गिणती 24

1 बिलामो खे जेबे ये एहसास ऊआ कि यहोवा इस्राएलो खे आशीष ई दलाणा चाओआ, तेबे बिलाम पईले जेड़ा शकुन देखणे खे यहोवे गे नि गया, बल्कि से सुनसाण प्रदेशो री तरफा खे मुड़ी गा। 2 जेबे बिलामे आपणी आखी चकिया तो इस्राएलिया खे आपणे-आपणे गोत्रा रे मुताबिक बसे रे देखेया ओर परमेशरो रा आत्मा तेस पाँदे आईगा। 3 तेबे तिने आपू खे मिले रे संदेशो रिया गल्ला बोलणिया शुरू कित्तिया,

"बोरो रे पाऊ बिलामो री ये वाणी ए,

जेस मर्दो री आखी साफ देखोईया तेसरी ई ये वाणी ए,

4 परमेशरो रे वचनो खे सुणने वाल़ा,

जो आपणी आखी साथे सर्वशक्तिमानो रा दर्शण पाओआ,

तेसी सामणे चूकी की माथा टेकोआ ओर जेसरी आखी खुलिया ए

तेसरी ये वाणी ए,

5 ओ याकूब रे वंशज, तेरे तम्बू केड़े बांके ए

तेरी रणे री जगा क्या ई शानदार ए!

6 ये तो काअटिया जेड़े ए ओर नदिया रे कनारे ऊगे बगीचे जेड़े फैली रे,

जेड़े कि यहोवे रे लगाए रे अगरो रे डाल़ ओ

ओर पाणिए रे नेड़े रे देवदारो जेड़े ए।*24:6 इब्रानी 8:2

7 ओर तेसरे कअड़ेया ते पाणी सदा बईंदा रणा

ओर फसल उगाणे खे बऊत सारा पाणी मिलणा

मतलब पाणिए री कमी कदी पनि सताणी

ओर तेसरा राजा अगाग देशो रे राजे ते बी महान ऊणा

ओर तेसरा राज्य बढ़दा ई जाणा।

8 इस्राएलो खे मिस्र देशो ते बारे निकयाल़ी की परमेशर ई ल्याई राखेया,

से तो इतणा तागतबर ए जेड़ा जंगल़ी सांड,

जातिया-जातिया रे लोक जो तेसरे बैरी ए तेस सेयो तबाह करी देणे

ओर तिना री आड्डिया तेस तोड़ी देणियां

ओर आपणे तीरे की सेयो बीनी देणे।

9 इस्राएली आड़ लगाई की शेरनिया जेड़ा लेटी गा रा;

केसदे इतना दम ए कि तेसखे छेड़ो?

जो कोई ताखे आशीर्वाद देओ तेस आशीष पाणी

ओर जो कोई ताखे स्राप देओ तेस स्राप पाणा।"

10 तेबे बालाको रा गुस्सा बिलामो पाँदे पड़केया ओर तिने आथो पाँदे आथ बाई की बिलामो खे बोलेया, "मैं तूँ आपणे दुश्मणा खे स्राप देणे खे बुलाई राखेया, पर तैं तिऊँ बार तिना खे आशीर्वाद ई आशीर्वाद दित्तेया। 11 इजी खे तूँ आपणी जगा खे नठी जा; मैं तो सोची राखेया था कि मां ताखे बऊत आदर देणा, पर एबे यहोवे तूँ तेस मान-सम्मानो खे पाणे खे रोकी ता रा।"

12 बिलामे राजा बालाको खे बोलेया, "जो सन्देशा देणे वाल़े दूत तैं पेजे थे, क्या मैं तिना खे बी नि बोलेया था, 13 कि चाए बालाक आपणे कअरो खे सूईने चाँदिए साथे परी की माखे देओ, तेबे बी आँऊ यहोवे री आज्ञा तोड़ी की आपणे मनो ते ना पला करी सकूँआ, ना ई बुरा; इजी खे जो कुछ यहोवा बोलोगा सेई मां बोलणा? 14 एबे सुण, आऊँ आपणे लोका गे वापस चली जाऊँआ; पर पईले आँऊ ताखे चिताई देऊँआ कि आखरी रे दिना रे इस्राएली लोका तेरी प्रजा साथे क्या-क्या करना।"

बिलामो री चौथी भविष्यबाणी

15 तेबे से आपणी गल्ल शुरू करी की बोलणे लगेया,

"बोरो रे पाऊ बिलामो री ये वाणी ए,

जेस मर्दो री आखी साफ देखोईया तेसरी ये वाणी ए,

16 परमेशरो रे वचनो खे सुणने वाल़ा ओर परमपरदानो रे ज्ञानो खे जाणने वाल़ा,

जो सर्वशक्तिमानो रा दर्शण पाओआ,

ओर तेसगे माथा टेकणे खे चुकेया रा खुली आखी साथे देखी की बोलणे वाल़े री ये वाणी ए कि

17 मां से देखणा तो अया, पर एबु नि;

मां तेस कनारो खे ताकणा तो जरूर, पर नेड़े आई की नि,

याकूबो रे वंशो बीचा ते एक तारा निकल़ना,

ओर इस्राएलो बीचा ते एक शासक उठणा;

तेस मोआबो रे बन्ने चूर-चूर करी देणे

ओर सब शेत शईरो रे पाऊआ रा नाश करी देणा।*24:17 मत्ती 2:2

18 तेबे एदोम ओर सेईर बी, जो तेसरे दुश्मण ए,

दोनो तेसरे वशो रे पड़ी जाणे

ओर इस्राएलो रे लोक तागतबर ऊई जाणे।

19 ओर याकूबो रे वंशो बीचा ते एक राज करने वाल़ा आऊणा

ओर शईरो रे जिऊँदे बचे रे लोक तेस नाश करी देणे।"

20 तेबे बिलामे अमालेकी लोका पाँदे नजर पाई की ये गल्ला बोलणिया शुरू कित्तिया,

"अमालेक देशो री जातिया बीचे तागतबर तो था,

पर तेसरा अन्त बी नाश ऊणा ईए।"

21 फेर बिलामे केनिया लोका पाँदे नजर पाई कि ये गल्ला बोलणिया शुरू कित्तिया,

"तेरी रणे री जगा बऊत मजबूत तो अए

ओर तेरा बसेरा चट्टानी पाँदे तो अए;

22 तेबे बी कैन जातिया रे लोक नाश ऊई जाणे।

जेबे अश्शूरो तूँ बन्दी बणाई की लई जाणा।"

23 फेर तिने आपणी गईरी गल्ला बोलणिया शुरू कित्तिया,

"हाय, जेबे परमेशरो एड़ा करना तेबे कुण जिऊँदा रणा?

24 तेबे बी साईप्रसो गे ते जाह्जा आई की अश्शूर शईरो खे

ओर एबेर शईरो खे दुःख देणा

ओर आखरी दे तेसरा बी नाश ऊई जाणा।"

25 तेबे बिलाम ओर राजा बालाक उठी की आपणे-आपणे कअरो खे चलीगे।