लेवी बिधान 16

पापो ते छुटकारे रा दिन

1 जेबे हारूणो रे दो पाऊ यहोवे रे सामणे नेड़े जाई की मरीगे, तिजी ते बाद यहोवे मूसे साथे गल्ला कित्तिया; 2 ओर यहोवे मूसे खे बोलेया, "आपणे पाई हारूणो खे बोल कि सन्दूको पाँदले दया आसणो रे सामणे, बीचले पर्दे रे पीतरे, बऊत ई पवित्र जगा रे हर बखत नि जाणा, नई तो मरी जाणा; कऊँकि आऊँ तेस दया आसणो पाँदे बादल़ो रे दिशणा।*16:2 इब्रानी 6:19 3 जेबे हारूण बऊत ई पवित्र जगा रे जाया करो तेबे ईंयाँ जाओ, मतलब पापबलिया खे एक बाच्छू ओर होमबलिया खे एक खाडू लई की आओ। 4 से लीलणो रे टाल्लेया रा पवित्र चोगा ओर आपणे बदनो रे लीलणो रे टाल्ले री निकर पईनी की ओर लीलणो रे टाल्ले रा पटका ओर लीलणो रे टाल्ले री पगड़ी बानी की जाओ, ये पवित्र टाल्ले ए ओर से पाणिए साथे नाह्यी की इना खे पईनो। 5 फेर से इस्राएलिया री मण्डल़िया ते पापबलिया खे दो बाकरे ओर होमबलिया खे एक खाडू लओ। 6 हारूण आपू खे ओर आपणे कराने खे पापबलिया खे एक बाच्छू चढ़ाई की प्राश्चित करो।*16:6 इब्रानी 5:3, इब्रानी 7:27 7 फेर से तिना दुँईं बाकरेया खे लई की मिलणे वाल़े तम्बूए रे द्धारो पाँदे यहोवे रे सामणे खड़ा करो। 8 ओर हारूण दुँईं बाकरेया पाँदे चिट्ठी पाओ, तिना बीचा ते एक चिट्ठी यहोवे खे ओर दूजी अजाजेलो खे सुनसाण जगा रे लई जाणे खे ओ। 9 ओर जेस बाकरे पाँदे यहोवे रे नाओं री चिट्ठी निकल़ो तेसखे हारूण पापबलिया खे चढ़ाओ; 10 पर जेस बाकरे पाँदे अजाजेलो खे चिट्ठी निकल़ो से प्राश्चितो रिया तँईं यहोवे रे सामणे जिऊँदा खड़ा करी की सुनसाण जगा रे छाडी देणा।"

11 हारूण तेस पापबलिया रे बाच्छूए खे आपू खे ओर आपणे कराने खे ल्याओ ओर तेसखे बलिदान करी की आपणा प्राश्चित करो। 12 ओर जो बेदी यहोवे रे सामणे ए तिजी पाँदले बल़दे ऊए फेऊआ साथे परी री तंग्यारटिया खे लई की ओर आपणी दोनो मुट्ठिया कूटे रे खुशबूदार तूपो साथे परी की बीचले पड़दे रे पीतरे ल्याई की*16:12 इब्रानी 6:19

13 तेस तूपो खे यहोवे रे सामणे आगी रे पाओ, जेते साथे तूपो रा तुआँ गवाईया री चिट्ठिया पाँदे दया रे आसणो पाँदे छाई जाओ, नई तो से मरी जाणा; 14 तेबे से बाच्छूए रे खूनो बीचा ते कुछ लई की दया आसणो पाँदे पूर्वो रिया तरफा खे आपणी गूठिया साथे छिड़को ओर फेर तेते खूनो बीचा ते गूठिये की तेस दया आसणो रे सामणे बी सात बार छिड़की देओ।*16:14 इब्रानी 9:7-13 15 फेर से तेस पापबलिया रे बाकरे खे लोका खे बलिदान करी की तेसरा खून पवित्र ओर बऊत ई पवित्र जगा रे बीचले पड़दे रे पीतरे ली आओ ओर जिंयाँ तिने बाच्छूए रे खूने की कित्तेया था ठीक तेड़ा ई से बाकरे रे खूने की बी करो, मतलब तिजी खे दया रे आसणो पाँदे ओर तेते सामणे छिड़को।*16:15 इब्रानी 6:19, इब्रानी 7:27, इब्रानी 9:7-13, इब्रानी 10:4 16 ओर से इस्राएलिया री कई प्रकारा री अशुद्धता ओर पाप ओर तिना रे सबी पापो रिया बजअ ते बऊत ई पवित्र जगा खे प्राश्चित करो ओर मिलणे वाल़ा तम्बू जो तिना साथे कई प्रकारा रिया अशुद्धता बीचे रओआ तिजी खे बी से तेड़ा ई करो। 17 जेबे हारूण प्राश्चित करने खे बऊत ई पवित्र जगा रे जाओ, तदुए ते जदुए तक से आपणे ओर आपणे कराने ओर इस्राएलिया री सारी मण्डल़िया खे प्राश्चित करी की बारे नि निकल़ोगा, तदुए तक कोई माणूं मिलणे वाल़े तम्बूए रे नि रणा चाईयो। 18 तेबे से निकल़ी की तेसा बेदिया गे जाओ जो यहोवे रे सामणे ए ओर तेतेरिया तँईं प्राश्चित करो, मतलब बाच्छूए रा खून ओर बाकरे रा खून दुँईं बीचा ते कुछ लई की तेसा बेदिया रे चऊँ कूणेया रे सींगो रे लगाओ। 19 ओर तेते खूनो बीचा ते कुछ आपणी गूठिये की सात बार तेते पाँदे छिड़की की तिजी खे इस्राएलिया री कई प्रकारा री अशुद्धता खे छुड़ाई की शुद्ध ओर पवित्र करो।

प्राश्चितो रा बाकरा

20 जेबे हारूण बऊत ई पवित्र जगा ओर मिलणे वाल़ा तम्बू ओर बेदिया खे प्राश्चित करी चुको, तेबे जिऊँदे बाकरे खे आगे लई आओ; 21 ओर हारूण आपणे दुँईं आथा खे जिऊँदे बाकरे पाँदे राखी की इस्राएलिया रे सारे बुरे काम ओर तिना रे सारे पाप, मतलब तिना रे सारे पाप मानी लो ओर तिना खे बाकरे रे सिरो पाँदे राखी की तेसखे केसी माणूंए रे आथे जो एते कामो खे त्यार ओ, सुनसाण जगा रे पेजी की छडवाई देओ।*16:21 इब्रानी 10:4 22 से बाकरा तिना रे सारे पाप आपू पाँदे लादी की केसी सुनसाण प्रदेशो खे चकी की लई जाओगा; इजी री खातर से माणूं तेस बाकरे खे सुनसाण जगा रे छाडी देओ। 23 तेबे हारूण मिलणे वाल़े तम्बूए रे आओ ओर जिना लीलणो रे टाल्ले पईनी की से बऊत ई पवित्र जगा रे आया था तिना खे खोली की तेथी राखी देओ। 24 फेर से केसी पवित्र जगा रे पाणिए साथे नाह्यी की आपणे टाल्ले पईनी लओ ओर बारे जाई की आपणा होमबलि ओर आम जनता रा होमबलि चढ़ाई की आपणियां ओर जनता रिया तँईं प्राश्चित करो। 25 ओर से पापबलिया री चर्बिया खे बी बेदिया पाँदे फूको। 26 ओर जो माणूं बाकरे खे अजाजेलो खे छाडी की आओ सेयो बी आपणे टाल्लेया खे तोई लओ ओर पाणिए साथे नाह्यी की, तेबे डेरे रे आओ। 27 ओर पापबलिया रा बाच्छू ओर पापबलिया रा बाकरा बी जिना रा खून बऊत ई पवित्र जगा रे प्राश्चित करने खे पऊँचाया जाओ सेयो दोनो डेरे ते बारे पऊँचाए जाओ ओर तिना रा चामड़ा, मास ओर गोबर आगी रे फूकेया जाओ। 28 ओर जो तिना खे फूको से आपणे टाल्ले तोई लओ ओर पाणिए साथे नाह्यी की इजी ते बाद से डेरे रे आओ।

पापो ते प्राश्चितो रा दिन मानणा

29 तुसा लोका खे ये सदा री रवाज ऊणी कि सातुए मीन्ने रे दसुए दिने तुसे बरत करना ओर तेस दिने कोई, चाए से तुसा रे आपणे प्रदेशो रा ओ, चाए तुसा बीचे रणे वाल़ा कोई परदेशी ओ, कोई बी केड़ा बी काम-काज नि करो; 30 कऊँकि तेस दिने तुसा खे शुद्ध करने खे तुसा रिया तँईं प्राश्चित करेया जाणा ओर तुसे आपणे सबी पापो ते यहोवे रे सामणे पवित्र ठईरने। 31 ये तुसा खे बऊत ई रामो रा दिन ठईरो ओर तुसे तेस दिने बरत करना ओर केसी बी किस्मा रा कोई काम नि करना; ये सदा री रवाज ए। 32 ओर जेसरा आपणे बाओ रिया जगा पाँदे पुरोईतो रे पदो खे अभिषेक ओर संस्कार करेया जाओ, से पुरोईत पवित्र लीलणो रे टाल्ले पईनी की प्राश्चित करेया करो, 33 से बऊत ई पवित्र जगा ओर मिलणे वाल़ा तम्बू ओर बेदिया खे प्राश्चित करो ओर पुरोईता खे ओर मण्डल़िया रे सारे लोका खे बी प्राश्चित करो। 34 ओर ये तुसा खे सदा री रवाज ऊणी कि इस्राएलिया खे हर साल एक बार तुसा रे सारे पापो रिया तँईं प्राश्चित करेया जाओ। यहोवे री एसा आज्ञा रे मुताबिक जो तिने मूसे खे दित्ती थी, हारूणे कित्तेया।