लेवी बिधान 22

चड़त चढ़ाणे री पवित्रता

1 यहोवे मूसे खे बोलेया, 2 "हारूण ओर तेसरे पाऊआ खे बोल कि इस्राएलिया री पवित्र कित्ती रिया चीजा ते जिना खे सेयो माखे पवित्र करोए लग रओ, ओर मेरे पवित्र नाओं खे अपवित्र नि करो; आऊँ यहोवा ए। 3 ओर तिना खे बोल कि तुसा री पीढ़िया-पीढ़िया रे तुसा रे सारे वंशो बीचा ते जो कोई आपणी अशुद्धता रिया दशा रे तिना पवित्र कित्ती रिया चीजा गे जाओ, जिना खे इस्राएली मां यहोवे खे पवित्र मानोए, से माणूं मेरे सामणे ते नाश करेया जाणा; आऊँ यहोवा ए। 4 हारूणो रे वंशो बीचा ते कोई कऊँ नि ओ, चाए कोई कोढ़ी ओ या तेसरे प्रमेह ओ, से माणूं जदुए तक शुद्ध नि ऊई जाओ तदुए तक पवित्र कित्ती रिया चीजा बीचा ते कुछ नि खाओ ओर जो लोथा रिया बजअ ते अशुद्ध ऊई रा ओ, या जेसरा वीर्य छूटी रा ओ, एड़े माणूंए खे जो कोई छूँओ, 5 या जो कोई एड़े लूरने वाल़े जन्तुओ खे छूँओ जेसते लोक अशुद्ध ऊई सकोए, या केसी एड़े माणूंए खे छूँओ जेसरे कोई अशुद्धता ओ जो तेसखे बी लगी सकोई। 6 तो से पुरोईत जो इना बीचा ते केसी खे बी छूँओ साँजा तक अशुद्ध ठईरेया रा रओ ओर जदुए तक पाणिए साथे नि नाओगा, तदुए तक पवित्र चीजा बीचा ते कुछ नि खाओ। 7 तेबे सूरजो रे डूबणे ते बाद से शुद्ध ऊणा ओर तेबे से पवित्र चीजा बीचा ते कुछ खाई सकोआ, कऊँकि तेसरी रोटी सेईए। 8 जो जानवर आपू ई मरीगा ओ या डांगरे खाई राखेया ओ, तेसखे खाई की से आपणे आपू खे अशुद्ध नि करो; आऊँ यहोवा ए। 9 इजी री खातर पुरोईत मेरे सम्बाल़े रे कामा खे जिम्मेदारिया साथे करो, एड़ा नि ओ कि सेयो तिना खे अपवित्र करी की पापो रा बोज चको ओर इजी रिया बजअ ते मरी बी जाओ; आऊँ तिना रा पवित्र करने वाल़ा यहोवा ए।"

पवित्र रोटिया रे निर्देश

10 पुरोईता खे छाडी की इस्राएलो रे पराये कुलो रा माणूं केसी पवित्र चीजा खे नि खाओ, चाए से पुरोईतो रा मईमान ओ चाए मजदूर ओ, तेबे बी से कोई पवित्र चीज नि खाओ। 11 पर जे पुरोईत केसी दासो खे पैसा देई की मोले लई लो या जो पुरोईतो रे कअरे पैदा ऊई रे ओ तो से दास तिजी बीचा ते खाई सकोआ। 12 ओर जे पुरोईतो री बेटी पराये कुलो रे केसी मर्दो साथे ब्यायी राखी ओ, तो से पेंट कित्ती रिया केसी पवित्र चीजा बीचा ते नि खाओ। 13 पर जे पुरोईतो री बेटी बिदुआ या छाडी री ओ ओर तेसा रे ल्वाद नि ओ ओर से आपणे बचपनो जेड़ी रीतिया रे मुताबिक आपणे बाओ रे कअरे रओई, तो से आपणे बाओ री रोटिया बीचा ते खाओ; पर पराये कुलो रा कोई बी तिजी बीचा ते नि खाओ। 14 ओर जे कोई माणूं पुरोईत नि ऊँदे ऊए केसी पवित्र चीजा बीचा ते गल़तिया रे खाई लओ, तो से तिजी रा पाँजुआ इस्सा बढ़ाई की तिजी खे पुरोईतो खे परी देओ। 15 पुरोईत इस्राएलिया री पवित्र कित्ती रिया चीजा खे, जिना खे सेयो यहोवे खे चढ़ाओ, अपवित्र नि करो। 16 पुरोईत तिना खे आपणी पवित्र चीजा बीचा ते अणजाण लोका खे खुल़ाई की तिना खे दोषी नि बणाओ; आऊँ तिना रा पवित्र करने वाल़ा यहोवा ए।

मानणे जोगी डांगरा री बलि

17 यहोवे मूसे खे बोलेया, 18 "हारूण ओर तेसरे पाऊआ खे ओर सारे इस्राएलिया खे समजयाई कि बोल कि इस्राएलो रे कराने या इस्राएलिया बीचे रणे वाल़े परदेशिया बीचे कोई कऊँ नि ओ जो मान्नत या आपणी इच्छा रे मुताबिक बलि करने खे यहोवे खे होमबलि चढ़ाओ, 19 तुसे परमेशरो रिया तँईं ग्रहण करने जोगा बल़दा या मिन्टूआ ओर बाकरिया बीचा ते बिना नुक्शो रा नर चढ़ाणा। 20 जेसरे कोई बी दोष ओ से नि चढ़ाणा; कऊँकि से तुसा रिया तँईं ग्रहण करने जोगा नि ठईरना। 21 ओर जो कोई बल़दा या पेडा-बाकरिया बीचा ते खास चीज संकल्प करने खे या आपणी इच्छा रे मुताबिक बलिया खे यहोवे खे मेलबलि चढ़ाओ, तो ग्रहण करने खे जरूरी ए कि से बिना नुक्शो रा ओ, तेसरे कोई बी दोष नि ओ। 22 जो अन्दा या टूटे रे अंगो रा ओ या तेसरे रसौल़ी या खाज ओ, एड़े यहोवे खे नि चढ़ाणे, सेयो बेदिया पाँदे यहोवे खे आगी रे बलि करी की नि चढ़ाणे। 23 जेस केसी बल़द, पेड या बाकरे रे कोई अंग जादा या कम ओ तेसखे आपणी इच्छा रे मुताबिक बलिया खे चढ़ाई सकोए, पर मान्नता पूरी करने खे से मानणे जोगा नि ऊणा। 24 जेसरे अंड दबे रे, कुचल़े रे, टूटे रे या कटे रे ओ, से यहोवे खे नि चढ़ाणा ओर आपणे प्रदेशो रे बी एड़ा काम नि करना। 25 तुसे केसी परदेसिये ते लई की इना बीचा ते केसी खे तुसे आपणे परमेशरो खे रोटी आगी रे बलि करी की नि चढ़ाणा; कऊँकि तिना रे दोष ओर कलंक ए, इजी री खातर सेयो तुसा रिया तँईं ग्रईण नि ऊणे।"

बलिदानो रिया तँईं ओर नियम

26 यहोवे मूसे खे बोलेया, 27 "जेबे बल़द, मिन्टू या बाकरी पैदा ओ, तो से साता दिना तक आपणी माया साथे रओ; तेबे आठुए दिनो ते बाद से यहोवे खे आगी रे बलि चढ़ाणे खे मानणे जोगा ठईरना। 28 तुसे गाय या पेड या बाकरिया खे तेसा रे बच्चे साथे एक ई दिन बलि नि करना। 29 ओर जेबे तुसे यहोवे खे तन्यवादो रा मेलबलि चढ़ाओ, तेबे तुसे परमेशरो रे दित्ते रे नियमो रे मुताबिक करना ताकि से ग्रहण करने जोगा ठईरो। 30 से चढ़ाई री पेंट तेस ई दिने खाई जाओ, तेते बीचा ते प्यागा खे कुछ नि बचणा चाईयो; आऊँ यहोवा ए।"

31 इजी री खातर तुसे मेरी आज्ञा मानणियां ओर तिना रा पालण करना; आऊँ यहोवा ए। 32 ओर मेरा पवित्र नाओं अपवित्र नि करना, कऊँकि आऊँ इस्राएलिया बीचे जरूर पवित्र मानेया जाणा; आऊँ तुसा रा पवित्र करने वाल़ा यहोवा ए, 33 जो तुसा खे मिस्र प्रदेशो ते निकयाल़ी की ल्याया जेते कि आँऊ तुसा रा परमेशर यहोवा बणेया रा रऊँ।