Marcos 6

चेलेया री वापसी और सुनसाण जगा

30 जेबे बारा प्रेरित जो यीशुए दुष्टात्माओं खे निकाल़ने रा अक्क देई की दो-दो करी की पेजे थे वापस आए तो जो कुछ तिने कित्तेया और जो सिखाई राखेया था, सब तिना गे बताया। 31 यीशुए चेलेया खे बोलेया, "तुसे आपू बी केथी जंगल़ो रे जाई की राम करी लो।" तिने ये इजी खे बोलेया था, कऊँकि बऊत लोक आओ थे और तिना खे रोटी खाणे खे बी बखत नि मिलो था। 32 तेबे यीशु और तिना रे चेले किस्तिया रे चढ़ी की, सुनसाण जगा रे चली गे।

पाँज ह्जार माणूंआ खे खुलाणा

33 तेबे बऊत जणेया यीशु और तिना रे चेले जांदे ऊए देखी ले और तेबे सब नगरो रे लोक कट्ठे ऊई की पैदल ई दौड़ी गे और तिना ते पईले तेती पऊँची गे। 34 तेबे तिने किस्तिया ते उतरी की एक बड़ी पीड़ देखी और तिना खे तेसा पीड़ा पाँदे तरस आया, कऊँकि सेयो तिना पेडा जेड़े थे, जिना रा कोई रखवाल़ा नि ऊँदा। तेबे यीशु तिना खे बऊत गल्ला सिखाणे लगे।

35 जेबे साँज ऊणे वाल़ी थी, तेबे तिना रे चेले तिना खे बोलणे लगे, "ये सुनसाण जगा ए और दिन बऊत चढ़ीगा रा। 36 एबे इना खे बिदा करी देयो, ताकि यो गांव, और बस्तिया रे जाई की आपू खे खाणे खे कुछ खरीदी सको।" 37 यीशुए तिना खे बोलेया, "तुसेई इना खे खाणे खे देयो।" चेलेया बोलेया, "क्या आसे इना खे दो सौ चाँदिए रे सिक्केया रे मोलो रे बराबर (मतलब दो सौ दिनो री मजदूरिया रे बराबर ए) रोटिया खरीदी लईये और इना खे खुल़ाईए?" 38 यीशुए तिना खे बोलेया, "जाओ और देखो तुसा गे कितणिया रोटिया ए?" तिने पता करी की बोलेया, "पाँज रोटिया और दो मछलिया ए।"

39 तेबे यीशुए चेलेया खे आज्ञा दित्ती कि सबी खे अरे काओ पाँदे बांईठी रे बठयाल़ी देओ। 40 सेयो सौ-सौ और पंजा-पंजा, बांईठी रे बैठीगे। 41 तेबे यीशुए सेयो दो मछलिया और पाँज रोटिया लईया और स्वर्गो खे देखी की धन्यवाद कित्तेया और रोटिया तोड़ी-तोड़ी की आपणे चेलेया खे दित्तिया कि लोका खे बांडी देओ और सेयो मछलिया बी बांडिया। 42 तेबे सब खाई की रजी गे। 43 और तेबे तिने बचे रे टुकड़ेया रिया बारा टोकरिया परी की चकिया और कुछ मछलिया बी थिया। 44 जिने रोटिया खाईया, तिना बीचे जादातर पाँज ह्जार तो मर्द थे।