गिणती 3

हारूणो रे पाऊ

1 जेस बखते यहोवे सीनै पाह्ड़ो गे मूसे साथे गल्ला कित्तिया तेस बखते हारूण ओर मूसे री वंशावली ये थी। 2 हारूणो रे पाऊआ रे नाओं ये ए: हारूणो रा जेठा पाऊ नादाब ए फेर अबीहू, एलीआजार ओर ईतामार; 3 हारूणो रे पाऊ, जो अभिषिक्त पुरोईत थे ओर इना खे पुरोईतो रा काम करने खे चूणी राखेया था तिना रे नाओं ये ए। 4 नादाब ओर अबीहू जेस बखते सीनै री सुनसाण जगा रे यहोवे रे सामणे अपवित्र पाँदली आग मतलब तिने से आग इस्तेमाल कित्ती जेतेरी आज्ञा यहोवे तिना खे नि दित्ती थी ओर सेयो तेसी बखते यहोवे रे सामणे मरीगे थे ओर तिना रे पाऊ नि थे। एलीआजार ओर ईतामार आपणे बाओ हारूणो साथे पुरोईतो रा काम करदे रये।

लेविया खे पुरोईता री सेवा करने खे ठराणा

5 तेबे यहोवे मूसे खे बोलेया, 6 "लेवी गोत्रो रे लोका खे हारूण पुरोईतो रे सामणे खड़ा करो ताकि सेयो तेसरी मताद करो। 7 सेयो हारूण पुरोईत ओर सारी मण्डल़िया खे मिलणे वाल़े तम्बूए रे पीतरे ओर बारे सेवा करदे रओ। 8 लेवी वंशो रे लोक मिलणे वाल़े तम्बूए रे सारे समानो ओर इस्राएलिया री सम्बाल़ी री सारी चीजा री बी देख-रेख करो, ईंयाँ सेयो पवित्र तम्बूए री सेवा करो; 9 ओर तूँ लेविया खे हारूण ओर तेसरे दुँईं पाऊआ गे सम्बाल़ी दे कऊँकि सेयो इस्राएलिया री तरफा ते हारूणो गे ओर तेसरे पाऊआ गे पूरी रीतिया ते देईते दे। 10 ओर तूँ हारूण ओर तेसरे पाऊआ खे पुरोईतो रे पदो पाँदे ठराई दे ओर सेयो आपणी पुरोईत चारिया खे सम्बाल़ो; पर जे कोई परदेशी माणूं पवित्र चीजा रे नेड़े आऊणे री कोशिश करो तो से काई देणा चाईयो।"

11 फेर यहोवे मूसे खे बोलेया, 12 "देख इस्राएलिया रे सब जेठेया बच्चेया रे बदले आऊँ इस्राएलिया बीचा ते लेविया खे लई लऊँआ; इजी खे लेवी मेरे ई ऊणे। 13 सब जेठे मेरे ऊणे; कऊँकि जेस दिने मैं मिस्र देशो रे सब जेठे मारे, तेसी दिने मैं इस्राएलिया रे सारे माणूं ओर डांगरा रे सारे जेठे आपू खे पवित्र ठराए; तेबेई तो सेयो मेरे ऊणे; आऊँ यहोवा ए।"

लेविया री गिणती

14 परमेशर यहोवा फेर सीनै री सुनसाण जगा रे मूसे खे बोलेया, 15 "लेविया बीचा ते जितणे मर्द एकी मीन्ने या तिजी ते ज्यादा उम्रा रे ओ तिना खे तिना रे पितरा रे कराने ओर तिना रे कुलो रे मुताबिक गिणी लओ।" 16 ये आज्ञा पाई की मूसे यहोवे रे बोलणे रे मुताबिक सेयो गिणी लये। 17 लेविया रे तिऊँ पाऊआ रे नाओं ये ए, गेर्शोन, कहात ओर मरारी। 18 ओर गेर्शोनो रे दो पाऊ थे जिना ते तेसरे कुल चले ये ए, मतलब लिब्नी ओर शिमी। 19 कहातो रे चार पाऊ थे जिना ते तेसरे कुल चले तिना रे नाओं ये ए, मतलब अम्राम, यिसहार, हेब्रोन ओर उज्जीएल। 20 ओर मरारिए रे दो पाऊ थे जिना ते तेसरे कुल चले तिना रे नाओं ये ए, मतलब महली ओर मूशी। ये लेविया रे कुल आपणे पितरा रे कराने रे मुताबिक ए। 21 गेर्शेनो ते लिब्नी ओर शिमिया रे कुल चले; गेर्शोन वंशिया रे कुल येई ए। 22 इना बीचा ते जितणे मर्दा री उम्र एकी मीन्ने री या तिजी ते ज्यादा थी, तिना सबी री गिणती 7 ह्जार 500 थी। 23 गेर्शोनो रे कुलो रे लोक मिलणे वाल़े तम्बूए रे पीछे पच्छमा कनारो खे आपणे डेरे लगाया करो; 24 ओर गेर्शोन कुलो रे कराने रा परदान लाएलो रा पाऊ एल्यासाप ओ। 25 ओर मिलणे वाल़े तम्बूए री जो चीजा गेर्शोन वंशो रे लोका गे देख-रेखा खे सम्बाल़ी जाओ से यो इया, मतलब मिलणे वाल़ा तम्बू, ओर तिजी रा टकेया रा पड़दा ओर मिलणे वाल़े तम्बूए रे दरवाजे रा पड़दा, 26 ओर जो आँगण मिलणे वाल़े तम्बू ओर बेदिया रे चऊँ कनारे ए तिजी रे पड़दे, ओर तिजी रे द्धारो रे पड़दे ओर सब रस्सिया जो तिजी रे कामे आओईया।

27 फेर कहात वंशिया ते अम्रामियो, यिसहारिया, हेब्रोनियो ओर उज्जीएलियो रे कुल चले; कहातिया रे कुल येई ए। 28 तिना बीचा ते जितणे मर्दा री उम्र एक मीन्ने री या तिजी ते ज्यादा थी, तिना री गिणती 8 ह्जार 600 थी। कहात वंशो रे लोका खे पवित्र जगा री देख-रेख करने री जिम्मेबारी थी। 29 कहातिया रे कुलो रे लोक मिलणे वाल़े तम्बूए री दक्खणो री तरफा खे आपणे डेरे लगाया करो; 30 ओर कहात वंशो रे कराने रा परदान उज्जीएलो रा पाऊ एलीसापान ऊणा। 31 ओर जो चीजा तिना गे सम्बाल़ी जाओ सेयो पवित्र सन्दूक, पेंटा री रोटिया रा मेज, दिऊए राखणे री फट्टी, बेदिया ओर पवित्र जगा रे सूईने रे गईणे जेते की सेवा टईल ओई ओर पवित्र ओर बऊत पवित्र बीचला पड़दा ओर पवित्र जगा रे कामो रे आऊणे वाल़ा सारा समान तिना री जिम्मेवारिया रे सम्बाल़ेया। 32 ओर लेविया रे कुलो रे परदाना रा हारूण पुरोईतो रा पाऊ एलीआजार ओ, ओर जो लोक पवित्र जगा री सम्बाल़ी री चीजा री देख-रेख करो तिना पाँदे सेई मुखिया ठईरो।

33 फेर मरारिए ते महलियो ओर मूशिया रा कुल चले; मरारिए रे कुल येई ए। 34 इना बीचा ते जितणे मर्दा री उम्र एक मीन्ने री या तिजी ते ज्यादा थी, तिना सबी री गिणती 6,200 थी। 35 ओर मरारिए रे कुलो रे कराने रा परदान अबीहैलो रा पाऊ सूरीएल था; यो लोक मिलणे वाल़े तम्बूए रे उतरो री तरफा खे आपणे डेरे खड़े करो। 36 मरारी वंशो रे लोक पवित्र तम्बूए रे तख़्ते, बिंडे, खम्बे, पावे ओर सारे समानो री देख-रेख करो ओर तिजी खे लगाणे ओर निकाल़ने री जिम्मेबारी तिना गे सम्बाल़ी। 37 तिजी साथे चऊँ कनारे रे आँगणो रे खम्बे ओर तिना रे पावे, खूँडिया ओर रस्सिया री जिम्मेबारी बी तिना गे थी। 38 ओर मिलणे वाल़े तम्बूए रे सामणे, पूर्वो री तरफा खे जेथा ते सूरज निकल़ोआ, मूसा ओर हारूण ओर तेसरे पाऊ आपणे डेरे लगाओ ओर पवित्र जगा री देख-रेख इस्राएलिया रे बदले सेयो ई करेया करो ओर तिना ते अलावा दूजा जो कोई पवित्र जगा रे नेड़े जाणे री कोशिश करो से निकाल़ेया जाओ। 39 यहोवे री एसा आज्ञा पाई की एक मीन्ने या तिजी ते ज्यादा उम्रा वाल़े जितणे लेविए मर्दा खे मूसा ओर हारूणे तिना रे कुल़ा रे मुताबिक गिणेया, सेयो सब 22 ह्जार थे।

लेविया रा जेठेया री जगा लणी

40 तेबे यहोवे मूसे खे बोलेया, "इस्राएलिया रे जितणे जेठे मर्दा री उम्र एक मीन्ने या तिजी ते ज्यादा ए, तिना सबी खे नाओं लई की गिणी लओ। 41 ओर माखे इस्राएलिया रे सबी जेठेया बच्चेया रे बदले लेविया खे ओर इस्राएलिया रे डांगरा रे सबी जेठे बच्चेया रे बदले लेविया रे डांगरा खे लओ; आँऊ यहोवा ए।"

42 यहोवे री एसा आज्ञा रे मुताबिक मूसे इस्राएलिया रे सब जेठे गिणी लये। 43 ओर सब जेठे मर्द जिना री उम्र एक मीन्ने या तिजी ते ज्यादा थी, तिना रे नाओं री गिणती 22 ह्जार 273 थी।

44 तेबे यहोवे मूसे खे बोलेया, 45 "इस्राएलिया रे सबी जेठेया रे बदले लेविया खे, ओर तिना रे डांगरा रे बदले लेविया रे डांगरा खे लओ ओर लेविए मेरे ई ओ; आँऊ यहोवा ए। 46 ओर इस्राएलिया रे जेठेया बीचा ते जो 273 गिणतिया रे लेविया ते ज्यादा ए, तिना खे छुड़ाणे खे, 47 पवित्र जगा रे शकेलो रे साबो ते हर एक मर्दो खे 5 शकेल लओ; एक शकेल 20 गेरा रा ओ। 48 ओर जो पैसा तिना ज्यादा जेठेया खे छुड़ाणे खे ऊणा से हारूण ओर तेसरे पाऊआ खे देई देणा।" 49 ईंयाँ मूसे लेविया ते ज्यादा लोका रा छुड़ाणे रा पैसा कट्ठा कित्तेया। 50 पवित्र जगा दे शकेलो रे साबो ते 1,365 चाँदिए रे सिक्के बसूल ऊआ।

51 यहोवे री आज्ञा रे मुताबिक मूसे छुड़ाए ऊए रा पैसा हारूण ओर तेसरे पाऊआ खे दित्तेया।