गिणती 14

लोका रा बड़बड़ाणा

1 सारी इस्राएली मण्डल़िया रे लोक तेसा राती रोंदे रये।*14:1 इब्रानी 3:16-18 2 ओर सारे इस्राएली लोक मूसा ओर हारूणो रे खलाफ बोलणे लगे ओर सारे मर्द तिना खे बोलणे लगे, "पला ऊँदा कि आसे मिस्रो रेई या एते सुनसाण जगा रेई मरी जांदे!*14:2 1 कुरिन्थ 10:10 3 यहोवा आसा खे तेते देशो रे लई जाई की कऊँ तलवारी साथे मरवाणा चाओआ? आसा रिया जवाणसा ओर बच्चे तो तिना री लूटा रे चली जाणे; आसा खे ठीक ऊणा कि आसे मिस्र देशो खे चली जाईए" 4 तेबे सेयो आपू बीचे बोलणे लगे, "आओ, आसे केसी खे आपणा परदान बणाई लईए ओर मिस्रो खे चली जाईए।"*14:4 प्रेरित 7:39

5 तेबे मूसा ओर हारूण इस्राएलिया री सारी मण्डल़िया रे लोका रे सामणे चूकी गे। 6 ओर नूनो रे पाऊ यहोशूए ओर यपुन्ने रे पाऊ कालेबे, जो देशो रा पेत लणे वाल़ेया बीचा ते थे, दु:खो रे मारे आपणे-आपणे टाल्ले फाड़े, 7 ओर सेयो इस्राएलिया री सारी मण्डल़िया खे बोलणे लगे, "जेते देशो रा पेत लणे खे आसे ओरे-पोरे कूमी की आई रे, से बऊत ई खरा देश ए। 8 जे यहोवा आसा ते खुश ओ तो आसा खे तेते देशो रे लई चलो, जो देश सच्चो खेई बऊत ई पजणे वाल़ा ओ ओर फेर आसा खे तेस देशो खे देई देओ। 9 बस तुसे इतणा करो कि तुसे यहोवे रे खलाफ तोखा नि करो ओर ना ई तेते देशो रे लोका ते डरो, कऊँकि आसे तिना खे खत्म करी सकूँए; ईंयाँ तो परमेशरो री छाया तिना पाँदा ते अटी गी री ओर यहोवा आसा साथे ए; तुसे तिना ते नि डरो।"

10 तेबे सारे इस्राएली लोक यहोशू ओर कालेबो खे पात्थर बाई की मारने लगे। तेबे यहोवे रा तेज मिलणे वाल़े तम्बूए रे सब इस्राएलिया पाँदे आईगा।

लोका रिया तँईं मूसे री बिनती

11 तेबे यहोवे मूसे खे बोलेया, "इना लोका कदुओ तक मेरा नरादर करदे रणा? ओर इना मेरे सब अचम्बे रे काम देखदे ऊए बी कदुओ तक मां पाँदे विश्वास नि करना? 12 मां सेयो महामारिया ते मारी की नाश करी देणे, ओर सेयो तिना री जगा ते निकयाल़ी देणे, पर तां बीचा ते एक बड़ी जातिया रा देश बनाणा जो इना इस्राएलिया ते बड़ा ओर तागतबर ऊणा।" 13 मूसे यहोवे खे बोलेया, "तेबे तो मिस्री जिना बीचा ते तूँ आपणी सामर्थ दखाई की तिना लोका खे निकयाल़ी की लई आया ये सुणना, 14 ओर तिना कनान देशो रे रणे वाल़ेया ते बोलणा। तिने तो ये सुणी राखेया कि तूँ जो यहोवा इना लोका बीचे रओआ ओर सामणे दिशोआ ओर तेरा बादल़ तिना पाँदे ठईरेया रा रओआ ओर तूँ दिनो खे बादल़ो रे खम्बे रे ओर राती खे आगी रे खम्बे रे ऊई की इना रे आगे-आगे चलेया करोआ। 15 तेबे जे तूँ इना लोका खे एखी बार मारी दे तो जिने लोके तेरे बारे दे तेरी तारीफ सुणी राखी तिना बोलणा, 16 कि यहोवा तिना लोका खे तेस देशो रे जो तिने तिना खे देणे री कसम खाई थी तेती पऊँचाई नि सकेया, इजी बजअ ते यहोवे सेयो सुनसाण जगा रेई काईते।*14:16 1 कुरिन्थ 10:5 17 इजी खे एबे यहोवे री सामर्थ तेरे बोलणे रे मुताबिक ओ, 18 कि यहोवा गुस्सा करने रे देर करोआ ओर बऊत ई जादा दयालु ए ओर पाप ओर पापो खे बी माफ करने वाल़ा ए, फेर बी से दोषी माणूंआ खे किंयाँ बी निर्दोष नि ठरांदा ओर पूर्वजा रे पापो री सजा तिना रे पाऊआ, पोतेया ओर पड़पोतेया खे देओआ। 19 एबे इना लोका रे पापो खे आपणी बड़ी दया रे मुताबिक ओर जिंयाँ तूँ मिस्रो ते लई की एथो तक माफ करदा रया तिंयाँ ई एबे बी माफ करी दे।"

इस्राएलो खे सजा मिलणी

20 तेबे यहोवे बोलेया, "तेरी बिनतिया रे मुताबिक आँऊ माफ करूँआ; 21 पर मेरे जीवनो री कसम सच्ची ई सारी तरती यहोवे री महिमा ते परी जाणी; *14:21 इब्रानी 3:11 22 तिने सबी लोके जिने मेरी महिमा मिस्र देशो रे ओर सुनसाण जगा रे देखी, फेर बी मेरे कित्ते रे अचम्बे रे काम देखी की बी 10 बार मेरी परीक्षा कित्ती ओर मेरिया गल्ला नि मानिया,*14:22 इब्रानी 3:18 23 इजी खे जेते देशो रे बारे दे मैं तिना रे पूर्वजा ते कसम खाई थी, तिजी रे बावजूद जितणेया मेरी बेज्जती कित्ती तिना बीचा ते कोई बी तिजी खे देखी नि सकणा।*14:23 1 कुरिन्थ 10:5 24 पर इजी री बजअ ते कि मेरे दास कालेबो साथे ओर ई आत्मा ए ओर तिने पुरिया तरअ ते मेरा कईणा मानी राखेया, इजी खे मां से तेस देशो रे जिदे से रई की आई रा पऊँचाणा ओर तेसरा वंश तेस देशो रा अक्कदार ऊणा। 25 अमालेकी ओर कनानी लोक काअटिया रे रओए, इजी खे काल तुसे कूमी की चली की लाल समुद्रो री बाटा रिये सुनसाण जगा रे चली जाओ।"

बड़बड़ाणे री सजा

26 फेर यहोवे मूसा ओर हारूणो खे बोलेया, 27 "ये बुरी मण्डल़ी मां पाँदे कदुओ तक बड़बड़ांदी रणी? इस्राएली लोका रा बड़बड़ाणा मैं सुणी राखेया। 28 इजी खे तिना खे बोल कि यहोवा ये बोलोआ कि मेरी जिन्दगिया री कसम जो गल्ला मैं तुसा रिया सुणी राखिया, जरूर मां तिजी रेई मुताबिक तुसा साथे बर्ताव करना। 29 तुसा सबी बीचा ते 20 साला रे या तिजी ते ज्यादा उम्रा रे मर्द जितणे गिणे गए थे, जो मां पाँदे बड़बड़ाओ थे, तुसा सबी रिया लोथा एते सुनसाण जगा रे पड़ी रणियां।*14:29 इब्रानी 3:17 30 तिना बीचा ते यपुन्ने रा पाऊ कालेब ओर नूनो रा पाऊ यहोशूए खे छाडी की कोई बी तेते देशो रे नि पऊँचणा, जेतेरे बारे दे मैं कसम खाई राखी कि तुसा खे तिदे बसाऊँगा।*14:30 1 कुरिन्थ 10:5, यहून् 1:5 31 तुसा रे बाल-बच्चे जिना रे बारे दे तुसे बोलेया कि सेयो तो लूटा रे चली जाणे, मां सेयो तेते देशो रे खुशी मनाणे खे पऊँचाई देणे जो देश तुसे तुच्छ जाणी राखेया। 32 पर तुसा री लोथा एसी सुनसाण जगा रे पड़ी री रणियां। 33 ओर जदुए तक तुसा री लोथा सुनसाण जगा दे माट्टिया दे खत्म नि ऊई जाओ, तदुओ तक तुसा रे बाल-बच्चे एसा सुनसाण जगा रे 40 साला तक तुसा रे व्याभिचारो री सजा पुगतदे ऊए पटकदे रणे।*14:33 प्रेरित 7:36 34 जितणे दिन तुसे तेते देशो रा पेत लंदे रये, तिना 40 दिना रे बदले 40 साला तक मतलब एकी दिनो रे बदले एकी सालो तक तुसा आपणे पापो री सजा पुगतणी ओर तेबे तुसा जाणी लणा कि मेरा तुसा रे खलाफ ऊणा कितणा डराऊणा ऊणा।*14:34 प्रेरित 13:18 35 आँऊ यहोवे खे ये बोली चुकेया रा कि एसा बुरिया मण्डल़िया रे लोक जो मेरे खलाफ कट्ठे ऊई रे एते सुनसाण जगा रे खत्म ऊई जाणे ओर बल्कि एड़ा ई करूँगा बी।"*14:35 इब्रानी 3:16-18 36 तेबे जिना मर्दा खे मूसे तेस देशो रा पेत लणे खे पेजेया था ओर तिने वापस आई की तेस देशो रे बारे दे चूठा ब्योरा देई की सारी मण्डल़िया खे मूसे रे खलाफ बड़बड़ाणे खे पड़काया,*14:36 यहून् 1:5 37 तेस देशो रे बारे दे चूठा ब्योरा देणे वाल़े सेयो मर्द यहोवे रे सामणे महामारिया ते मरीगे। 38 पर देशो रा पेत लणे वाल़ेया 12 मर्दा बीचा ते नूनो रा पाऊ यहोशू ओर यपुन्नो रा पाऊ कालेब दोनो जिऊँदे रये।

इस्राएलिया री आर

39 जेबे मूसे यो सब गल्ला सबी इस्राएलिया खे सुणाईयां तेबे सेयो बऊत दु:खी ऊणे लगे। 40 ओर सेयो प्यागा उठी की ये बोलदे ऊए पाह्ड़ो री चूँडिया पाँदे चढ़ने लगे, "आसे जरूर पाप करी राखेया; पर एबे आसे जेतेरे बारे दे यहोवे वादा करी राखेया तेते जगा खे जाणे खे त्यार ए।"

41 तेबे मूसे बोलेया, "तुसे यहोवे री आज्ञा रा उल्लंघन कऊँ करोए? तुसे कामयाब नि ऊणे। 42 यहोवा तुसा साथे निए, इजी खे ऊबे पाह्ड़ो पाँदे नि चढ़ो, नई तो दुश्मणा ते आरी जाणे। 43 कऊँकि तेती तुसा रे आगे अमालेकी ओर कनानी लोक तुसा रे खलाफ ऊठणे ओर तुसा खे तिना रा सामणा करना पड़ना ओर तुसे यहोवे री आज्ञा मानणी छाडी ती री, तेबेई तो यहोवा तुसा साथे नि रणा इजी खे तुसे तिना रे आथे काये जाणे।" 44 फेर बी सेयो छावणिया ते अटी की जिद्द करी की आपणी ई सोचा ते मूसा ओर यहोवे री वाचा रे सन्दूको ते बिना ई पाह्ड़ो री चूँडिया पाँदे चढ़ीगे। 45 तेबे अमालेकी वंशो रे ओर कनानी जो तेस पाह्ड़ो पाँदे रओ थे तिने तिना पाँदे अमला कित्तेया ओर होर्मा शईरो तक तिना खे मारदे चलीगे।