1 एबे ओ पुरोईतो, ये चतौणी तुसा खे ए। 2 इजी खे सुणो, पूरे मनो रे मेरा आदर करो। सेना रा यहोवा ये बोलोआ, "जे तुसे एड़ा नि करोगे, तो मां तुसा खे स्राप देणा। मां तुसा रे आशीर्वाद स्रापो दे बदली देणे। सच्च ये आ कि ये मैं पईले ई करी ला दा ए, कऊँकि तुसे पूरे मनो ते मेरा आदर नि कित्तेया। 3 तुसे जो करी राखेया, तिजी रिया बजा ते मां तुसा रे वंशो खे सजा देणी ओर तुसा रे बलिदाना रे डांगरा रा गोबर तुसा रे थोबड़े पाँदे मल़ी देणा। ओर तुसे तिजी साथे कूड़े रे टेरो दे सेटी देणे। 4 तेबे तुसा खे पता लगी जाणा कि मैं तुसा खे ये आज्ञा इजी खे दित्ती थी, ताकि लेविया ओर तिना रे वंशो साथे मेरी बानी री वाचा बणी दी रओ, सेना रे यहोवे रा येई वचन ए।" 5 तुसा रे बुजुर्ग लेविया साथे मेरा वादा इजी री खातर था कऊँकि आऊँ चाऊँ था कि पुरोईत सुख शान्तिया साथे रओ। ओर मैं तिना खे ए ई कित्तेया ए। आऊँ चाऊँ था कि सेयो मेरा आदर करो बल्कि बऊत आदर करो। 6 तिने लोका खे सच्चा बिधान सिखाया, ओर तेसरे मुंए ते बुरी गल्ल नि निकल़ो थी। से मां साथे ऊई की चलो था ओर खुशिया साथे ओर शान्तिया ते रओ था। 7 कऊँकि पुरोईतो खे चाईयो कि से आपणे ओठे की ज्ञानो री रक्षा करो, कऊँकि से सेना रे यहोवे रा दूत ए जो सबी पाँदे राज करोआ। ओर लोक तेसरे मुंए ते ज्ञानो री गल्ल सुणोए। ओर लोक तेसरे मुंए ते शिक्षा खे लओए। 8 पर तुसे लोक आपणियां बाटा ते अटी गे दे ए, तुसे आपणियां शिक्षा रे जरिये कईया खे ठोकर खुल़ाई राखी ए। तुसे लेविया री वाचा तोड़ी ती री, सेना रे यहोवे री येई बाणी ए। 9 इजी री खातर मैं बी तुसे सबी लोका सामणे तुच्छ ओर निठे करीते, कऊँकि तुसे मेरी बाटा रे नि चलदे, बल्कि बिधान देणे रे मूँ देखी की बिचार करोए।

10 तुसे जाणोए कि आसा रा एक ई परमेशर ए। परमेशरे ई आसे सब बणाई राखे। पर एबे आसे एकी दूजे रे खलाफ ऊईगे दे ए। आसे तेस वादे खे तोड़ी देऊँए जो परमेशरे आसा रे बुजुर्गा ते कित्तेया था। 11 यहूदा रे लोके जो वादा परमेशरो ते कित्तेया था से तोड़ी ता दा ए। ओर यरूशलेम ओर सारे इस्राएल देशो दे घृणित काम करी राखे। तिने से मन्दर अपवित्र करिता दा ए जेतेते यहोवा प्यार करो था। मर्दे तिना जवाणसा साथे ब्या करी राखेया जो पराये देवतेया री पूजा करो थिया। 12 यहोवे एड़े काम करने वाल़ेया हर एकी माणूंए ते, चाए से कोई बी ओ, लग करने। ताकि सेयो याकूबो रे वंशो ते सदा खे लग ऊई जाओ। तेसरे कअरो रे रक्षक ओर सेना रे परमेशरो री पेंट चढ़ाणे वाल़ेया खे, यहूदा ते बाडी देणे। 13 तेबे तुसे ये दूजा काम कित्तेया कि तुसे परमेशरो री बेदी रोणे वाल़े ओर आखी परने वाल़े आसूआ साथे सीन्नी करी ती, एथो तक कि से तुसा री पेंटा रिया तरफा खे देखदा तक नि ओर ना खुश ऊई की तुसा रे आथो ते लओआ। तुसे पूछोए एड़ा कऊँ? 14 इजी री खातर, कऊँकि परमेशर तेरे ओर तेरी तेसा जवानिया री साथी मतलब ब्यायी री जवाणसा बीचे गवाह् ऊआ था, जेसरा तैं विश्वासघात करी राखेया। 15 पक्का यहोवे ई तुसे कट्ठे जोड़ी राखे। तुसा री आत्मा ओर तुसा रा शरीर तेसरे ई ए। इजी री खातर से तुसा ते परमेशरो ते प्यार करने वाल़ी ल्वाद चाओआ। इजी री खातर तुसे सब आपणी-आपणी लाड़िया साथे वफादार बणे दे रओ। जेसा साथे तुसे जवानिया दे ब्या कित्तेया था। 16 इस्राएलो रा परमेशर यहोवा ईंयाँ बोलोआ, "जो मर्द आपणी लाड़िया ते प्यार नि करदा, बल्कि तेसा खे छाडी देओआ, से आपणे टाल्ले उपद्रवो ते टखोआ।" सेना रे यहोवे री ये बाणी ए। इजी री खातर तुसे आपणी आत्मा दे बची की रओ, ओर विश्वासघात करने वाल़े नि बणो। 17 तुसे लोके आपणी गल्ला साथे यहोवा थकेरी राखेया ए। तेबे बी तुसे पूछोए, "आसे कुणजी गल्ला ते से थकेरी राखेया? ये बोली की कि जो लोक बुराई करोए, सेयो यहोवे री नजरा दे खरे ए, ओर से तिना ते खुश ओआ। या ये पूछी की कि न्याय रा परमेशर केयी ए?"