ मेरे परमेशर यहोवा, तैं आऊँ मौता रे मुंए ते छुड़ाया। 7 जेबे आऊँ मरने ई वाल़ा था, तेबे मैं तूँ याद कित्तेया, प्रभु। मेरी प्रार्थना तां तक पऊँची। ये स्वर्गो दे तेरे पवित्र मन्दरो दे तां तँईं खे पऊँची गी। 8 कुछ लोक आपणे देवतेया री बेकार मूर्तिया री पूजा करोए। सेयो आपणे दया करने वाल़े परमेशरो ते दूर ऊई जाओए। 9 पर मां जोरे की तन्यवाद करी की ताखे बलिदान चढ़ाणा, जो मान्नत मैं मानी राखी, से पूरी करनी। पक्का परमेशर ई उद्धार करोआ। 10 तेबे परमेशरे तेसा बड़ी मच्छलिया खे आज्ञा दित्ती ओर तेसे योना सूकी जमीना पाँदे उगल़ी ता।