लेवी बिधान 15

शरीरो ते बह्यीणे वाल़े अशुद्ध स्राव

1 तेबे यहोवे मूसे ओर हारूणो खे बोलेया, 2 "इस्राएलिया खे बोलो कि जेस-जेस मर्दो रे प्रमेह ओ, तो से प्रमेह रिया बमारिया री बजअ ते अशुद्ध रणा। 3 जे से तेसरे शरीरो रे चाए बह्यींदा रओ, चाए बह्यीणा बन्द ऊईगा ओ, तेबे बी से अशुद्ध रणा। 4 जेसरे प्रमेह ओ से जेते-जेते बछौणे पाँदे लेटोगा, से अशुद्ध ठईरना ओर जेते-जेते चीजा पाँदे से बैठो से बी अशुद्ध ठईरनी। 5 ओर जो कोई ओर माणूं तेसरे बछौणे खे छूँओगा से आपणे टाल्ले तोई की पाणिए साथे नाओं, फेर बी से साँजा तक अशुद्ध रओ। 6 ओर जेसरे प्रमेह ओ ओर से जेते चीजा पाँदे बैठेया रा ओ, तेते पाँदे जो कोई बैठो से आपणे टाल्ले तोई की पाणिए साथे नाओं, फेर बी से साँजा तक अशुद्ध रओ। 7 ओर जेसखे प्रमेह ओ ओर जो कोई तेस साथे छवाँई जाओगा से आपणे टाल्ले तोई की पाणिए साथे नाओं, फेर बी से साँजा तक अशुद्ध रओ।"

8 ओर जेसरे प्रमेह ओ जे से केसी शुद्ध माणूंए पाँदे थूको, तो से आपणे टाल्ले तोई की पाणिए साथे नाओं, फेर बी से साँजा तक अशुद्ध रओ। 9 ओर जेसरे प्रमेह ओ से संवारिया री जेते चीजा पाँदे बैठो, से अशुद्ध ठईरो। 10 ओर जो कोई केसी चीजा खे, जो तेस थाले रई ओ छूँओ से आपणे टाल्ले तोई की पाणिए साथे नाओं ओर साँजा तक अशुद्ध रओ। 11 ओर जेसरे प्रमेह ओ जे से केसी माणूंए खे बिना आथ तोये छूँओ, तो एड़ा माणूं आपणे टाल्ले तोई की पाणिए साथे नाओं ओर साँजा तक अशुद्ध रओ। 12 ओर जेसरे प्रमेह ओ से माट्टिया रे जेस केसी पांडे खे छूँओ, तो से तोड़ी देणा ओर लकड़िया रे सबी प्रकारा रे पांडे पाणिए साथे तोणे।

13 फेर जेसरे प्रमेह ओ से जेबे आपणी बमारिया ते ठीक ऊई जाओ, तदुए ते शुद्ध ऊणे रे सात दिन गिणी लो ओर तिना रे खत्म ऊणे ते बाद आपणे टाल्लेया खे तोई की बह्यींदे पाणिए रे नाओं, तेबे से शुद्ध ठईरना। 14 ओर आठुए दिने से दो कूगी या कबूतरिया रे दो बच्चे लई की मिलणे वाल़े तम्बूए रे द्धारो पाँदे यहोवे रे सामणे जाई की तिना खे पुरोईतो गे देओ। 15 तेबे पुरोईत तिना बीचा ते एकी खे पापबलि ओर दूजे खे होमबलि करने खे चढ़ाओ ओर पुरोईत तेसरिया तँईं प्रमेह रिया बजअ ते यहोवे रे सामणे प्राश्चित करो।

16 फेर जे केसी मर्दो रा वीर्य आपू ई निकल़ी जाओ, तो से आपणे सारे शरीरो खे पाणिए साथे तोओ ओर साँजा तक अशुद्ध रओ। 17 ओर जेस केसी टाल्ले या चामड़े पाँदे से वीर्य पड़ो से पाणिए साथे तोया जाओ ओर साँजा तक अशुद्ध रओ। 18 ओर जेबे कोई मर्द जवाणसा साथे सम्बन्द बणाओ तो सेयो दोनो पाणिए साथे नाओं ओर साँजा तक अशुद्ध रओ।*15:18 इब्रानी 9:10

19 फेर जे कोई जवाणस छूणे बैठी री ओ, तो से साता दिना तक छोतली मानी जाओ ओर जो कोई तेसा खे छूँओ, से साँजा तक अशुद्ध रओ।

20 ओर जदुए तक से छोतली रओ तदुए तक जेसा-जेसा चीजा पाँदे से लेटो ओर जेते-जेते चीजा पाँदे से बैठो सेयो सब छोतलिया ठईरो। 21 ओर जो कोई तेसा रे बछौणे खे छूँओ से आपणे टाल्ले तोयी की पाणिए साथे नाओं ओर साँजा तक अशुद्ध रओ। 22 ओर जो कोई तेसा चीजा खे छूँओ जेते पाँदे से जवाणस बैठी री ऊगी से आपणे टाल्ले तोयी की पाणिए साथे नाओं ओर साँजा तक अशुद्ध रओ। 23 ओर जेते चीजा पाँदे से बैठी री ओ, चाए से बछौणा ओ, छूणे रे बखते तेसा रा खून लगी रा ओ, तिजी खे छूणे वाल़े साँजा तक अशुद्ध रओ। 24 ओर जो कोई मर्द तेसा साथे सम्बन्द बणाओ ओर तेसा रा खून तेसरे लगी जाओ, तो से मर्द साता दिना तक अशुद्ध रओ ओर जेस-जेस बछौणे पाँदे से लेटो सेयो अशुद्ध ठईरो।

25 फेर जे केसी जवाणसा रे आपणे छूणे बैठणे रे सई बखतो ते जादा दिन तक खून बह्यींदा रओ, तो जदुए तक से एड़ी दशा रे ए तदुए तक से छोतली ठईरो।*15:25 मत्ती 9:20 26 तेसा रे छूणे बैठणे रे सारे दिना रे जेस-जेस बछौणे रे से लेटो सेयो सब तेसा रे छोतले बछौणे जेड़े ठईरो ओर जेते-जेते चीजा पाँदे से बैठो सेयो बी तेसा रे छूणे बैठणे रे दिना जेड़े छोतले ठईरो। 27 ओर जो कोई तिना खे छूँओ से आपणे टाल्ले तोई की पाणिए साथे नाओं ओर साँजा तक अशुद्ध रओ। 28 ओर जेबे से जवाणस आपणे छूणे बैठणे रे दिना ते शुद्ध ऊई जाओ, तदुए ते से सात दिन गिणी लओ ओर तिना दिना रे खत्म ऊणे ते बाद से शुद्ध मानी जाओ। 29 फेर आठुए दिने से दो कूगी या कबूतरिया रे दो बच्चे लई की मिलणे वाल़े तम्बूए रे द्धारो पाँदे पुरोईतो गे ल्याओ। 30 तेबे पुरोईत एकी खे पापबलि ओर दूजा होमबलिया खे चढ़ाओ ओर पुरोईत तेसा रिया तँईं तेसा रे छूणे बैठणे री छोतलिया रिया बजअ ते यहोवे रे सामणे प्राश्चित करो।

31 ईंयाँ तुसे इस्राएलिया खे तिना री अशुद्धता ते लग राखेया करो, केथी एड़ा नि ओ कि सेयो यहोवे रे मिलणे वाल़े तम्बूए खे जो तिना बीचे ए अशुद्ध करी की आपणी अशुद्धता रे फसी की मरी जाओ।

32 जेसरे प्रमेह ओ ओर जो मर्द वीर्य निकल़ने ते अशुद्ध ओ; 33 ओर जो जवाणस छूणे बैठी री ओ, क्या मर्द, क्या जवाणस जेस केसी रे धातुरोग ओ ओर जो मर्द छोतलिया जवाणसा साथे सम्बन्द बणाओ, इना सबी खे येई बिधि-बिधान ए।