लेवी बिधान 6

बेईमान लोका रिया तँईं दोषबलि

1 तेबे यहोवे मूसे खे बोलेया, 2 "जे कोई माणूं यहोवे साथे तोखा करी की पापी ठईरो, जिंयाँ जायदात, लेणा-देणा या लूटा रे बारे दे आपणे पड़ोसिये साथे छल करो या तेस पाँदे अन्देर करो, 3 या केसी माणूंए खे कोई राची री चीज मिली जाओ ओर तिजी रे बारे दे चूठ बोलो ओर चूठी कसम खाई कि पाप करी राखेया, 4 तो जेबे एड़ा काम करी की से दोषी ऊई जाओ, तेबे जो बी चीज तिने लूट या अन्देर करी की या जायदात या मिली री ओ; 5 चाए कोई चीज कऊँ नि ओ जेतेरे बारे दे तिने चूठी कसम खाई ओ; जेस दिने ये पता लगी जाओ कि से दोषी ए तो से तेसखे पूरा-पूरा वापस करी देओ ओर तिजी साथे पाँजुआ पाअग बढ़ाई की तेसरे मालको खे परी देओ। 6 ओर से यहोवे रे सामणे आपणा दोषबलि चढ़ाणे खे चूण्डो बीचा ते एक बिना नुक्शो रा खाडू दोषबलिया खे पुरोईतो गे लई आओ, ओर जितणी कीमत पुरोईत ठराओ से बी लई आओ। 7 ईंयाँ पुरोईत तेसरिया तँईं यहोवे रे सामणे प्राश्चित करो ओर जेस कामो खे करी की से दोषी ऊईगा रा तिजी री माफी तेसखे मिलणी।"

पांतिया-पांतिया रे बलिदानो री बिधि होमबलि

8 तेबे यहोवे मूसे खे बोलेया, 9 "हारूण ओर तेसरे पाऊआ खे ये आज्ञा देई की बोल कि होमबलि चढ़ाणे खे ये नियम मानणे; मतलब होमबलि आगी पाँदे राथियो ते लई की प्यागा तक बल़ी री बेदिया पाँदे रओ। 10 ओर पुरोईत आपणे लीलणो रे टाल्ले ओर आपणे शरीरो पाँदे आपणे लीलणो री निकर पईनी की होमबलिया री स्वा, जो आगी रे बल़ने ते बेदिया पाँदे रई जाओ, तिजी खे चकी की बेदिया गे राखो। 11 तेबे से आपणे ये टाल्ले खोली की दूजे टाल्ले पईनी की स्वाई खे डेरे ते बारे केथी शुद्ध जगा रे लई जाओ। 12 बेदिया री आग बल़दी रओ ओर कदी बी बीजणी नि चाईयो; पुरोईत हर रोज प्यागा तेते बेदिया पाँदे लकड़ू राखी की होमबलिया रे टुकड़ेया खे ओर मेलबलिया री चर्बी तिजी पाँदे फूकेया करो। 13 बेदिया पाँदे आग लगातार बल़दी रओ, से कदी बी बीजणी नि चाईयो।"

नज्जो री बलि

14 नज्जो री बलि चढ़ाणे खे ये बिधानो खे मानणे कि हारूणो रे पाऊ तिजी खे बेदिया ते आगे यहोवे रे नेड़े ली आओ। 15 ओर पुरोईत नज्जो री बलिया रे तेल मिले रे मैदे बीचा ते मुट्ठी परी की ओर तिजी पाँदला सारा लोबान चकी की नज्जो री बलिया री यादा रे एस इस्से खे यहोवे रे सामणे सुख देणे वाल़े खुशबूआ खे बेदिया पाँदे बाल़ो। 16 ओर तिजी बीचा ते जो बाकि रई जाओ तिजी खे हारूण ओर तेसरे पाऊ खाओ; पर से बिना सजेड़े रा पवित्र जगा रे खाया जाओ, सेयो मिलणे वाल़े तम्बूए रे आँगणो रे तिजी खे खाओ।*6:16 1 कुरिन्थ 9:13 17 से सजेड़े साथे नि पकाणा, कऊँकि मैं आपणी होमबलिया बीचा ते तिना रा आपणा खरा इस्सा तिना खे देई राखेया; इजी खे जिंयाँ पापबलि ओर दोषबलि परम पवित्र ए, तेड़ा ई से बी बऊत पवित्र ए।

18 हारूणो रे वंशो रे सब मर्द तिजी बीचा ते खाई सकोए, यहोवे खे आगी रे बलि कित्ते रे बीचा ते तिना रा इस्सा सदा तुसा री पीढ़िया-पीढ़िया तक बणेया रा रणा; जो कोई आगी रे बलि कित्ते रे खे छूँओगा, से पवित्र ठईरना ये नियम सदा बणेया रा रणा।

पुरोईता री नज्जो री बलि

19 फेर यहोवे मूसे खे बोलेया, 20 "जेस दिने हारूणो ओर तेसरे पाऊआ रा अभिषेक ऊणा तेस दिने से यहोवे खे ये चढ़ावा चढ़ाओ; दो किलो मैदा हर रोज नज्जो री बलिया रे चढ़ाओ, तिजी बीचा ते आदा प्यागा ओर आदा साँजा रे बखते चढ़ाओ। 21 से तवे पाँदे तेलो साथे पकाया जाओ; जेबे से तेलो साथे तर ऊई जाओ, तेबे से ली आऊणा, एसा नज्जो री बलिया रे पके रे टुकड़े यहोवे खे सुख देणे वाल़ी खुशबूआ खे चढ़ाणे। 22 हारूणो रे पाऊआ बीचा ते जो तेस पुरोईतो रे पदो खे अभिषिक्त ऊई रा, सेई एस चढ़ावे खे चढ़ाया करो; ये बिदी सदा खे ए, ताकि यहोवे रे सामणे से सारा चढ़ावा बाल़ेया जाओ। 23 पुरोईतो री सारी नज्जो री बलि बाल़ी जाओ, से कदी नि खाणी।"

पापबलि

24 तेबे यहोवे मूसे खे बोलेया, 25 "हारूण ओर तेसरे पाऊआ खे ईंयाँ बोल कि पापबलि चढ़ाणे खे ये बिधान ए; जेते जगा रे होमबलिया रा डांगर फाटेया जाओआ तेते जगा रेई पापबलिया रा डांगर बी यहोवे रे सामणे बलि करेया जाओ; से बऊत पवित्र ए। 26 पुरोईत जो पापबलि चढ़ाओगा सेई तिजी खे खाओ; से पवित्र जगा रे मिलणे वाल़े तम्बूए रे आँगणो रे खाया जाओ।*6:26 1 कुरिन्थ 9:13 27 जो कुछ तेस मासो ते छुँईं जाओगा, से पवित्र ठईरना ओर जे तेसरे खूनो रे छीटे केसी टाल्ले पाँदे पड़ी जाओ, तो से तेसी पवित्र जगा रे तोई देणा। 28 ओर से मास जेते माट्टिया रे पांडे रे पकाई राखेया ओ, से तोड़ी देणा; जे से पीतल़ो रे पांडे रे ब्वाल़ी राखेया ओ, तो से किसी-किसी की मांजी लणा ओर पाणिए साथे तोई देणा।"

29 पुरोईता रे परिवारो बीचा ते सारे मर्द तिजी खे खाई सकोए, से बऊत पवित्र ए। 30 पर जेस पापबलिया रे डांगरो रा खून मिलणे वाल़े तम्बूए रे पीतरे पवित्र जगा रे प्राश्चित करने खे पऊँचाया जाओ तेसरा मास कदी नि खाणा; से सारा आगी रे फूकेया जाओ।