1 तेबे यहोवे मूसे खे बोलेया, 2 "इस्राएलिया खे बोल कि जे कोई जवाणस गर्भवती ऊई कि पाऊ पैदा करोई, तो से सात दिन तक अशुद्ध रणी; जिंयाँ से छूणे बैठणे रे दिना रे ऊई की अशुद्ध रया करोई। 3 ओर आठुए दिने पाऊए रा खतना करेया जाओ।* 4 फेर से जवाणस आपणे शुद्ध करने वाल़े खूनो रे 33 दिना तक रओ ओर जदुओ तक तेसा रे शुद्ध ऊणे रे दिन पूरे नि ओ, तदुओ तक से ना तो कोई पवित्र चीज छूँओ ओर ना ई पवित्र जगा रे जाओ। 5 जे तेसा जवाणसा रे बेटी जम्मो, तो से चौदा दिना तक अशुद्ध रणी, जेड़ी से छूणे बैठणे रे बखते रओई। से आपणे शुद्ध करने वाल़े खूनो रे 66 दिना तक रओ।"

6 जेबे तेसा रे शुद्ध ऊणे रे दिन पूरे ऊई जाओ, तेबे चाए तेसा रे पाऊ ऊआ ओ चाए बेटी, से होमबलिया खे एकी सालो रा पेडा रा बच्चा ओर पापबलिया खे कबूतरिया रा एक बच्चा या कूगी मिलणे वाल़े तम्बूए रे द्धारो पाँदे पुरोईतो गे ल्यायो।*

7 तेबे पुरोईत तिजी खे यहोवे रे सामणे पेंट चढ़ाई की तेसा रिया तँईं प्राश्चित करो। तेबे से आपणे खून बह्यीणे री अशुद्धता ते छूटी की शुद्ध ऊई जाणी। जेसा जवाणसा रे पाऊ या बेटी जम्मो तेसा खे येई बिधि-बिधान ए। 8 ओर जे तेसा जवाणसा गे पेड या बाकरी देणे री सामर्थ नि ओ, तो दो कूगिया रे बच्चे या कबूतरो रे दो बच्चे, एक तो होमबलि ओर दूजा पापबलिया खे देओ, तेबे पुरोईत तेसा रिया तँईं प्राश्चित करो, तेबे से शुद्ध ऊई जाणी।*