1 तेबे यहोवे मूसे खे बोलेया, 2 "इस्राएलिया खे बोल कि आऊँ तुसा रा परमेशर यहोवा ए। 3 तुसे मिस्र प्रदेशो री रवाजा रे मुताबिक जेड़े काम, जिदे तुसे रओ थे, सेयो नि करने; ओर कनान प्रदेशो रे जेड़े काम बी, जेती आऊँ तुसा खे निणे लगी रा, नि करने; ओर ना ई तिना देशा रिया रवाजा पाँदे चलणा। 4 मेरे ई नियम मानणे, ओर मेरी ई रवाजा खे मानदे ऊए तिना पाँदे चलणा। आऊँ तुसा रा परमेशर यहोवा ए। 5 इजी री खातर तुसे मेरे नियम ओर रवाजा खे हमेशा मानेयो; जो माणूं तिना खे मानो से तिना री बजअ ते जिऊँदा रणा। आऊँ तुसा रा यहोवा ए।"*

6 तुसा बीचा ते कोई आपणे नेड़े रे टब्बरो री जवाणसा री इज्जत नि लूटो। आऊँ तुसा रा यहोवा ए। 7 आपणी माया री इज्जत नि लुटणी, जो तुसा रे बाओ री इज्जत ए, से तो तुसा री आम्मा ए, इजी री खातर तुसे तेसा री इज्जत नि लुटणी। 8 आपणी सौतेली माया री इज्जत नि लुटणी; कऊँकि से तो तुसा रे बाओ री ई इज्जत ए।* 9 आपणी बईण चाए सक्की ओ चाए सौतेली ओ, चाए से कअरे पैदा ऊई ओ, चाए बारे, तेसा री इज्जत नि लुटणी। 10 आपणी पोती या आपणी दोईतिया री इज्जत नि लुटणी, तिना रा शरीर तो समजो तुसा रा ईए। 11 तुसा री सौतेली बईण जो तुसा रे बाओ ते पैदा ऊई, से तुसा री बईण ए, इजी बजअ ते तेसा री इज्जत नि लुटणी। 12 आपणी बुआ री इज्जत नि लुटणी; से तो तुसा रे बाओ री बईण ए। 13 आपणी मासिया री इज्जत नि लुटणी; कऊँकि से तुसा री माया री बईण ए। 14 आपणी चाचिया री इज्जत नि लुटणी, कऊँकि से तेरे चाचे री लाड़ी ए। 15 आपणियां बऊआ री इज्जत नि लुटणी से तो तुसा रे माठे री लाड़ी ए, इजी बजअ ते तुसे तेसा री इज्जत नि लुटणी। 16 आपणी पाबिया री इज्जत नि लुटणी; से तो तुसा रे पाईए री ई इज्जत ए।* 17 केसी जवाणसा री ओर तेसा री बेटी दुँईं री इज्जत नि लुटणी, ओर तेसा री पोतिया खे या दोईतिया खे आपणी लाड़ी बणाई की तेसा री इज्जत नि लुटणी; सेयो तो नेड़ो रे टब्बरो रिया ए; एड़ा करना महापाप ए। 18 ओर आपणी लाड़िया री बईणा खे बी आपणी लाड़ी बणाई की तेसा री सऊकण नि बनाणा कि पईलकिया रे जिऊँदे रंदे ऊए तेसा री बी इज्जत लूटो।

19 फेर जेबे कोई जवाणस छूणे बैठणे रिया री बजअ ते अशुद्ध रओ, तदुए तक तेसा साथे सम्बन्द नि बनाणा। 20 फेर आपणे पड़ोसो री जवाणसा साथे शारीरिक सम्बन्द बणाई की अशुद्ध नि ऊणा। 21 आपणी ल्वादा बीचा ते केसी खे बी मोलेको खे अवन करी की नि चढ़ाणा, ओर ना ई आपणे परमेशरो रा नाओं अपवित्र ठराणा; आऊँ यहोवा ए। 22 जवाणसा साथे शारीरिक सम्बन्द बनाणे जेड़े कोई मर्द केसी बी मर्दो साथे शारीरिक सम्बन्द नि बणाओ; से तो नीच काम ए।* 23 केसी बी जातिया रे डांगरो साथे शारीरिक सम्बन्द बणाई की अशुद्ध नि ऊणा ओर ना ई कोई जवाणस डांगरो सामणे इजी खे खड़ी ओ कि तेस साथे गल़त काम करो; ये तो बऊत ई दुष्टता री गल्ल ए।

24 एड़ा काम करी की अशुद्ध नि ऊणा, कऊँकि इना कामा खे करी की देशा री जातिये जिना खे आऊँ तुसा रे सामणे ते निकयाल़ने वाल़ा ए आपू खे अशुद्ध कित्तेया; 25 ओर तिना रा देश बी अशुद्ध ऊईगा रा, इजी बजअ ते आऊँ तेस पाँदे तेसरे बुरे कामो री सजा देऊँआ ओर से देश आपणे रणे वाल़ेया खे निकयाल़ी देओआ। 26 इजी बजअ ते तुसे लोक मेरी रवाज ओर मेरे नियम सदा मानणे, ओर चाए तुसा बीचला कोई देसी ओ, चाए तुसा बीचे रणे वाल़ा परदेशी ओ, तुसा बीचा ते कोई बी एड़ा नीच काम नि करो; 27 कऊँकि एड़े सारे नीच काम तेते जगा रे माणूं जो तुसा ते पईले तिदे रओ थे, सेयो करो थे, इजी तेई से देश अशुद्ध ऊईगा। 28 एबे एड़ा नि ओ कि जिंयाँ जेते प्रदेशो रिया जातिया तुसा ते पईले तेते प्रदेशो रे रओ थिया, से तिने निकयाल़ी तिया, तिंयाँ ई जेबे तुसे तिजी खे अशुद्ध करो, तेबे से तुसा खे बी निकयाल़ी देओ। 29 जितणे एड़ा कोई बी नीच काम करो सेयो सारे प्राणी आपणे लोका बीचा ते नाश करे जाणे। 30 ये आज्ञा जो मैं तुसा खे मानणे खे देई राखी, से तुसे मानणी, ओर जो बुरी रवाजा तुसा ते पईले चलदिया आई रिया, तिना बीचा ते केसी पाँदे नि चलणा, ओर ना ई तिना रिया बजअ ते अशुद्ध ऊणा। आऊँ तुसा रा परमेशर यहोवा ए।