गिणती 1

इस्राएलिया री पईली गिणती

1 इस्राएलिया रा मिस्र देशो ते निकल़ने रे दूजे सालो रे दूजे मीन्ने रे पईले दिने, यहोवे सीनै री सुनसाण जगा दे रंदे बखते मिलणे वाल़े तम्बूए दे, मूसे खे बोलेया, 2 "इस्राएलिया री सारी मण्डल़िया रे कुलो ओर पितरा रे कराने रे मुताबिक, एक-एक मर्दा री गिणती नाओं लई-लई की करना। 3 जितणे इस्राएली 20 या तिजी ते ज्यादा उम्रा रे जो युद्ध करने जोगे ओ, तिना सबी खे तिना रे चूण्डो रे मुताबिक तैं ओर हारूणे गिणी लणे। 4 हर एक गोत्रो रा एक-एक मर्द जो आपणे पितरा रे कराने रा खास मर्द ओ से बी तुसा साथे रओ। 5 जिना माणूंआ तेरी ओर हारूणो री मताद करनी तिना रे नाओं ये ए, रूबेनो रे गोत्रो बीचा ते शदेऊरो रा पाऊ एलीसूर; 6 शिमोनो रे गोत्रो बीचा ते सुरीशद्दै रा पाऊ शलूमीएल; 7 यहूदा रे गोत्रो बीचा ते अम्मीनादाबो रा पाऊ नहशोन; 8 इस्साकारो रे गोत्रो बीचा ते सूआरो रा पाऊ नतनेल; 9 जबूलूनो रे गोत्रो बीचा ते हेलोनो रा पाऊ एलीआब; 10 यूसुफ वंशिया बीचा ते ये ए, मतलब यूसुफो रा पाऊ एप्रैमो रे गोत्रो बीचा ते अम्मीहूदो रा पाऊ एलीशामा ओर यूसुफो रा दूजा पाऊ मनश्शे रे गोत्रो बीचा ते पदासूरो रा पाऊ गम्लीएल; 11 बिन्यामीनो रे गोत्रो बीचा ते गिदोनी रा पाऊ अबीदान; 12 दानो रे गोत्रो बीचा ते अम्मीशद्दै रा पाऊ अहीएजेर; 13 आशेरो रे गोत्रो बीचा ते ओक्रानो रा पाऊ पगीएल; 14 गादो रे गोत्रो बीचा ते दूएलो रा पाऊ एल्यासाप; 15 नप्तालिया रे गोत्रो बीचा ते एनानो रा पाऊ अहीरा।"

16 मण्डल़िया बीचा ते जो मर्द आपणे-आपणे पितरा रे गोत्रो रे परदान ठराई ते सेयो येई लोक ए ओर ये इस्राएलिया रे कुलो रे खास मर्द थे। 17 जिना मर्दा रे नाओं ऊबे लिखी राखे तिना खे साथे लई की मूसा ओर हारूणे, 18 दूजे मीन्ने रे पईले दिने सारी मण्डल़ी कट्ठी कित्ती, तेबे इस्राएलिए आपणे-आपणे कुल ओर आपणे-आपणे पितरा रे कराने रे मुताबिक बी साल या तिजी ते ज्यादा उम्रा वाल़ेया रे गिणतिया री कताबा रे आपणी-आपणी वंशाबलिया रे नाओं लिखवाए; 19 जिंयाँ यहोवे मूसे खे आज्ञा दित्ती थी तिजी रे मुताबिक तिने सीनै री सुनसाण जगा दे तिना री गिणती कित्ती।

20 ओर इस्राएलो रे जेठे रूबेनो रे वंशो रे जितणे मर्द आपणे कुल ओर आपणे पितरा रे कराने रे मुताबिक बीई साल या तिजी ते ज्यादा उम्रा रे थे ओर युद्ध करने जोगे थे, सेयो सब आपणे-आपणे नाओं ते गिणे गए; तिना री गिणती ईंयाँ ए, 21 रूबेनो रे गोत्रो रे गिणे रे मर्द 46 ह्जार 500 थे।

22 शिमोनो रे वंशो रे लोक जितणे मर्द आपणे कुल ओर आपणे पितरा रे कराने रे मुताबिक 20 साल या तिजी ते ज्यादा उम्रा रे थे ओर युद्ध करने जोगे थे, सेयो सब आपणे-आपणे नाओं ते गिणे गए; सेयो यो ए, 23 ओर शिमोनो रे गोत्रो रे गिणे रे मर्द 59 ह्जार 300 थे।

24 गादो रे वंशो रे जितणे मर्द आपणे कुल ओर आपणे पितरा रे कराने रे मुताबिक 20 साल या तिजी ते ज्यादा उम्रा रे थे ओर युद्ध करने जोगे थे, सेयो सब आपणे-आपणे नाओं ते गिणे गए, 25 ओर गादो रे गोत्रो रे गिणे रे मर्द 45 ह्जार 650 थे।

26 यहूदा रे वंशो रे जितणे मर्द आपणे कुल ओर आपणे पितरा रे कराने रे मुताबिक 20 साल या तिजी ते ज्यादा उम्रा रे थे ओर युद्ध करने जोगे थे, सेयो सब आपणे-आपणे नाओं ते गिणे गए; से यो ए: 27 ओर यहूदा रे गोत्रो रे गिणे रे मर्द 74 ह्जार 600 थे।

28 इस्साकारो रे वंशो रे जितणे मर्द आपणे कुल ओर आपणे पितरा रे कराने रे मुताबिक 20 साल या तिजी ते ज्यादा उम्रा रे थे ओर युद्ध करने जोगे थे, सेयो सब आपणे-आपणे नाओं ते गिणे गएः 29 ओर इस्साकारो रे गोत्रो रे गिणे रे मर्द 54 ह्जार 400 थे।

30 जबूलूनो रे वंशो रे जितणे मर्द आपणे कुल ओर आपणे पितरा रे कराने रे मुताबिक 20 साल या तिजी ते ज्यादा उम्रा रे थे ओर युद्ध करने जोगे थे, सेयो सब आपणे-आपणे नाओं ते गिणे गएः 31 ओर जबूलूनो रे गोत्रो रे गिणे रे मर्द 57 ह्जार 400 थे।

32 यूसुफो रे वंशो बीचा ते एप्रैमो रे वंशो रे जितणे मर्द आपणे कुल ओर आपणे पितरा रे कराने रे मुताबिक 20 साल या तिजी ते ज्यादा उम्रा रे थे ओर युद्ध करने जोगे थे, सेयो सब आपणे-आपणे नाओं ते गिणे गएः 33 ओर एप्रैमो रे गोत्रो रे गिणे रे मर्द 40 ह्जार 500 थे।

34 मनश्शे रे वंशो रे जितणे मर्द आपणे कुल ओर आपणे पितरा रे कराने रे मुताबिक 20 साल या तिजी ते ज्यादा उम्रा रे थे ओर युद्ध करने जोगे थे, सेयो सब आपणे-आपणे नाओं ते गिणे गएः 35 ओर मनश्शे रे गोत्रो रे गिणे रे मर्द 32 ह्जार 200 थे।

36 बिन्यामीनो रे वंशो रे जितणे मर्द आपणे कुल ओर आपणे पितरा रे कराने रे मुताबिक 20 साल या तिजी ते ज्यादा उम्रा रे थे ओर युद्ध करने जोगे थे, सेयो सब आपणे-आपणे नाओं ते गिणे गएः 37 ओर बिन्यामीनो रे गोत्रो रे गिणे रे मर्द 45 ह्जार 400 थे।

38 दानो रे वंशो रे जितणे मर्द आपणे कुल ओर आपणे पितरा रे कराने रे मुताबिक बी साल या तिजी ते ज्यादा उम्रा रे थे ओर युद्ध करने जोगे थे, सेयो सब आपणे-आपणे नाओं ते गिणे गएः 39 ओर दानो रे गोत्रो रे गिणे रे मर्द 62,700 थे।

40 आशेरो रे वंशो रे जितणे मर्द आपणे कुल ओर आपणे पितरा रे कराने रे मुताबिक बी साल या तिजी ते ज्यादा उम्रा रे थे ओर युद्ध करने जोगे थे, सेयो सब आपणे-आपणे नाओं ते गिणे गएः 41 ओर आशेरो रे गोत्रो दे गिणे दे मर्द अकताल़ी ह्जार थे।

42 नप्ताली रे वंशो रे जितणे मर्द आपणे कुल ओर आपणे पितरा रे कराने रे मुताबिक 20 साल या तिजी ते ज्यादा उम्रा रे थे ओर युद्ध करने जोगे थे, सेयो सब आपणे-आपणे नाओं ते गिणे गएः 43 ओर नप्ताली रे गोत्रो रे गिणे रे मर्द 53 ह्जार 400 थे। 44 ईंयाँ मूसा ओर हारूणे इस्राएलो रे बारा परदाना री मतादा ते, जो आपणे-आपणे पितरा रे कराने रे थे, सेयो सब गिणी लये ओर तिना सबी री गिणती येई थी। 45 इजी खे जितणे इस्राएली लोक 20 साल या तिजी ते ज्यादा उम्रा रे ऊणे री बजअ ते युद्ध करने जोगे थे सेयो आपणे पितरा रे कराने रे मुताबिक गिणे, 46 ओर सेयो सब गिणे रे मर्द कुल मिलाई की 6 लाख 3 ह्जार 550 थे।

लेवी गोत्रो खे लग करेया जाणा

47 इना रे लेवी गोत्रो रे लोक आपणे पितरा रे गोत्रो रे नि गिणे गए। 48 कऊँकि यहोवे मूसे खे बोलेया था, 49 "लेवी गोत्रो री गिणती इस्राएलिया साथे नि करनी; 50 पर तूँ लेविया खे मिलणे वाल़े गवाईया रे तम्बूए पाँदे ओर तिजी रे सारे समानो पाँदे, मतलब जो कुछ तिजी साथे सम्बन्द राखोआ तिजी पाँदे अधिकारी ठराया ओर सेयो मिलणे वाल़े तम्बू ओर तिजी रा सारा समान चकेया करो ओर सेयो ई तिजी री देख-रेख करेया करो ओर तम्बूए रे चऊँ कनारे सेयो ई आपणे डेरे पाया करो।*1:50 प्रेरित 7:44 51 ओर जेबे कदी मिलणे वाल़ा तम्बू केथी ओरथी लई चलो तो तेबे लेवी वंशो रे मर्द ई तिजी खे उतारेया करो ओर जेबे कदी मिलणे वाल़ा तम्बू लगाया जाओ तो तेबे लेवी कुलो रे लोक ई तिजी खे खड़ा करेया करो ओर जो कोई एड़ा मर्द तिजी रे नेड़े आऊणा चाओ जो लेवी वंशो रा नि ओ तो से मारेया जाओ। 52 ओर इस्राएली लोक आपणा-आपणा डेरा आपणी-आपणी छावणिया रे ओर आपणे-आपणे चण्डे रे नेड़े खड़े करेया करो; 53 पर लेवी आपणे डेरे मिलणे वाल़े गवाईया रे तम्बूए रे चऊँ कनारे खड़े करो, केथी एड़ा नि ओ कि इस्राएलिया री सारी मण्डल़िया पाँदे मेरा रोष पड़ो ओर लेवी गोत्रो रे लोक मिलणे वाल़े तम्बूए री देख-रेख करेया करो।"

54 जो आज्ञा यहोवे मूसे खे दित्ती थी इस्राएलिए तिजी रे मुताबिक कित्तेया।