लेवी बिधान 27

खास मान्नता री बिधि

1 यहोवे मूसे खे बोलेया, 2 "इस्राएलिया खे बोल कि जेबे कोई यहोवे खे केसी माणूंए री खास मान्नत मानो, तो तेसा मान्नती रा मोल ईंयाँ चुकाई कि तेस माणूंए खे छुड़ाई सकोए; 3 जे से माणूं बीई साल या तिजी ते जादा ओर साठ साला ते कम उम्रा रा मर्द ओ, तो तेसरिया तँईं पवित्र जगा रे शेकेल रे मुताबिक चाँदिए रे पंजा सिक्के*27:3 चाँदिए रे पंजा सिक्के मतलब 600 ग्राम चाँदी ठईरो। 4 जे से जवाणस ओ, तो तेसा रिया तँईं तीई शेकेल*27:4 तीई शेकेल मतलब 360 ग्राम चाँदी ठईरो। 5 फेर जे तेसरी उम्र पाँज साला ते जादा ओर बीई साला ते कम ओ, तो माठे खे तो बीई शेकेल, ओर बेटिया खे दस शेकेल ठईरो। 6 जे तेसरी उम्र एक मीन्ना या तिजी ते जादा ओर पाँज साला ते कम ओ, तो माठे खे पाँज ओर बेटिया खे तीन चाँदिए रे सिक्के ठईरो। 7 फेर जे तेसरी उम्र साठ साल या तिजी ते जादा ओ ओर से मर्द ओ तो तेसखे पंद्रा शेकेल ओर जवाणसा खे दस शेकेल ठईरो। 8 पर जे कोई माणूं इतणा गरीब ओ कि पुरोईतो रा ठराए रा दाम नि देई सको, तो से पुरोईतो सामणे खड़ा करेया जाओ ओर पुरोईत तेसरा पैसा ठराओ, मतलब जितणा मान्नत मानणे वाल़े ते ऊई सको, पुरोईत तिजी रे मुताबिक ई ठराओ।"

9 फेर जे किने माणूंए डांगरा री यहोवे खे चढ़ावा चढ़ाणे री मान्नत मानी राखी ओ, तो जो डांगर कोई यहोवे खे देओ, से यहोवे खे पवित्र ठईरना। 10 से तिजी खे किंयाँ पनि बदलो, ना तो से बुरे रे बदले अच्छा ओर ना ई अच्छे रे बदले बुरा देओ ओर जे से तेस डांगरो रे बदले दूजा डांगर देणे री कोशिश करो, तो से दूजा डांगर बी देणा पड़ना कऊँकि से दोनो परमेशरो खे पवित्र ठईरने। 11 ओर जिना डांगरा बीचा ते लोक यहोवे खे चढ़ावा नि चढ़ांदे, एड़ेया बीचे जे से ओ, तो से तेसखे पुरोईतो सामणे खड़ा करी देओ, 12 तेबे पुरोईत तेसरे गुण-अवगुण दुँईं पाँदे बिचार करी की तिजी री कीमत ठराओ; ओर जितणा पुरोईत ठराओ तिजी री कीमत तिथणी ओ। 13 पर जे तेस डांगरो रा मालक तेसखे किंयाँ बी छुड़ाणा चाओ, तो जो कीमत पुरोईते ठराई राखी ऊगी तिदे तिजी रा पाँजुआ इस्सा ओर बढ़ाई ई देओ।

14 फेर जे कोई आपणा कअर यहोवे खे पवित्र करी की मान्नत मानो, तो पुरोईत आई की तेते कअरो री अंदाजे ते कीमत ठराओ ओर जितणा पुरोईत तिजी री कीमत ठराओ तिजी री तिथणी कीमत ठईरो। 15 ओर जे कअरो रा मालक परमेशरो रिया तँईं अर्पण कित्ते रे आपणे कअरो खे छुड़ाणा चाओ, तो जितणा पैसा पुरोईते तिजी री कीमत ठराई राखी, तिदे से पाँजुआ इस्सा ओर बढ़ाई की देओ, तेबे से कअर तेसरा ई रणा।

16 फेर जे कोई आपणी जमीना रा कोई इस्सा यहोवे खे पवित्र करना चाओ, तो तिजी री कीमत तिजी रे मुताबिक ठईरो कि तिदे कितणा बीज पड़ना; मतलब 220 किलो जौ रे बीजो री कीमत पंजा चाँदिए रे सिक्के ऊणे। 17 जे से आपणा डोरू जुबलिया रे सालो रेई पवित्र ठराओ, तो तिजी री कीमत तेरे ठराणे रे मुताबिक ठईरो; 18 ओर जे से आपणा डोरू जुबलिया रे सालो ते बाद परमेशरो खे पवित्र ठराओ, तो जितणे साल दूजी जुबलिया रे सालो रे बाकि रओ, तिना रेई मुताबिक पुरोईत तेसखे पैसे रा साब करो, तेबे जितणा साबो रे आओ तिथणा पुरोईतो रे ठराणे ते कम ओ। 19 ओर जे डोरूए खे परमेशरो खे पवित्र ठराणे वाल़ा तिजी खे छुड़ाणा चाओ, तो जो मोल पुरोईते ठराई राखेया ओ तिदे से पाँजुआ इस्सा ओर बढ़ाई की देओ, तेबे डोरू तेसरा ई रणा। 20 ओर जे से डोरूए खे छुड़ाणा नि चाओ या तिने से दूजे खे बेचीता ओ, तो डोरू बादो ते कदी पनि छुड़ाया जाणा; 21 पर जेबे से डोरू जुबलिया रे सालो रे छूटो, तेबे पूरी रीतिया ते अर्पण कित्ते रे डोरूआ जेड़े यहोवे खे पवित्र ठईरो, मतलब से पुरोईतो री ई आपणी जमीन ऊई जाओ। 22 फेर जे कोई आपणा खरीदे रा डोरू, जो तेसरी आपणी जमीना रे डोरूआ बीचला नि ओ, से यहोवे खे पवित्र ठराओ, 23 तो पुरोईत जुबलिया रे सालो तक रा साब करी की तेस माणूंए खे जितणा ठराओ तिथणा ई से यहोवे खे पवित्र जाणी की तेस ई दिने देई देओ। 24 जुबलिया रे दिने से डोरू तेसरे ई अक्को रे जेसते से खरीदी राखेया था, फेर आई जाओ, मतलब जेसरी से आपणी जमीन ओ तेसरी ई फेर ऊई जाओ। 25 हर एक चीजा री कीमत पवित्र जगा रेई शेकेलो रे साबो ते ठईरो, मतलब चाँदिए रा एक सिक्का बारा ग्रामो रा ऊणा।

26 पर करेलू डांगरो रा पईला बच्चा, जो जेठा ऊणे री बजअ ते यहोवे रा जेठा ठईरी रा, इजी खे तेसखे कोई परमेशरो खे पवित्र नि ठराओ, चाए से बाच्छू ओ, चाए पेडा या बाकरिया रा बच्चा, से यहोवे रा ईए। 27 पर जे से अशुद्ध डांगरो रा ओ, तो तेसरा पवित्र ठराणे वाल़ा तेसखे पुरोईतो री ठराई री कीमता रे मुताबिक तेसरा पाँजुआ इस्सा ओर बढ़ाई की छुड़ाई सकोआ ओर जे से छुड़ाणा नि चाओ, तो पुरोईतो री ठराई री कीमता पाँदे बेचेया जाओ।

28 पर आपणी सारी चीजा बीचा ते जो कुछ कोई यहोवे खे दित्तेया जाओ, चाए से माणूं ओ, चाए डांगर, चाए तेसरी आपणी जमीना रा डोरू ओ, एड़ी कोई अर्पण कित्ती री चीज ना तो बेचणी ओर ना ई छुड़ाणी; जो कुछ अर्पण करेया जाओ से यहोवे खे परम पवित्र ठईरो। 29 माणूंआ बीचा ते जो कोई मौता री सजा खे अर्पण करेया जाओ, से छुड़ाणा नि; से जरूर काया जाओ।

30 फेर जमीना री फसला रा सारा दसुआ इस्सा, चाए से जमीना रा बीज ओ, चाए डाल़ा रा फल, से यहोवे रा ईए; से यहोवे खे पवित्र ठईरो।*27:30 मत्ती 23:23, लूक 11:42 31 जे कोई आपणे दशमांशो बीचा ते कुछ छुड़ाणा चाओ, तो पाँजुआ इस्सा बढ़ाई की तिजी खे छुड़ाओ। 32 ओर गाय-बल़द ओर पेडा-बाकरिया, मतलब जो-जो डांगर गिणने खे डण्डे निठे निकल़ने जोगे ए, तिना रा दशमांश, मतलब दस-दस डांगरो पीछे एक-एक डांगर यहोवे खे पवित्र ठईरो। 33 कोई तेसरे गुण या अवगुणो रे बारे दे नि सोचो ओर ना ई तेसखे बदलो ओर जे कोई तेसखे बदली बी देओ, तो से ओर तेसरा बदला दोनो पवित्र ठईरो; ओर से कदी नि छुड़ाणा।

34 जो आज्ञा यहोवे इस्राएलिया खे सीनै रे पाह्ड़ो पाँदे मूसे खे दित्तिया थिया, सेयो यो ईए।