1 दो दिन बाद फसह रा त्योआर और बिना सजेड़े री रोटिया रा त्योआर ऊणे वाल़ा था। बड़े पुरोईत और शास्त्री एड़ी गल्ला री टोल़ा रे थे कि किंयाँ यीशुए खे तोखे रे मरवाईए। 2 पर बोलो थे, "त्योआरो रे दिने नि, केथी एड़ा नि ओ कि लोका बीचे हुड़दंग मची जाओ।"

3 जेबे यीशु बैतनिय्याह गांव रे शमौन जेसखे पईले कोढ़ था तेसरे कअरे रोटी खाणे बैठे रे थे, तेबे एक जवाणस संगमरमरो रे पांडे (सुराई) रे जटामासिया रा मईंगा और साफ इत्र लई की आई और पांडा तोड़ी की इत्र तिना रे सिरो रे लटी ता। 4 तेबे कोई-कोई गुस्सा करी की बोलणे लगे, "एस इत्रो रा सत्यानाश कऊँ कित्तेया? 5 कऊँकि ये इत्र तो तीन सौ चाँदिए रे सिक्केया* रे मोलो ते जादा पैसेया रा बेची की कंगाल़ा खे बांडी सको थे।" सेयो तेसा खे थिड़कणे लगे। 6 यीशुए बोलेया, "एसा खे छाडी देओ। एसा खे कऊँ सताणे लगी रे? एसे तो मां साथे पलाई ए कित्ती री। 7 कंगाल़ तो तुसा साथे सदा रओए और तुसे जेबे चाओ, तेबे तिना साथे पलाई करी सकोए। पर आऊँ तुसा साथे सदा नि रणा। 8 जो कुछ ये करी सको थी, एसे कित्तेया, एसे मेरे दबाणे री त्यारिया ते पईले ई मेरे शरीरो रे इत्र मल़ीता। 9 आऊँ तुसा खे सच्च बोलूँआ कि सारी दुनिया रे जेती, केथी सुसमाचार प्रचार ऊणा, तेती एसा रे एस कामो री चर्चा, एसा री यादा रे ऊणी।"

10 तेबे यहूदा इस्करियोती, जो बारा चेलेया बीचा ते एक था, बड़े पुरोईतो गे गया, ताकि यीशु तिना रे आथे पकड़वाया जाओ। 11 सेयो ये सुणी की खुश ऊईगे और तेसखे पैसे देणा मंजूर कित्तेया। तेबे से मोका टोल़ने लगेया कि यीशुए खे किंयाँ पकड़वाऊँ।

12 बिना सजेड़े री रोटिया रे त्योआरो रे पईले दिने, जिदे सेयो फसह रे मिन्टूओ रा बलिदान करो थे, तिना रे चेले तिना ते पूछेया, "तुसे केयी चाओए कि आसे तुसा खे फसह रे त्योआरो री रोटी खाणे री त्यारी करुँ?" 13 यीशु आपणे चेलेया बीचा ते दो जणे ये बोली की पेजे, "नगरो रे जाओ और तेती तुसा खे एक माणूं मिलणा, जिने एक पाणिए रा कअड़ा ऊणा चकेया रा, तेस पीछे चली जाणा 14 और से जेते कअरो रे जाओगा, तेस कअरो रे मालको खे बोलणा, ‘गुरू बोलोआ, "मेरा बैठका रा कमरा, जेती आऊँ आपणे चेलेया साथे फसह रे त्योआरो री रोटी खाऊँ, से केयी ए?" ’ 15 तेस तुसा खे एक सजी-सजाई री और त्यार कित्ती री बड़ी बाऊड़ो दखाणी। तेती आसा खे फसह खाणे री त्यारी करो।" 16 तेबे चेले निकल़ी की नगरो खे आए और जेड़ा यीशुए तिना खे बोलेया था, तेड़ा ई पाया और फसह रे त्योआरो री रोटी त्यार कित्ती।

17 जेबे साँज ऊई, तेबे यीशु बारा चेलेया साथे तेती आए। 18 और जेबे सेयो रोटी खाणे लगी रे थे, तेबे यीशुए बोलेया, "आऊँ तुसा खे सच्च लगी रा बोलणे कि तुसा बीचा ते एक ए, जो मां साथे रोटी लगी रा खाणे, तेस आऊँ पकड़वाणा।" 19 चेले उदास ऊईगे और तिना बीचा ते एक-एक तिना खे पूछणे लगेया, "क्या से आऊँ ए?" 20 यीशुए तिना खे बोलेया, "से बारा बीचा ते एक ए, जो मां साथे थाल़िया रे आथ पाओआ। 21 आँऊ माणूं रा पुत्र पक्का ई मारेया जाणा जेड़ा मेरे बारे रे पवित्र शास्त्रो रे लिखी राखेया, पर तेस माणूंए खे हाय, जेस आऊँ पकड़वाणा। तेस माणूंए खे खरा था कि से जमदा ई नि।"

22 जेबे सेयो खाणे ई लगी रे थे, तेबे यीशुए रोटी लयी और आशीष मांगी की तोड़ी और चेलेया खे दित्ती और बोलेया, "लओ और खाओ, ये मेरा शरीर ए।" 23 तेबे तिने कटोरा लयी की धन्यवाद कित्तेया और तिना खे दित्तेया और तिने सबी तिजी ते पिया। 24 यीशुए तिना खे बोलेया, "ये मेरा से खून ए, जो परमेशर और तिना रे लोका बीचे नई वाचा ए, और बऊत जणेया रे पापो री माफिया खे बाह्या जाओआ। 25 आऊँ तुसा खे सच्च बोलूँआ कि मां अँगूरा रा रस तेस दिनो तक फेर कदी नि पीणा, जदुओ तक परमेशरो रे राज्य रे नया नि पीऊँगा।" 26 तेबे सेयो पअजन गायी की बारे जैतूनो रे पाह्ड़ो पाँदे गए।

27 तेबे यीशुए तिना खे बोलेया, "तुसे सब माखे छाडी की चली जाणे, कऊँकि लिखी राखेया, ‘मां रखवाल़ा काई देणा और पेडा ओरे-पोरे ऊई जाणिया।’ 28 पर मां मुड़देया बीचा ते जिऊँदा ऊणे ते बाद, तुसा ते पईले गलीलो खे जाणा।" 29 पतरसे तिना खे बोलेया, "जे तुसा खे छाडी की सब जणे चली बी जाओ, तेबे बी मां तुसा खे छाडी की कदी नि जाणा।" 30 यीशुए तेसखे बोलेया, "आऊँ ताखे सच्च लगी रा बोलणे कि आज ई राती रे मुर्गे री दो बार बांग देणे ते पईले तूँ तीन बार माखे जाणने ते मुकरना।" 31 पर पतरसे ओर बी जोर देई की बोलेया, "जे माखे तुसा साथे मरना बी पड़ो, तो तेबे बी मां तुसा खे ना नि करनी।" ईंयां ई ओरी सबी बी बोलेया।

32 तेबे सेयो गतसमनी नाओं री जगा रे आए और यीशुए आपणे चेलेया खे बोलेया, "जदुओ तक आऊँ प्रार्थना करूँआ, तदुओ तक तुसे एथी बैठे रे रओ।" 33 यीशु पतरस, यूहन्ना और याकूबो खे आपू साथे लईगे और बऊत ई बेचैन और परेशान ऊणे लगे। 34 तेबे यीशुए तिना खे बोलेया, "मेरा जिऊ बऊत उदास ए, एथो तक कि आऊँ मरने पाँदे ए। तुसे एथी रूको और जागदे रओ।" 35 यीशु थोड़े जे आगे गए और जमीना पाँदे पड़ी की प्रार्थना करने लगे कि, "जे ऊई सको तो ये दुःखो री कअड़ी मां पाँदो ते टल़ी जाओ।" 36 और बोलेया, "ओ अब्बा! ओ पिता! तुसा ते सब कुछ ऊई सकोआ, एस दुःखो खे मांगा गे ते टाई दे, पर तेबे बी जेड़ा आऊँ चाऊँआ, तेड़ा नि, पर जो तुसे चाओए सेई ओ।" 37 तेबे यीशु आए और चेले सये रे देखी की पतरसो खे बोलेया, "ओ शमौन तूँ सऊणे लगी रा? क्या तूँ एक कअड़ी पनि जागी सकेया? 38 जागदे और प्रार्थना करदे रओ, ताकि परीक्षा रे नि पड़ो; आत्मा तो त्यार ए, पर शरीर कमजोर ए।" 39 यीशु फेर चली गे और सेई प्रार्थना कित्ती। 40 तेबे दूजी बार आई की सेयो सये रे देखे, कऊँकि तिना री आखी रे नींज थी और सेयो नि जाणो थे कि यीशुए खे क्या ज्वाब देईए। 41 तेबे यीशुए तीजी बार आई की बोलेया, "एबे सऊँदे रओ और राम करदे रओ, बस से कअड़ी आईगी री। देखो, आँऊ माणूं रा पुत्र पापिया रे आथे पकड़वाई जाऊणा। 42 उठो चलो। देखो, माखे पकड़वाणे वाल़ा नेड़े आईगा रा।"

43 सेयो ये बोलणे ई लगी रे थे कि यहूदा, जो बारा चेलेया बीचा ते एक था, से आया। और तेस साथे बड़े पुरोईत, शास्त्री, और बुजुर्गा री तरफा ते एक बड़ी पीड़, तलवार और डण्डे लयी की फटाफट आईगी। 44 तिना खे पकड़वाणे वाल़े तिना खे बताईता था, "जेसखे आऊँ नमस्ते करुँ और गल़े लगूँ, सेई ऊणा और तुसे से पकड़ी की लई जाणा।" 45 तेबे यहूदा यीशुए गे आया और बोलेया, "ओ गुरू!" और तेसखे नमस्ते कित्ती और गल़े लगेया। 46 तेबे तिने सेयो आथ पाई की पकड़ी ले। 47 तिना बीचा ते जो नेड़े खड़ी रे थे, एकी जणे तलवार खिंजी की प्रदान पुरोईतो रे दासो पाँदे चलाई और तेसरा कान ऊड़ाई ता। 48 यीशुए तिना खे बोलेया, "क्या तुसे आऊँ डाकू समजी राखेया, जो माखे पकड़ने री तँईं डण्डे और तलवारी लई की आई रे? 49 आऊँ तो हर दिन तुसा साथे मन्दरो रे उपदेश देऊँ था और तेबे तो तुसे आऊँ नि पकड़ेया। पर ये सब कुछ तेबे ऊआ, ताकि पवित्र शास्त्रो रे मेरे बारे जो गल्ल भविष्यवक्ते लिखी राखी थी, से पूरी ओ।" 50 तेबे तिना रे सारे चेले तिना खे छाडी की नठीगे।

51 तेबे एक जवान आपणे नांगे शरीरो रे चादर टखी की तिना पीछे-पीछे चली गा और लोके से चेला समजी की पकड़ी ता। 52 पर से चादर छाडी की नांगा ई नठी गा।

53 तेबे सेयो यीशुए खे बड़े पुरोईतो रे कअरे लईगे और सब प्रदान पुरोईत, शास्त्री और बुजुर्ग तेसगे कट्ठे ऊईगे। 54 पतरस दूरो तेई तिना पीछे-पीछे प्रदान पुरोईतो रे आँगणो रे पीतरो तक गया और चौकीदारा साथे बैठी की आग सेखणे लगेया। 55 बड़े पुरोईत और सारी बड़ी सभा यीशुए खे काणे री तँईं, तिना रे खलाफ गवाई लगी रे थे टोल़ने, पर मिली नि। 56 कऊँकि बऊत जणे तिना रे खलाफ चूठी गवाई लगी रे थे देणे, पर तिना री गवाई एक जेड़ी नि थी। 57 तेबे बऊत जणेया तिना रे खलाफ ये चूठी गवाई दित्ती कि 58 "आसे ये, ए बोलदे ऊए सुणी राखेया, ‘मां ये आथो साथे बणाया रा मन्दर टाल़ी देणा और तीजे दिने दूजा बणाई देणा, जो आथो साथे नि बणे रा ऊणा।’ " 59 एते पाँदे बी सबी री गवाई एक जेड़ी नि निकल़ी।

60 तेबे प्रदान पुरोईते, बीचे खड़े ऊई की, यीशुए ते पूछेया, "क्या तूँ कोई ज्वाब नि देणा चांदा? यो लोक तेरे बारे रे क्या गवाई लगी रे देणे?" 61 पर यीशु चुप रए और कुछ बी ज्वाब नि दित्तेया। प्रदान पुरोईते तिना ते फेर पूछेया, "क्या तूँ परमधन्य परमेशरो रा पुत्र मसीह ए?" 62 यीशुए बोलेया, "आ, आऊँ आए; और तुसा आँऊ माणूं रा पुत्र सर्वशक्तिमानो रे दाँणे कनारे बैठे रा और सर्गो रे बादल़ो पाँदे आऊँदा ऊआ देखणा।" 63 तेबे प्रदान पुरोईते आपणे टाल्ले फाड़ी की बोलेया, "एबे आसा खे गवाओ रा क्या काम ए? 64 तुसे ये निन्दा सुणी, तुसा री क्या राय ए?" तिने सबी बोलेया, "ये तो काणे जोगा ए।" 65 तेबे कोई तिना पाँदे थूकणे लगे, कोई मूँ टखणे लगे, कोई मुक्के बाणे लगे और तिना ते बोलणे लगे, "भविष्यबाणी कर।" और सिपाई तिना खे पकड़ी की थप्पड़ बाणे लगे।

66 जेबे पतरस आँगणो रे था, तेबे प्रदान पुरोईतो री दासिया बीचा ते एक तेती आई 67 और जेबे पतरस आग सेखणे लगी रा था, तेबे से तेसखे टकटक करी की देखणे लगी और बोलणे लगी, "तूँ बी तो तेस यीशु नासरियो साथे था।" 68 से मुकरी गा, और बोलणे लगेया, "आऊँ तो नि जाणदा और मेरी समजा रे नि आऊँदा कि तूँ क्या लगी री बोलणे।" तेबे से बारे देऊल़िया गे गया और मुर्गे बांग दित्ती। 69 तेबे से दासी फेर तेसखे देखी की, जो तेती नेड़े खड़ी रे थे, तिना गे बोलणे लगी, "ये तो तिना बीचा ते एक ए।" 70 पर से फेर मुकरी गा और थोड़ी देर बाद जो तेती खड़ी रे थे, तिने फेर पतरसो खे बोलेया, "पक्का तूँ तिना बीचा ते एक ए, तूँ बी तो गलीली ए, कऊँकि तेरी बोलिया ते तूँ गलीली लगोआ।" 71 तेबे से आपू खे कोसणे लगेया और कसम खाणे लगेया, "जेस माणूंए रे बारे रे तुसे बोलणे लगी रे, आऊँ तेसखे बिल्कुल पनि जाणदा।" 72 तेबे तेबुई मुर्गे दूजी बार फेर बांग दित्ती। तेबे पतरसो खे से गल्ल, जो यीशुए तेसखे बोली थी, याद आई कि, "मुर्गे री दो बार बांग देणे ते पईले तूँ तीन बार माखे जाणने ते मुकरना।" तेबे से एसा गल्ला सोची की जोरे-जोरे की रोणे लगेया।