लेवी बिधान 10

नादाब ओर अबीहूए रा पाप

1 तेबे हारूणो रे दुँईं पाऊए नादाब ओर अबीहूए आपणी-आपणी तंग्यारटी लई ओर तिदे आग परी ओर तिदे तूप पाई की तेते पाँदले इस्से री जेतेरी आज्ञा यहोवे नि दित्ती थी, यहोवे रे सामणे चढ़ाई। 2 तेबे अचाणक यहोवे रे सामणे ते आग निकल़ी ओर सेयो दोनो फूकी की स्वा करीते ओर सेयो यहोवे रे सामणे मरीगे। 3 तेबे मूसे हारूणो खे बोलेया, "ये सेई गल्ल ए जेतेरे बारे दे यहोवे बोलेया था कि जो पुरोईत मां नेड़े आओ तेसखे जरूरी ए कि से माखे पवित्र जाणो ओर सबी लोका सामणे मेरी महिमा करो।" तेबे हारूण चुप रया।

4 तेबे मूसे मीशाएल ओर एलसाफानो खे जो हारूणो रे चाचा उज्जीएलो रे पाऊ थे बुलाई की बोलेया, "तुसे एती आओ ओर आपणे पतिजेया खे पवित्र जगा रे सामणे ते चकी की डेरे ते बारे लई जाओ।" 5 मूसे री एसा आज्ञा रे मुताबिक सेयो नेड़े जाई कि तिना खे तिना रे टाल्लेया ते पकड़ी की चकी की डेरे ते बारे लईगे।

6 तेबे मूसे हारूणो ते ओर तेसरे पाऊ एलीआजार ओर ईतामारो ते बोलेया, "तुसे लोक आपणे सिरो रे बाल़ नि बखेरो ओर ना ई आपणे टाल्ले फाड़ो, एड़ा नि ओ कि तुसे बी मरी जाओ ओर सारी मण्डल़िया पाँदे तेसरा गुस्सा पड़को; पर इस्राएलो रे सारे लोक जो तुसा रे पाईबन्दु ए, जो यहोवे आगी ते नाश करीते थे तिना खे शोग करो। 7 ओर तुसे मिलणे वाल़े तम्बूए रे द्धारो ते बारे नि जाएयो, एड़ा नि ओ कि तुसे मरी जाओ; कऊँकि यहोवे रे अभिषेको रा तेल तुसा पाँदे लगी रा।" मूसे रे एते वचनो रे मुताबिक तिने कित्तेया।

पुरोईता खे ठराए रे नियम

8 तेबे यहोवे हारूणो खे बोलेया, 9 "जेबे-जेबे तूँ या तेरे पाऊ मिलणे वाल़े तम्बूए रे आओ तेबे-तेबे तुसा बीचे ना तो कोई अंगूरा रा रस पिये रा ऊणा चाईयो ओर ना ई कोई नशा, केथी एड़ा नि ओ कि तुसे मरी जाओ; तुसा री आऊणे वाल़ी पीढ़िया-पीढ़िया तक ये रवाज चलदी रओ, 10 ताकि तुसे पवित्र ओर अपवित्र ओर शुद्ध ओर अशुद्धो रे फर्क करी सको; 11 ताकि तुसे इस्राएलिया खे तिना सबी बिदिया खे सिखाई सको, जो यहोवे मूसा रे जरीये तिना खे बताईया थिया।"

12 फेर मूसे हारूण ओर तेसरे बचे रे दोनो पाऊ ईतामार ओर एलीआजारो खे बी बोलेया, "यहोवे रे सामणे आगी बीचे चढ़ाई री बलिया बीचा ते जो नज्जो री बलि बची री तिजी खे लई की बेदिया गे बिना सजेड़े री खाओ, कऊँकि से परम पवित्र ए; 13 ओर तुसे तिजी खे केथी पवित्र जगा रे खाओ, कऊँकि जो कुछ लोक यहोवे खे आगी रे बलि करोए तिदे तेरा ओर तेरे पाऊआ रा इस्सा ओआ; कऊँकि माखे एड़ी ई आज्ञा मिली री। 14 तेबे ईलाई री पेंटा री छाती ओर चकी री पेंटा री खूट्टी तुसे लोक, मतलब तूँ ओर तेरे माठे-बेटिया सारे केथी शुद्ध जगा रे खाओ; कऊँकि से इस्राएलिया री मेलबलिया बीचे तेरा ओर तेरे बच्चेया रा अक्क ठराईती री। 15 चर्बी जो आगी रे चढ़ाई री बलिया समेत जो चकी री खूट्टी ओर छातिया री पेंट यहोवे रे सामणे ईलाणे खे आया करनी, ये इस्सा यहोवे री आज्ञा रे मुताबिक सदा खे तेरे ओर तेरे बच्चेया खे ए।"

16 जेबे मूसे पापबलिया रे बाकरे रे बारे दे पूछ-ताछ कित्ती तेबे तेसखे पता लगेया कि से फूकी ता रा, तेबे हारूणो रे बाकि बचे रे पाऊ एलीआजार ओर ईतामारो पाँदे से गुस्से ऊई की बोलणे लगेया, 17 "तुसे पापबलिया रा मास पवित्र जगा रे कऊँ नि खाया से तो परम पवित्र ए ओर जो यहोवे तुसा खे इजी खे दित्तेया था कि तुसे मण्डल़िया रे पापो री जिम्मेबारी आपू पाँदे लई की, तिना रिया तँईं यहोवे रे सामणे प्राश्चित करो? 18 देखो, तेसरा खून तो पवित्र जगा रे पीतरे तो ल्याया नि, जरूरी था कि तुसे मेरी आज्ञा रे मुताबिक तेसरे मासो खे पवित्र जगा रे खांदे।"

19 इजी रा जबाब हारूणे मूसे खे ईंयाँ दित्तेया, "देख, आज ई तिने आपणे पापबलि ओर होमबलि यहोवे रे सामणे चढ़ाए; पर मां पाँदे एड़िया मुसीबता आईया! इजी री खातर आऊँ आज पापबलिया रा मास खांदा तो क्या ये गल्ल यहोवे रे सामणे खरी ऊणी थी?" 20 जेबे मूसे हारूणो रिया ये गल्ला सुणिया तेबे तेसखे सन्तुष्टि ऊईगी।