1 दोषबलिया रे बिधान ये ए। से परम पवित्र ए; 2 जेते जगा दे होमबलिया रे डांगरो खे फाटोए, तेते जगा देई दोषबलिया रा डांगर बी बलि करो ओर पुरोईत तेसरा खून बेदिया रे चऊँ कनारे छिड़को। 3 ओर से तेसरी सारी चर्बिया खे चढ़ाओ, मतलब तेसरी मोटी पूँछा खे, जेते चर्बिया साथे आंजा टखी रिया रओईया से बी, 4 ओर दोनो गुर्दे ओर तिना पाँदली चर्बी जो लको गे रओई ओर गुर्देया समेत कल़ेजे पाँदली झिल्ली, इना सबी खे से लग करी देओ; 5 पुरोईत इना खे बेदिया पाँदे यहोवे खे आगी रे बलि करो, ये दोषबलि ए। 6 पुरोईता रे परिवारो रे सारे लोक तिजी बीचा ते खाई सकोए; से पवित्र जगा रेई खाया जाओ, कऊँकि से बऊत पवित्र ए।*

7 जेड़ी पापबलि ए तेड़ी ई दोषबलि बी ए, तिना दुँईं रा एक ई बिधान ए; जो पुरोईत तिना बलिया खे चढ़ाई की तुसा रिया तँईं प्राश्चित करोआ, सेई तिना चीजा खे लई लो। 8 ओर जो पुरोईत केसी रिया तँईं होमबलिया खे चढ़ाओआ, सेई तेस होमबलिया रे डांगरो री खाल आपू खे राखी सकोआ। 9 ओर तंदूरो रे, कढ़ाईया रे या तवे पाँदे पकाई री सब नज्जो री बलि तेस पुरोईतो री ऊणी जो तिना खे चढ़ाओआ।* 10 ओर सब नज्जो री बलि, चाए सेयो तेलो साथे मिले रे ओ, चाए सूके ओ, सेयो हारूणो रे सबी पाऊआ खे एक बराबर मिलो।

11 जो कोई यहोवे खे मेलबलि चढ़ाणा चाओआ; तिजी रा बिधान ये ए, 12 जे से तेसा बलिया खे तन्यवाद देणे खे चढ़ाणा चाओआ, तो तन्यवादो री बलिया साथे तेलो साथे अभिषेक कित्ते रे बिना सजेड़े रे फुलके ओर तेलो साथे चोपड़ी रिया बिना सजेड़े रिया रोटिया ओर तेलो साथे मिले रे मैदे रे फुलके तेलो साथे तर ऊए रे चढ़ाओ।* 13 ओर से आपणे तन्यवाद वाल़े मेलबलिया साथे सजेड़े रिया रोटिया बी चढ़ाओ। 14 बिना सजेड़े री रोटिया रे तिंऊँ चढ़ावे बीचा ते एक-एक रोटी यहोवे रे सामणे चकणे री पेंट करी की चढ़ाओ; से मेलबलिया रे खूनो खे छिड़कणे वाल़े पुरोईतो रिया ऊणिया।

15 ओर तेस तन्यवाद वाल़े मेलबलिया रा मास बलिदान चढ़ाणे वाल़े दिनो रेई खाणा; तिजी बीचा ते दूजे दिने कुछ बी प्यागा खे नि बचणा चाईयो।* 16 पर जे तेसरे बलिदानो रा चढ़ावा मान्नता रा या आपणी इच्छा रा ओ, तो तेस बलिदानो खे जेस दिने से चढ़ाया जाओगा, तेस ई दिने से खाया जाओ ओर तिजी बीचा ते जो बाकि बचोगा, तिजी खे दूजे दिने बी खाई सकोए। 17 पर जो कुछ बलिदानो रे मासो बीचा ते तीजे दिनो खे बची जाओगा, से आगी रे फूकी देणा। 18 जे मेलबलिया रे मासो बीचा ते कुछ बी तीजे दिने खाओ, तो जो बलि करी राखेया से ग्रहण नि करेया जाणा ओर ना ई तेसरे इतो रे गिणेया जाणा; कऊँकि से अशुद्ध ऊईगा रा ओर जो कोई तिजी बीचा ते खाओगा, तेस तेते पापो रा नतीजा पुगतणा पड़ना।

19 ओर फेर जेते मासो साथे कोई अशुद्ध चीज छवाँई जाओ, तेबे से खाणा नि; से आगी रे फूकी देणा। फेर मेलबलिया रा मास जितणे शुद्ध ओ सेयो ई खाई सकोए, 20 पर जे कोई अशुद्ध ऊई रा माणूं यहोवे खे चढ़ाई री मेलबलिया रे मासो बीचा ते कुछ खाओगा तो से आपणे लोका बीचा ते निकयाल़ी देणा चाईयो। 21 ओर जे कोई अशुद्ध चीजा खे छुँईं की यहोवे रे मेलबलिया रे डांगरो रे मासो बीचा ते खाओगा, तो से बी आपणे लोका बीचा ते निकयाल़ी देणा चाईयो, चाए से माणूंआ री कोई अशुद्ध चीज ओ या अशुद्ध डांगर या कोई बी अशुद्ध या घृणित चीज ओ।

22 तेबे यहोवे मूसे खे बोलेया, 23 "इस्राएलिया खे ईंयाँ बोल कि तुसे ना तो गाय-बल़दा री चर्बी खाणी ओर ना ई मिन्टूआ या बाकरिया री चर्बी खाणी। 24 ओर जो डांगर आपू ई मरी जाओ ओर जो दूजे जंगल़ी जानवरा रे जरीये फाड़ेया जाओ, तेसरी चर्बी ओरी कामो रे इस्तेमाल करी सकोए, पर तुसे तेसरी चर्बी बी खाणी नि। 25 जो कोई एड़े डांगरो री चर्बी खाओगा, जेते बीचा ते लोक कुछ यहोवे रिया तँईं आगी रे बलि चढ़ाया करोए, से खाणे वाल़ा माणूं आपणे लोका बीचा ते निकयाल़ी देणा। 26 ओर तुसे आपणे कअरे केसी बी पंछिये रा या डांगरो रा खून नि खाणा। 27 हर एक प्राणी जो केसी बी पंछिये रा या डांगरो रा खून खाओगा, से आपणे लोका बीचा ते निक्याल़ी देणा।"

28 तेबे यहोवे मूसे खे बोलेया, 29 "तूँ इस्राएली लोका खे ईंयाँ बोल: जो यहोवे खे मेलबलि चढ़ाओगा, से तिजी बीचा तेई यहोवे गे पेंटा खे ल्याओ; 30 से आपणे ई आथो की आगी रे बलि करने खे यहोवे रे सामणे छातिया समेत चर्बिया खे ली आओ, ताकि से छाती ईलाणे री पेंट करी की यहोवे रे सामणे ईलाई जाओ। 31 ओर पुरोईत चर्बिया खे तो बेदिया पाँदे फूको, पर छाती हारूण ओर तेसरे पाऊआ री ऊणी।"

32 फेर तुसे आपणे मेलबलिया रे डांगरो री दाँणी खुटी बी चढ़ावे रे रूपो रे पेंट करी की पुरोईता खे देणी। 33 हारूणो रे पाऊआ बीचा ते जो मेलबलिया रे खून ओर चर्बिया खे चढ़ाओगा, तेस डांगरो री दाँणी खुटी तेसरा इस्सा ऊणी। 34 इस्राएलिया री मेलबलिया बीचा ते ईलाणे री पेंटा री छाती ओर तेसरी खुटी चकणे री पेंटा खे लई की मैं पुरोईत हारूण ओर तेसरे पाऊआ खे देईती, ये सदा खे इस्राएलिया री तरफा ते तिना रा इस्सा बणेया रा रणा।

35 जेस दिने हारूण ओर तेसरे पाऊ यहोवे रे नेड़े पुरोईतो रे पदो खे ल्याए, तेस ई दिने यहोवे खे आगी रे चढ़ाई री बलिया बीचा ते तिना रा येई इस्सा ठराई राखेया; 36 जेस दिने यहोवे हारूण ओर तेसरे पाऊआ रा पुरोईतो रा काम करने खे अभिषेक कित्तेया, तेस ई दिने तिने आज्ञा दित्ती कि इस्राएलिया रिया तरफा ते हमेशा येई इस्सा तिना री आऊणे वाल़ी पीढ़िया-पीढ़िया खे ठराया।* 37 ईंयाँ होमबलि, नज्जो री बलि, पापबलि, दोषबलि, पुरोईता खे ठराई री बलि ओर मेलबलिया रा बिधान येई ए;*

38 जेबे यहोवे सीनै रे पाह्ड़ो गे सुनसाण जगा रे मूसे खे आज्ञा दित्ती कि इस्राएली माखे क्या-क्या चढ़ावे चढ़ाओ, तेबे तिने तिना खे येई व्यवस्था दित्ती थी।