1 तुसे आपू खे मूर्तिया नि बनाणियां, ना कोई खणी री मूर्ति आपू खे खड़ी करनी ओर ना आपणे प्रदेशो रे माथा टेकणे खे कड़े रे पात्थर राखणे; कऊँकि आऊँ तुसा रा परमेशर यहोवा ए। 2 तुसे मेरे रामो रे दिना खे मानेया करना ओर मेरी पवित्र जगा रा डर मानणा; आँऊ यहोवा ए।

3 जे तुसे मेरी दित्ती री रवाजा पाँदे चलो ओर मेरी आज्ञा खे मानी की तिना रा पालण करो, 4 तो मां तुसा खे बखतो-बखतो पाँदे बर्खा करनी, ओर जमीना आपणी फसल पैदा करनी, ओर मैदानो रे डाल़ा आपणे-आपणे फल़ देया करने; 5 एथो तक कि तुसा अंगूर तोड़ने रे बखतो रे बी बांदे रणा, ओर बाणे रे बखते बी पेट परी की अंगूर तोड़दे रणे, ओर तुसा मनमानी रोटी खाया करनी, ओर आपणे प्रदेशो रे बिना डरे रे बसे रे रणे। 6 ओर मां तुसा रे प्रदेशो रे शान्ति देणी, कि तुसे सऊणे ओर तुसा खे कोई डराणे वाल़ा नि ऊणा; कऊँकि मां तुसा रे प्रदेशो ते जंगल़ी जानवर निकयाल़ी देणे ओर तुसा रे प्रदेशो रे लड़ाई-चगड़े नि ऊणे देणे। 7 ओर तुसा आपणे दुश्मणा रा पीछा करी की सेयो काई देणे ओर सेयो तुसा री तलवारी साथे मारे जाणे। 8 तुसा बीचे पाँज माणूंआ सौ जणे ओर सौ माणूंआ दस ह्जार नठाणे ओर तुसा रे दुश्मण तलवारी साथे तुसा ते आगे-आगे मारे जाणे; 9 ओर मां तुसा रिया तरफा खे कृपा-दुष्टि राखणी ओर तुसे फलवंत करने ओर बढ़ाणे ओर तुसा साथे आपणी वाचा पूरी करनी। 10 तुसा राखेया रा पुराणा नज्ज खाणा ओर नया नज्ज राखणे रिया तँईं पुराणा निकयाल़ना। 11 ओर मां तुसा बीचे आपणे रणे री जगा बणाई री राखणी ओर मां तुसा ते नफरत नि करनी। 12 ओर मां तुसा बीचे चलेया-फिरेया करना ओर आँऊ तुसा रा परमेशर बणेया रा रणा ओर तुसे मेरी प्रजा बणी री रणी।* 13 आऊँ तुसा रा से परमेशर यहोवा ए, जो तुसा खे मिस्र प्रदेशो ते इजी खे निकयाल़ी की ल्याया कि तुसे मिस्रिया रे दास बणे रे नि रओ ओर मैं तुसा रा जूँगड़ा तोड़ी ता ओर तुसे सिर खड़ा करी की चलाई राखे।

14 यहोवे ये बी बोलेया, "जे तुसे मेरी नि सुणोगे ओर इना सबी आज्ञा खे नि मानोगे, 15 ओर जे तुसे मेरी रवाजा खे तुच्छ समजी की जाणोगे ओर तुसा री आत्मा मेरे फैंसले ते नफरत करो ओर तुसे मेरी सबी आज्ञा रा पालण नि करो, बल्कि मेरी वाचा खे तोड़ोगे, 16 तो मां तुसा साथे ये करना; मतलब मां तुसे बेचैन करने, क्षयरोग ओर बुखारो साथे पीड़ा देणी ओर इना रिया बजअ ते तुसा रिया आखी तुँदल़िया ऊई जाणिया ओर तुसा रा मन बऊत उदास ऊणा। तुसा रा बेजा बाणा बेकार ऊणा, कऊँकि तुसा रे दुश्मणा तिजी री फसल खाई लणी; 17 ओर मां बी तुसा रे खलाफ ऊई जाणा ओर तुसे आपणे दुश्मणा ते आरी जाणे; तुसा रे बैरिया तुसा पाँदे अक्क करना, एथो तक कि जेबे कोई तुसा खे नठाओगा पनि, तेबे बी तुसे नठणे। 18 ओर जे तुसे इना मुसीबता ऊणे ते बाद बी मेरी नि सुणोगे, तो मां तुसा रे पापो रिया बजअ ते तुसा खे सातगुणा ओर सजा देणी। 19 ओर मां तुसा रिया तागती रा कमण्ड तोड़ी देणा ओर तुसा खे सर्ग मानो लोए जेड़ा सख्त ओर जमीन मानो पीतल़ी जेड़ी सख्त बणाई देणी ओर बरखा नि ऊणी। 20 ईंयाँ तुसा री पूरी तागत बिना मतलबो ते जांदी रणी, कऊँकि तुसा री जमीना आपणी फसल नि देणी ओर मैदानो रे डाल़ा आपणे फल़ नि देणे।"

21 जे तुसे मेरे खलाफ चलदे ई रओ ओर मेरा कईणा नि मानो, तो मां तुसा रे पापो रे मुताबिक तुसा पाँदे सातगुणा ओर मुसीबत पाणी। 22 मां तुसा बीचे बणो रे डांगर पेजणे, ओर तिना तुसा रे बच्चे तुसा गे ते चकी की लई जाणे, ओर तुसा रे करेलू डांगर नाश करी देणे ओर तुसा री गिणती कटाई देणी, जेते कि तुसा रिया सड़का सूनिया पड़ी जाणिया।

23 तेबे बी जे तुसे इना सबी गल्ला ते बाद बी मेरी ताड़ना ते नि सुदरे ओर मेरे खलाफ चलदे ई रये, 24 तो मां बी तुसा रे खलाफ चलणा ओर तुसा रे पापो रिया बजअ ते मां तुसा खे सातगुणा दुख देणा। 25 ओर मां तुसा पाँदे एक एड़ी तलवार चलाणी, जेसा वाचा तोड़ने रा पूरा-पूरा बदला लणा ओर जेबे तुसे आपणे शईरो रे जाई-जाई की कट्ठे ऊणे, तेबे मां तुसा बीचे बमारी फैलाणी ओर तुसे तुसा रे दुश्मणा रे वशो रे करी देणे। 26 जेबे मां तुसा रा नज्जो रा सादन दूर करी देणा, तेबे दस जवाणसा तुसा री रोटी एक ई तंदूरो रे पकाई की तोली-तोली की बांडणी; ओर तुसे खाई की पनि रज्जणे।

27 फेर जे तुसे इजी ते बाद बी मेरी नि सुणोगे ओर मेरे खलाफ चलदे ई रओगे, 28 तो मां आपणे न्याय रे तुसा रे खलाफ चलणा ओर तुसा रे पापो रिया बजअ ते तुसा खे सातगुणा ताड़ना ओर बी देणी। 29 ओर तुसा खे इतणा काल़ पड़ना कि तुसा आपणे माठे-बेटिया रा मास खाणा पड़ना। 30 ओर मां तुसा री पूजा रिया ऊच्चिया जगा टाल़ी देणियां ओर तुसा रे सूरजो रिया मूर्तिया तोड़ी देणियां ओर तुसा रिया लोथा तुसा री तोड़ी रिया मूर्तिया पाँदे सेटी देणियां; ओर मेरी आत्मा खे तुसा ते नफरत ऊई जाणी। 31 ओर मां तुसा रे शईर उजाड़ी देणे, ओर तुसा रिया पवित्र जगा बी उजाड़ी देणियां ओर तुसा री सुख देणे वाल़ी खुशबू ग्रहण नि करनी। 32 ओर मां तुसा रा देश सूना करी देणा ताकि तुसा रे दुश्मण जो तिदे रओए, सेयो इना गल्ला रिया बजअ ते हैरान ऊई जाओ। 33 ओर मां तुसे प्रदेशो री जातिया बीचे तित्तर-बित्तर करी देणे ओर तुसा पीछे-पीछे तलवार खींजी की राखणी; तेबे तुसा रा देश सूना ऊई जाणा ओर तुसा रे शईर ऊजड़ी जाणे।

34 तेबे जितणे दिना तक से देश सूना पड़ेया रा रणा ओर तुसे आपणे दुश्मणा रे प्रदेशो रे रणे, तिथणे ई दिन से देश आपणे रामो रे दिन मानदा रणा। तेबेई तेस प्रदेशो खे राम मिलणा, मतलब आपणे रामो रे दिन मानदे रणा। 35 जितणे दिन से सूना पड़ेया रा रणा, तिथणे ई दिन तेसखे राम रणा, मतलब जो राम तेसखे तुसा रे तेती बसणे रे बखते, तुसा रे रामो रे दिना रे नि मिलेया ऊणा, से तेसखे तेबे मिलणा। 36 ओर तुसा बीचा ते जो बचे रे रणे तिना खे मां एड़ा करना कि सेयो आपणे दुश्मणा रे प्रदेशो रे ऊणे, तिना रे दिलो रे मां डर पैदा करना ओर सेयो पत्ते रे ईलणे ते बी नठी जाणे ओर सेयो एड़े नठणे जेड़े तलवारी ते नठे ओर केसी रे बिना पीछा कित्ते बी सेयो रूड़ी जाणे। 37 जेबे कोई पीछा करने वाल़ा नि ओ तेबे बी मानो तलवारी रे डरो ते सेयो एकी-दूजे साथे बजकदे ऊए रूड़दे रणे, ईंयाँ तुसा रे आपणे दुश्मणा रे सामणे ठईरने री ईम्मत नि ऊणी। 38 तेबे तुसे प्रदेशो री जातिया-जातिया बीचे पऊँची की नाश ऊई जाणे ओर तुसा रे दुश्मणा रे प्रदेशो रे लोका तुसे खाई देणे। 39 ओर तुसा बीचा ते जो बचे रे रणे सेयो आपणे दुश्मणा रे प्रदेशो रे आपणे बुरे कामो रिया बजअ ते गल़ी जाणे; ओर आपणे बुजुर्गा रे पापो रिया बजअ ते बी सेयो तिना जेड़े ई गल़ी जाणे।

40 पर जे सेयो आपणे ओर आपणे पितरा रे पाप मानी लओगे, मतलब से तोखा जो तिने मेरे खलाफ करी राखेया ओर ये बी मानी लो कि आसे यहोवे रे खलाफ चले थे, 41 जेते री बजअ ते आँऊ तिना रे खलाफ चलेया था ओर आँऊ तिना खे तिना रे दुश्मणा रे प्रदेशो रे लई आई रा; जदुओ तक सेयो आपणे सख्त दिलो खे नरम नि करी देंदे ओर आपणे पापो रिया सजा खे मानी लओगे,* 42 तेबे जो वाचा मैं याकूबो साथे बानी थी ओर जो वाचा मैं इसहाक ओर अब्राहमो साथे बानी थी से बी मां याद करनी ओर ये देश बी मां याद करना। 43 पर से देश तिना ते बिना सूना पड़ेया रा रणा ओर तिना ते बिना सूना रंदे ऊए बी रामो रा बखत मानदे रणा; तिना लोका मेरी आज्ञा नि मानी कि मेरी रवाजा ते नफरत करनी ओर इजी बजअ ते तिना आपणे पापो री सजा पुगतणी। 44 इतणा ऊणे ते बाद बी जेबे सेयो आपणे दुश्मणा रे प्रदेशो रे ऊणे, तेबे मां सेयो ईंयाँ नि छाडणे, ओर ना ई तिना ते एड़ी नफरत करनी कि तिना रा सर्वनाश करुँ ओर आपणी तेसा वाचा खे तोड़ी देऊँ जो मैं तिना साथे बानी थी; कऊँकि आऊँ तिना रा परमेशर यहोवा ए; 45 पर मां तिना री पलाईया खे तिना रे पितरा ते बानी री वाचा याद करनी जिना खे आऊँ दूजी जातिया री आखी रे सामणे मिस्र प्रदेशो ते निकयाल़ी की ल्याया कि आऊँ तिना रा परमेशर ठईरूँ; आऊँ यहोवा ए।

46 जो-जो बिदिया ओर नियम ओर व्यवस्था यहोवे आपणी तरफा ते इस्राएलिया खे सीनै रे पाह्ड़ो पाँदे मूसे रे जरीये ठराईया थिया सेयो यो ईए।