लेवी बिधान 4

पापबलिया री बिधि

1 तेबे यहोवे मूसे खे बोलेया, 2 "इस्राएलिया खे ईंयाँ बोल कि जे कोई माणूं इना कामा बीचा ते जिना खे यहोवे ना करी राखी केसी कामो खे अणजाणे रे करी की पापी ऊई जाओ; 3 ओर जे अभिषिक्त पुरोईत एड़ा पाप करो, जेते की प्रजा दोषी ठईरो, तो आपणे पापो रिया बजअ ते से एक बिना नुक्शो रा बाच्छू यहोवे खे पापबलि करी की चढ़ाओ। 4 से तेस बाच्छूए खे मिलणे वाल़े तम्बूए रे द्धारो पाँदे यहोवे रे आगे लई जाई की तेसरे सिरो पाँदे आथ राखो ओर तेस बाच्छूए खे यहोवे रे सामणे बलि करो। 5 ओर अभिषिक्त पुरोईत बाच्छूए रे खूनो बीचा ते कुछ लई की मिलणे वाल़े तम्बूए रे लई जाओ; 6 ओर पुरोईत आपणी गूठी खूनो रे डबोई-डबोई की पवित्र जगा रे बीचले पड़दे ते आगे यहोवे रे सामणे सात बार छिड़को। 7 ओर पुरोईत तेस खूनो बीचा ते कुछ ओर लई की खुशबूदार तूपो री बेदिया रे सींगो पाँदे जो मिलणे वाल़े तम्बूए रे, यहोवे रे सामणे तिजी पाँदे लगाओ; तेबे बाच्छूए रा बाकि सारा खून बेदिया रे पावे पाँदे होमबलिया री बेदी जो मिलणे वाल़े तम्बूए रे द्धारो पाँदे ए, लटी देओ।"

8 फेर बड़ा पुरोईत पापबलिया रे बाच्छूए री सारिया चर्बिया खे तेसते लग करी देओ, मतलब जेते चर्बिया साथे आंजा टखी रिया रओईया, 9 ओर दोनो गुर्दे ओर तिना पाँदली चर्बी जो लको गे ओई ओर गुर्देया समेत कल़ेजे री पाँदली झिल्ली, इना सबी खे से एड़ा लग करो, 10 जिंयाँ मेलबलिया वाल़े चढ़ावे रे बल़दो री चर्बी लग करोए ओर पुरोईत इना खे होमबलिया री बेदिया पाँदे फूको। 11 पर तेस बाच्छूए री खाल, सारा मास, पैर, सिर, आंजा, गोबर, 12 ओर बाच्छूए रा बचेया रा सारा मास, मतलब पूरा बाच्छू डेरे ते बारे शुद्ध जगा रे, जेती स्वा सेटोए तिजी पाँदे लकड़ू राखी की आगी साथे फूकणा।

13 जे इस्राएलिया री सारी मण्डल़ी अणजाणे रे पाप करो ओर से गल्ल मण्डल़िया री आखी ते छिपी री ओ ओर सेयो यहोवे री केसी आज्ञा रे खलाफ कुछ करी की दोषी ठईरे ओ; पर जेबे सेयो तेस दोषो खे महसूस करो 14 तो जेबे तिना रा कित्तेया रा पाप सामणे आई जाओ, तेबे मण्डल़ी एक बाच्छूए खे लई की पापबलिया खे मिलणे वाल़े तम्बूए ते आगे लई जाओ, 15 फेर मण्डल़िया रे स्याणे लोक आपणे-आपणे आथ यहोवे रे सामणे बाच्छूए रे सिरो पाँदे राखो, तिजी ते बाद से बाच्छू यहोवे रे सामणे बलि कित्तेया जाओ।

16 तेबे अभिषिक्त पुरोईत बाच्छूए रे खूनो बीचा ते कुछ मिलणे वाल़े तम्बूए रे लई जाओ; 17 से पुरोईत आपणी गूठी खूनो रे डबोई-डबोई की तेस बीचले पड़दे रे आगे यहोवे रे सामणे सात बार छिड़को। 18 ओर मिलणे वाल़े तम्बूए रे यहोवे रे आगे बेदिया रे सींगो पाँदे खूनो खे लगाओ ओर बचेया रा सारा खून होमबलिया री बेदिया रे पावे पाँदे जो मिलणे वाल़े तम्बूए रे द्धारो पाँदे ए, लटी देओ।

19 ओर पुरोईत बाच्छूए री सारी चर्बी काडी की बेदिया पाँदे फूको। 20 जिंयाँ पापबलि चढ़ांदे बखते बाच्छूए साथे कित्तेया था, तिंयाँ ई एस साथे बी करो ओर ईंयाँ पुरोईत इस्राएलिया खे प्राश्चित करो, तेबे तिना रा पाप माफ ऊणा। 21 फेर से बाच्छूए खे डेरे ते बारे लई जाई की तिंयाँ ई फूको जिंयाँ पईलका बाच्छू फूकेया था; ये तो मण्डल़िया रिया तँईं कित्तेया रा पापबलि ठईरना।

22 जेबे कोई परदान मर्द पाप करो, मतलब आपणे परमेशर यहोवे री केसी आज्ञा रे खलाफ अणजाणे रे कुछ करी की दोषी ऊई की महसूस करो, 23 ओर तेसरा पाप तेस सामणे आई जाओ, तो से बिना नुक्शो रा बाकरा बलिदान करने खे ली आओ; 24 ओर से बाकरे पाँदे आपणा आथ राखो ओर बाकरे खे तेते जगा रे बलि करो जेती होमबलि डांगर यहोवे रे सामणे बलि कित्ते जाओए; ये तो पापबलि ठईरना। 25 तेबे पुरोईत आपणी गूठिया साथे पापबलिया रे डांगरो रे खूनो बीचा ते कुछ लई की होमबलिया री बेदिया रे सींगो पाँदे लगाओ ओर तेसरा बाकि बचेया रा खून होमबलिया री बेदिया रे पावे पाँदे लटी देओ। 26 ओर पुरोईत तेसरी सारी चर्बिया खे मेलबलिया री चर्बिया जेड़ी बेदिया पाँदे फूको ओर ईंयाँ पुरोईत तेसरे पापो रिया तँईं प्राश्चित करो, तेबे तेसखे माफ ऊणा। 27 जे इस्राएली लोका बीचा ते कोई अणजाणे रे पाप करो, मतलब कोई एड़ा काम जेतेखे यहोवे ना करी राखी तेस करी की दोषी ओ ओर तेसरा ये पाप तेस सामणे आई जाओ, 28 तो जेबे तेसखे एस पापो रे बारे दे पता लगी जाओ तेबे एस पापो रे बदले एक बिना नुक्शो री बाकरी बलिदानो खे लई आओ; 29 फेर से आपणा आथ पापबलिया रे डांगरो रे सिरो पाँदे राखणे ते बाद जेते जगा रे होमबलिया रा डांगर बलि कित्तेया जाओआ तेते जगा रेई पापबलि डांगरो रा बलिदान करो। 30 ओर पुरोईत तेसा रे खूनो बीचा ते आपणी गूठिया रे कुछ लई की होमबलिया री बेदिया रे सींगो पाँदे लगाओ, फेर तेसा रे बाकि सारे खूनो खे होमबलिया री बेदिया रे पावे पाँदे लटी देओ। 31 ओर से तेसा री सारी चर्बिया खे मेलबलिया रे डांगरो री चर्बिया जेड़ी लग करो, तेबे पुरोईत तिजी खे बेदिया पाँदे यहोवे रिया तँईं सुख देणे वाल़ी खुशबूआ खे फूको ओर ईंयाँ पुरोईत तेसरिया तँईं प्राश्चित करो, तेबे तेसखे माफी मिलणी।

32 जे से पापबलिया खे एक मिन्टू चढ़ाओ, तो से बिना नुक्शो री पेड ऊणी चाईयो, 33 तेबे से आपणा आथ पापबलिया रे डांगरो पाँदे राखो ओर तिजी पापबलिया खे तेथी बलिदान करो जेती होमबलिया रा डांगर बलि करेया जाओआ। 34 तेबे पुरोईत आपणी गूठिया रे पापबलिया रे खूनो बीचा ते कुछ लई की होमबलिया री बेदिया रे सींगो पाँदे लगाओ ओर तेसा रे बाकि बचे रे सारे खूनो खे होमबलिया री बेदिया रे पावे पाँदे लटी देओ। 35 ओर से तेसा री सारी चर्बिया खे मेलबलिया वाल़े मिन्टूए जेड़ी लग करो ओर पुरोईत तिजी खे बेदिया पाँदे यहोवे री नज्जो रिया बलिया पाँदे आगी रे फूको, ईंयाँ पुरोईत तेसरे पापो खे प्राश्चित करो ओर से माफ करेया जाणा।