गिणती 32

यरदनो री पूर्वो री तरफा खे बसे रे गोत्र

1 एबे एड़ा ऊआ कि रूबेन ओर गाद गोत्रो रे लोका गे बऊत डांगर थे। जेबे तिने याजेर ओर गिलाद देशो खे देखी की सोचेया कि डांगरा खे चराणे जोगा देश ए, 2 तेबे सेयो मूसा, एलीआजार पुरोईत ओर मण्डल़िया रे परदाना गे जाई की बोलणे लगे, 3 "ये सेयो देश ए अतारोत, दीबोन, याजेर, निम्रा, हेशबोन, एलाले, सबाम, नबो ओर बोन शईरो रे देशा खे देखो 4 जेते देशो री यहोवे इस्राएलो री मण्डल़िया खे जीत दल़ाई राखी, से डांगरा खे पाल़ने जोगा देश ए ओर तेरे दासा गे डांगर ए।" 5 फेर तिने बोलेया, "जे तेरी दया तेरे दासा पाँदे ओ, तो ये देश तेरे दासा खे मिलो कि तिना री आपणी जमीन ओ; आसा खे यरदनो ते पार नि लई जा।"

6 तेबे मूसे गाद ओर रूबेन गोत्रो रे परदाना खे बोलेया, "जेबे तुसा रे पाई युद्ध करने खे जाओ तेबे क्या तुसा एती बैठे रे रणा? 7 जो देश यहोवे तिना खे देई राखेया तुसे तिना ओरी इस्राएलिया खे तेते देशो रे जाणे रिया तँईं कऊँ ना करवाओए? 8 जेबे मैं तुसा रे बुजुर्गा खे कादेशबर्नो ते कनान देश देखणे खे पेजेया, तेबे तिने बी एड़ा ई कित्तेया था। 9 जेबे तिने एशकोल नाओं री काअटिया तक पऊँची की तेथो रा देश देखेया, तेबे इस्राएलिया ते तेस देशो रे बारे दे जो यहोवे तिना खे दित्तेया था तिदे जाणे ते ना कराई ती। 10 इजी खे तेस दिने यहोवे गुस्सा करी की ये कसम खाई थी, 11 ‘जरूर जो माणूं मिस्र देशो ते निकल़ी की आई रे तिना बीचा ते, जितणे 20 साल या तिजी ते ज्यादा उम्रा रे ए, सेयो तेस देशो खे नि देखी सकणे, जेतेखे देणे री कसम मैं अब्राहम, इसहाक ओर याकूबो ते खाई थी, कऊँकि सेयो मां पीछे पुरिया तरअ ते नि आये; 12 पर यपुन्ने कणजी रा पाऊ कालेब ओर नूनो रा पाऊ यहोशू, ये दोनो जणे जो परमेशरो पीछे पुरिया तरअ ते चली पड़ी रे ये तो तेस देशो खे देखी सकणे।’ 13 तेबे यहोवे रा गुस्सा इस्राएलिया पाँदे पड़केया ओर जदुओ तक तेसा पीढ़िया रे लोका रा अन्त नि ऊआ, जिने यहोवे रे खलाफ बुरा करी राखेया, तदुओ तक मतलब चाल़ी साला तक से तिना खे सुनसाण जगा दे लई की फिरदा रया। 14 ओर सुणो, तुसे तिना पापी लोका रे बच्चे ऊई की इजी खे आपणे बुजुर्गा री जगा पाँदे आई रे कि इस्राएलो रे खलाफ यहोवे रे पड़के रे गुस्से खे ओर बी पड़काओ! 15 जे तुसे परमेशरो पीछे चलणे ते फिरी जाओ, तो तेस फेर आसे सब जणे सुनसाण जगा रे छाडी देणे; ओर ईंयाँ तुसे इना सबी लोका रा नाश कराणे वाल़े ऊणे।"

16 तेबे तिने मूसे रे ओर नेड़े आई की बोलेया, "आसा आपणे डांगरा खे एती गवाईणी बनाणियां, ओर आपणे बाल-बच्चेया खे एथी शईर बसाणे, 17 पर आपू इस्राएलिया रे आगे-आगे अथियार लई की तदुओ तक चलणा, जदुओ तक तिना खे तिना री जगा रे नि पऊँचाई देऊँ; पर आसा रे बाल-बच्चे ओर आसा रिया जवाणसा एस गढ़वाल़े शईरो रे एस देशो रे रणे वाल़ेया ते सई-सलामत रणे। 18 पर जदुओ तक इस्राएली आपणे-आपणे इस्से रे अक्कदार नि ऊई जाओ तदुओ तक आसा आपणे कअरो खे नि जाणा। 19 आसा खे यरदनो रे वारले कनारे पूर्वो री तरफा खे आसा री बरासती रा इस्सा मिली चूकी रा इजी खे आसा तिना साथे यरदन नदिया ते पार या केथी आगे आपणा इस्सा नि लणा।"

20 तेबे मूसे तिना खे बोलेया, "जे तुसे एड़ा करो ओर तुसे यहोवे रे आगे-आगे युद्ध करने खे अथियार लई लो। 21 ओर हर एक अथियार वाल़ा यरदनो ते पार तदुओ चलो, जदुओ तक यहोवा आपणे आगे ते आपणे दुश्‍मणा खे पुरिया तरअ ते नि निकयाल़ी देओ। 22 ओर पूरा देश यहोवे रे सामणे आसा रे वशो रे नि आई जाओ; तो तेसते बाद ई तुसे एती आओगे ओर यहोवे रे ओर इस्राएलो रे बारे दे निर्दोष ठईरने, तेबे एते देशो रे यहोवे रे सामणे एसा जमीना पाँदे तुसा रा आपणा अक्क ऊई जाणा। 23 ओर जे तुसे एड़ा नि करो, तो यहोवे रे खलाफ पापी ठईरने ओर जाणी लओ कि तुसा खे आपणे तेस पापो री सजा पुगतणी पड़नी। 24 तुसे आपणे बाल-बच्चेया खे शईर बसाओ ओर आपणी पेडा-बाकरिया खे गवाईणी बणाओ ओर जो तुसा रे मुंए ते निकल़ी रा सेई करो।"

25 तेबे गाद ओर रूबेन गोत्रो रे लोके मूसे खे बोलेया, "आपणे यहोवे री आज्ञा रे मुताबिक तेरे दासा करना। 26 आसा रे बाल-बच्चे, पेडा-बाकरिया, जवाणसा बगैरा, सब डांगर तो एथी गिलादो रे शईरो रे रणे; 27 पर आपणे यहोवे री आज्ञा रे मुताबिक तेरे दास सब जणे युद्ध करने खे अथियारा साथे यहोवे रिया तँईं लड़ने खे यरदन नदिया ते पार जाणे।"

28 तेबे मूसे तिना रे बारे दे एलीआजार पुरोईत ओर नूनो रे पाऊ यहोशू ओर इस्राएलिया रे गोत्रो रे कराने रे खास-खास मर्दा खे ये आज्ञा दित्ती, 29 "जे सब गाद गोत्र ओर रूबेन गोत्रो रे हर एक मर्द युद्ध करने खे अथियार लई की तुसा साथे यहोवे रिया तँईं यरदनो ते पार जाओ ओर देश तुसा रे वशो रे आई जाणे ते बाद तुसे गिलाद देशो री जमीन तिना री आपणी जमीन ऊणे खे तिना खे देई देओ। 30 पर जे सेयो तुसा साथे अथियार लई की यरदन नदिया ते पार नि जाओ, तो तिना री आपणी जमीन तुसा बीचे कनान देशो रे ठईरो।"

31 तेबे गाद गोत्र ओर रूबेन गोत्रो रे परदान बोलणे लगे, "यहोवे जेड़ा तेरे दासो रे जरीये बोलेया तेड़ा ई आसे करूँगे। 32 आसे अथियारा साथे यहोवे रिया तँईं यरदन नदिया ते पार कनान देशो रे जाऊँगे, पर आसा री आपणी जमीन यरदनो रे वारले कनारे ई रओ।" 33 तेबे मूसे गाद गोत्रो रे लोका खे ओर रूबेन गोत्रो रे लोका खे ओर यूसुफो रे पाऊ मनश्शे रे आदे गोत्रिया खे, एमोरियो रे राजा सिहोन ओर बाशानो रे राजा ओग, दुँईं रे राज्य रा शईर ओर तिना री नेड़े-तेड़े री जमीना समेत तिना खे देईती। 34 तेबे गाद गोत्रो रे लोके दीबोन, अतारोत, अरोएर, 35 अत्रौत, शोपान, याजेर, योगबहा, 36 बेतनिम्रा ओर बेत-हारान नाओं रे शईर मजबूत कित्ते ओर तिदे पेडा-बाकरिया खे दुबारा गवाईणी बणाईया। 37 ओर रूबेन गोत्रो रे लोके हेशबोन, एलाले ओर किर्यातैम शईरा खे, 38 ओर नबो ओर बालमोनो रे नाओं रे शईर जिना रे नाओं बदली की तिना खे ओर सिबमा खे मजबूत कित्तेया ओर तिने आपणे मजबूत कित्ते रे शईरा रे ओर-ओर नाओं राखे। 39 ओर मनश्शे गोत्रो रे पाऊ माकीरो रे वंशो वाल़ेया गिलादो रे देशो रे जाई की से देश आपणे काबूए रे लई ला ओर जो एमोरी जातिया रे लोक तिदे रओ थे सेयो तेथा ते नठाई ते। 40 तेबे मूसे मनश्शे गोत्रो रे पाऊ माकीरो रे वंशो रे लोका खे गिलाद शईर देईता ओर सेयो तिदे रणे लगे। 41 ओर मनश्शे गोत्रो रा वंशज याईरे जाई की गिलादो री नेड़े-तेड़े री बस्तिया जीती लिया ओर तिना रे नाओं हब्बोत्याईर राखे। 42 ओर नोबहे जाई की गाँवो समेत कनात जीती ला ओर तिजी रा नाओं आपणे नाओं पाँदे नोबह राखेया।