लेवी बिधान 11

शुद्ध ओर अशुद्ध तरतिया रे डांगर

1 तेबे यहोवे मूसा ओर हारूणो खे बोलेया, 2 "इस्राएलिया खे बोल कि जितणे डांगर तरतिया पाँदे ए, तिना सबी बीचा ते तुसे इना जिऊँदे डांगरा रा मास खाई सकोए।*11:2 इब्रानी 9:10 3 एड़े डांगरा बीचा ते जितणे चिरे या फटे रे खुरो वाल़े ओए ओर जग्याल़ करोए, तिना खे खाई सकोए। 4 पर जग्याल़ करने वाल़े या फटे रे खुरो वाल़ेया बीचा ते यो डांगर नि खाणे, मतलब ऊँट, जो जग्याल़ तो करोआ, पर तेसरे चिरे रे खुर नि ऊँदे, इजी री खातर तुसा खे से अशुद्ध ठईरी रा।"

5 ओर चट्टानी बिज्जू, जो जग्याल़ तो करोआ, पर तेसरे खुर चिरे रे नि ऊँदे, इजी खे से बी तुसा खे अशुद्ध ए।

6 ओर खरगोश, जो जग्याल़ तो करोआ, पर तेसरे खुर चिरे रे नि ऊँदे, इजी री खातर से बी तुसा खे अशुद्ध ए। 7 ओर सूंअर, जो चिरे रे खुरो वाल़ा तो ओआ, पर जग्याल़ नि करदा, इजी री खातर से तुसा खे अशुद्ध ए। 8 तुसे इना रे मासो बीचा ते कुछ नि खाणा, इतणा ई नि इना री लोथ छूणी पनि, यो तो तुसा खे अशुद्ध ए।

शुद्ध ओर अशुद्ध पाणिए रे जीव

9 फेर जितणे पाणिए बीचले जीव ए तिना बीचा ते तुसे इना खे खाई सकोए, मतलब समुद्र या नदिया रे पाणिए रे जन्तुआ बीचा ते जितणेया रे पंख ओर चोंयेटे ओई तिना खे खाई सकोए। 10 पर बड़े चूण्डा रे रणे वाल़े पाणिए बीचले जितणे जीव बिना पंख ओर चोंयेटा ते समुद्र या नदिया रे रओए, सेयो सब तुसा खे घृणित ए। 11 सेयो तुसा खे घृणित ठईरो, तुसा तिना रे मासो बीचा ते कुछ नि खाणा ओर तिना री लोथा ते घृणा करनी। 12 पाणिए रे जेस केसी जन्तुओ रे पंख या चोंयेट नि ऊँदे सेयो तुसा खे अशुद्ध ए।

अशुद्ध पंछी

13 फेर पंछिया बीचा ते यो अशुद्ध जाणने, यो अशुद्ध ऊणे रिया बजअ ते खाए नि जाओ, मतलब उकाब, हड़फोड़, कुरर, 14 ईल ओर कई किस्मा रे बाज, 15 ओर कई किस्मा रे सारे काओ, 16 शुतुरमुर्ग, तखमास, जलकुक्कट ओर कईया किस्मा रे बाज, बड़ा उल्लू, 17 हाड़गील, छोटा उल्लू, 18 राजहँस, धनेश, गिद्ध, 19 सारस, कई किस्मा रे बगुले, कक्राख ओर चमगादड़।

शुद्ध ओर अशुद्ध कीड़े

20 जितणे पंखो वाल़े कीड़े चऊँ पैरा रे पारे चलोए, सेयो सब तुसा खे अशुद्ध ए। 21 पर लूरने वाल़े ओर पंख वाल़े जो चऊँ पैरा रे पारे चलोए, जिना रे तरतिया पाँदे उटकणे खे खुटिया ओईया तिना जीव-जन्तुआ खे तो खाई सकोए। 22 ओर सेयो यो ए, मतलब कईया किस्मा रिया टिड्डिया, कई प्रकारा रे पतंगे, कईया प्रकारा रे चींगर ओर कईया प्रकारा रे टिड्डे। 23 पर बाकि सब पंखा वाल़े कीड़े जो चऊँ पैरा वाल़े ओए, सेयो तुसा खे अशुद्ध ए।

मरे रे डांगरो खे छूणे ते बाद शुद्ध ऊणा

24 कऊँकि इना रिया बजअ ते तुसे अशुद्ध ऊई सकोए; जो कोई इना रिया लोथा साथे छवाँई जाओगा, से साँजा तक अशुद्ध रणा। 25 ओर जो कोई इना रिया लोथा बीचा ते कुछ बी चकोगा, से आपणे टाल्ले तोई लो ओर साँजा तक अशुद्ध रओ।*11:25 इब्रानी 9:10 26 ओर जितणे डांगर चिरे रे खुरो वाल़े ओए, ओर ना जग्याल़ करने वाल़े ए, सेयो तुसा खे अशुद्ध ए, जो कोई इना खे छूँओगा, से अशुद्ध ठईरना। 27 ओर चऊँ पैरा रे पारे चलणे वाल़ेया जानवरा बीचा ते जितणे पंजेया रे पारे चलोए, सेयो सब तुसा खे अशुद्ध ए; जो कोई इना री लोथ छूँओगा, से साँजा तक अशुद्ध ठईरना। 28 जो कोई इना री लोथ चकोगा, से आपणे टाल्ले तोई लो ओर साँजा तक अशुद्ध रओ, कऊँकि सेयो तुसा खे अशुद्ध ए।

29 ओर जो तरतिया पाँदे लूरोए तिना बीचा ते यो लूरने वाल़े तुसा खे अशुद्ध ए, मतलब नेऊल़ा, चूआ, कई किस्मा रिया गोई, 30 ओर कंदाकड़ी, मगरमच्छ, टिकटिक, सांडा ओर गिरगिट। 31 सबी लूरने वाल़ेया बीचा ते येई तुसा खे अशुद्ध ए, जो कोई इना मरे रेया खे छूँओगा, से साँजा तक अशुद्ध ठईरना। 32 ओर इना बीचा ते केसी री लोथ जेस केसी चीजा पाँदे पड़ी जाओ, से बी अशुद्ध ठईरो, चाए से लकड़िया रा कोई पांडा ओ, चाए टाल्ले, चाए खाल, चाए बोरा, चाए केसी बी कामो रा केड़ा बी पांडा कऊँ नि ओ, तिजी खे पाणिए रे पाओ ओर से साँजा तक अशुद्ध रओ, तिजी ते बाद तिजी खे कामो रे ल्याई सकोए, तेबे शुद्ध समजेया जाणा।

33 ओर जे माट्टिया रा कोई पांडा ओ जिदे इना जन्तुआ बीचा ते कोई पड़ी जाओ, तो तेते पांडे रे जो कुछ बी चीज ओ, से अशुद्ध ठईरो। तुसे से पांडा तोड़ी देणा। 34 तिदे जो खाणे जोगी रोटी ए, जो पाणिए साथे बणाई री ओ, से सब अशुद्ध ठईरो; फेर एड़े पांडेया रे पीणे खे कुछ ओ तो से बी अशुद्ध ठईरो। 35 जे केसी बी चीजा पाँदे इना री लोथा रा कुछ बी इस्सा पड़ी जाओ तो से बी अशुद्ध ऊई जाणी; तेबे से चाए तंदूर ओ या चूल, से तोड़ी देणा, कऊँकि से अशुद्ध ऊई जाणा, से तुसा खे बी अशुद्ध ठईरो। 36 पर फेर बी सूबल़ या खाल़ जिदे पाणी कट्ठा ओ, से तो शुद्ध ई रणे; पर जो कोई इना रिया लोथा खे इना बीचा ते निकयाल़ने खे आथ लगाओगा, से अशुद्ध रणा। 37 ओर जे इना रिया लोथा बीचा ते कुछ केड़े बी बीजो पाँदे जो बाणे खे राखी राखे ओ तिजी पाँदे पड़ो, तो से बीज शुद्ध रणा; 38 पर जे बीजो पाँदे पाणी पाई राखेया ओ ओर बादो ते लोथा बीचा ते कुछ तिदे पड़ी जाओ, तो से तुसा खे अशुद्ध ठईरो।

39 फेर जिना डांगरा खे खाणे री आज्ञा तुसा खे देई राखी जे तिना बीचा ते कोई डांगर मरी जाओ, तो जो कोई तेसरी लोथ छूँओगा से साँजा तक अशुद्ध रओ। 40 जे कोई तेसरी लोथा बीचा ते जो कुछ खाओ से आपणे टाल्ले तोई लो ओर से साँजा तक अशुद्ध रणा ओर जो कोई तेसरी लोथ चको, से बी आपणे टाल्ले तोई लो ओर साँजा तक अशुद्ध रओ।

अशुद्ध लूरने वाल़े जीव

41 सब प्रकारा रे तरतिया पाँदे लूरने वाल़े जन्तु घृणित ए; सेयो खाणे नि चाईयो। 42 तरतिया पाँदे सब लूरने वाल़ेया बीचा ते जितणे पेट या चऊँ पैरा रे पारे चलोए या जादा पैर वाल़े ओए, तुसे सेयो नि खाणे, कऊँकि सेयो घृणित जीव ए। 43 तुसे केसी बी प्रकारा रे लूरने वाल़े जन्तुआ रे जरीये आपणे आपू खे अशुद्ध नि करना ओर ना ई तिना रे जरीये आपू खे अशुद्ध करी की अपवित्र ठराणा। 44 कऊँकि आऊँ तुसा रा परमेशर यहोवा ए; इजी बजअ ते आपू खे शुद्ध करी की पवित्र बणे रे रओ, कऊँकि आऊँ पवित्र ए। इजी बजअ ते तुसे केसी लूरने वाल़े जन्तुआ रे जरीये, जो तरतिया पाँदे चलोआ आपणे आपू खे अशुद्ध नि करना।*11:44 1 पत 1:16 45 कऊँकि आऊँ से यहोवा ए जो तुसा खे मिस्र प्रदेशो ते इजी खे निकयाल़ी की ल्याई राखेया, ताकि तुसा रा परमेशर ठईरूँ; इजी री खातर तुसे पवित्र बणो, कऊँकि आऊँ पवित्र ए।

46 ये डांगर, पंछी, ओर सबी पाणिए बीचले जीव ओर तरतिया पाँदे सब लूरने वाल़े जन्तुआ रे बारे दे येई बिधान ए, 47 कि शुद्ध, अशुद्ध ओर खाणे जोगे ओर ना खाणे जोगे जिऊँदे प्राणिया बीचे फर्क करेया जाओ।