1 यहोवे मूसे खे बोलेया, 2 "हारूण ओर तेसरे पाऊआ खे ओर सबी इस्राएलिया खे बोल कि यहोवे ये आज्ञा देई राखी, 3 इस्राएलो रे कराने बीचा ते कोई माणूं एड़ा ओ जो बल़द या मिन्टूआ या बाकरिया खे, चाए डेरे रे चाए डेरे ते बारे फाटी की 4 मिलणे वाल़े तम्बूए रे द्धारो पाँदे, यहोवे रे रणे री जगा रे सामणे यहोवे खे चढ़ाणे रिया खातर नि लई जाओ, तो तेस माणूंए खे खून करने रा दोष लगणा ओर से माणूं जो खून करने वाल़ा ठईरना, से आपणे लोका बीचा ते नाश करेया जाणा। 5 एते बिदिया री ये बजअ ए कि इस्राएली आपणे बलिदान जिना खे सेयो खुले मैदानो रे फाटोए, सेयो तिना खे मिलणे वाल़े तम्बूए रे द्धारो पाँदे पुरोईतो गे, यहोवे रिया तँईं लई जाई की यहोवे खेई मेलबलि करी की बलिदान करेया करो; 6 ओर पुरोईत खूनो खे मिलणे वाल़े तम्बूए रे द्धारो पाँदे यहोवे री बेदिया पाँदे छिड़को ओर चर्बिया खे तेसरे सुख देणे वाल़ी खुशबू रिया तँईं फूको। 7 सेयो जो बाकरेया री मूर्तिया खे पूजणे वाल़े व्याभिचार करोए, सेयो फेर आपणे बलिया रे डांगरा खे तिना रिया तँईं बलिदान नि करो। तुसा री पीढ़िया खे ये सदा री रवाज ऊणी।"

8 यहोवे मूसे खे ये बी बोलेया, "तूँ तिना खे बोल कि इस्राएलो रे करानेया रे लोका बीचा ते या तिना बीचे रणे वाल़े परदेशिया बीचा ते जो होमबलि या मेलबलि चढ़ाओ, 9 ओर तिजी खे मिलणे वाल़े तम्बूए रे द्धारो पाँदे यहोवे खे चढ़ाणे रिया तँईं नि लई आओ, तो एड़ा माणूं आपणे लोका बीचा ते नाश करेया जाणा।"

10 ओर इस्राएलो रे करानेया रे लोका बीचा ते या तिना बीचे रणे वाल़े परदेशिया बीचा ते कोई माणूं कऊँ नि ओ जो केड़ा बी खून खाओ, तो मां तेस खून खाणे वाल़े ते मूँ मोड़ी कि से तेसरे लोका बीचा ते नाश करी देणा। 11 कऊँकि शरीरो रा प्राण खूनो रे रओआ ओर से मैं तुसा लोका खे बेदिया पाँदे चढ़ाणे खे देई राखेया कि तुसा रे प्राणो खे प्राश्चित करेया जाओ; कऊँकि प्राणो रिया तँईं खूनो साथे ई प्राश्चित ओआ।* 12 इजी बजअ ते आऊँ इस्राएलिया खे बोलूँआ कि तुसा बीचा ते कोई बी माणूं खून नि खाओ ओर जो परदेशी तुसा बीचे रओआ से बी खून कदी नि खाओ।

13 इस्राएलिया बीचा ते या तिना बीचे रणे वाल़े परदेशिया बीचा ते कोई माणूं कऊँ नि ओ जो शिकार करी की खाणे जोगा डांगर या पंछी पकड़ो, से तेसरा खून निकयाल़ी की माट्टिया साथे टकी देओ। 14 कऊँकि हर एक शरीरो रा प्राण जो अए से तेसरा खून ईए जो तेसरे प्राणो साथे एक ए; इजी री खातर आऊँ इस्राएलिया खे बोलूँआ कि केसी बी प्राणिये रा खून तुसे नि खाणा, कऊँकि सबी प्राणिया रा प्राण तिना रा खून ईए; जो कोई तिजी खे खाओ से नाश करेया जाणा।* 15 ओर चाए से आपणे प्रदेशो रा ओ चाए परदेशी ओ, जो कोई केसी लोथा रा या काये रे डांगरा रा मास खाओगा, से आपणे टाल्ले तोई की पाणिए साथे नाह्यी लो ओर साँजा तक अशुद्ध रओ, तेबे से शुद्ध ऊणा। 16 पर जे से तिना खे नि तोओ ओर ना ई नाओगा, तो तिना खे आपणे पापो री सजा मिलणी।