गिणती 28

ठराए रे बखतो रे खास बलिदान

1 यहोवे मूसे खे बोलेया, 2 "इस्राएलिया खे ये आज्ञा सुणा, ‘मेरे चढ़ावे, मतलब माखे सुखदायक खुशबू देणे वाल़ी मेरी आगी रे चढ़ाई री नज्जो री बलि, तुसे लोक माखे तिना रे ठराए रे बखतो पाँदे चढ़ाणे खे याद राखेयो।’ 3 ओर तूँ तिना खे बोल कि जो-जो तुसा यहोवे खे चढ़ाणा ओगा से ये ए; मतलब हर रोज होमबलिया खे एकी-एकी सालो रे दो नर बिना नुक्शो रे मिन्टू हर रोज चढ़ाया करना। 4 एक मिन्टू तो प्यागा ओर दूजा साँजके बखते चढ़ाणा; 5 ओर पेडा रे मिन्टूए साथे एक लीटर कूटी की निकयाल़े रे जैतूनो रे तेलो साथे मिले रा एक किलो मैदे री नज्जो री बलि चढ़ाणा। 6 ये रोज की होमबलि ए, जो सीनै रे पाह्ड़ो पाँदे सुखदायक खुशबू मां यहोवे रिया तँईं आगी रे चढ़ाई री बलिया रे रूपो रे ठराई राखी। 7 ओर तिजी रा अर्घ एकी पेडा रे मिन्टूए साथे एक लीटर अंगूरा रा रस यहोवे रिया तँईं पवित्र जगा रे अर्घ देणा। 8 ओर दूजा पेडा रा मिन्टू प्यागा री होमबलिया जेड़ा, साँजके बखते बी तेड़ी नज्जो री होमबलि ओर अर्घो समेत मां यहोवे खे सुख देणे वाल़ी खुशबू वाल़ी आगी रे चढ़ाई री बलि करी की चढ़ाणा।"

रामो रे दिनो रे बलिदान

9 फेर रामो रे दिनो दे दो नर बिना नुक्शो री पेडा रे एकी-एकी सालो रे मिन्टू, अर्घ ओर नज्जो री बलिया समेत जैतूनो रे तेलो साथे मिलेया रा दो किलो मैदा चढ़ाणा। 10 हर रोज की होमबलि ओर तिजी रे अर्घो ते अलावा हर एक रामो रे दिनो री येई होमबलि ए।*28:10 मत्ती 12:5

मीन्ने रा बलिदान

11 हर मीन्ने रे शुरूओ रे यहोवे रिया तँईं दो बाच्छू, एक खाडू ओर एकी-एकी सालो रे बिना नुक्शो रे पेडा रे सात मिन्टू होमबलिया खे चढ़ाओ; 12 ओर हर एक बाच्छूए साथे नज्जो री बलिया खे तेलो साथे मिलेया रा तीन किलो मैदा ओर तेस एकी खाडूए साथे नज्जो री बलिया खे तेलो साथे मिलेया रा दो किलो मैदा; 13 ओर हर एक पेडा रे बच्चे साथे तेलो साथे मिलेया रा एक किलो मैदा, तिना सबी चीजा खे नज्जो री बलि करी की चढ़ाणा; ये सब यहोवे खे सुखदायक खुशबू देणे वाल़ी आगी रे चढ़ाई री होमबलि ठईरनी 14 ओर तिजी साथे चढ़ाणे खे ये अर्घ ओ; हर बाच्छूए साथे दो लीटर, खाडूए साथे डेढ़ लीटर ओर पेडा रे बच्चे साथे एक लीटर अंगूरा रा रस दित्तेया जाओ; ये होमबलि सालो रे हर मीन्ने रे नये चाँदो रे दिने चढ़ाई जाणी चाईयो। 15 यहोवे रिया तँईं पापबलिया खे एक बाकरा बी चढ़ाया जाओ; ये हर रोज की होमबलि ओर तिजी रे अर्घो ते अलावा चढ़ाया जाओ।

फसह रे त्योआरो रे बलिदान

16 फेर पईले मीन्ने रे चौदुए दिने यहोवे रा फसह रा त्योआर ओया करो। 17 ओर तेसी मीन्ने रे पन्द्रुए दिने बिना सजेड़े री रोटिया रा त्योआर मनाया करो ओर साता दिना तक बिना सजेड़े री रोटी खाई जाओ। 18 तेस त्योआरो रे पईले दिने तुसा री पवित्र सभा ओ ओर तेस दिने मईणती रा कोई काम नि ओ; 19 तिदे तुसे यहोवे खे होम मतलब आगी रे ये बलि चढ़ाणी; जिदे होमबलिया खे दो बाच्छू, एक खाडू ओर एकी-एकी सालो रे सात मिन्टू ओ; त्यान राखणा कि ये सब बिना नुक्शो रे ओ; 20 ओर हर एक बाच्छूए साथे नज्जो री बलिया खे तेलो साथे मिले रा तीन किलो मैदा ओ; ओर खाडूए साथे दो किलो मैदा ओ। 21 ओर सात पेडा रे बच्चेया बीचा ते हर एक बच्चे साथे तेलो साथे मिले रा एक किलो मैदा चढ़ाणा। 22 एक बाकरा बी पापबलि करी की चढ़ाणा, ताकि तुसा खे प्राश्चित ओ। 23 तुसा लोका खे सेयो पेंटा तिना पेंटा ते लग देणियां चाईयो जो तुसे हर रोज प्यागा होमबलि करी की चढ़ाओए। 24 ईंयाँ तुसे यहोवे खे सुख देणे वाल़ी खुशबू देणे खे तिना साता दिना रे आगी रे चढ़ाई री बलि चढ़ाएओ; ये हर रोज की होमबलि ओर तिजी रे अर्घो ते अलावा चढ़ाया जाओ। 25 ओर सातुए दिने बी तुसा री पवित्र सभा ओ ओर तेस दिने मईणती रा कोई काम नि करना।

बडाईया रे त्योआरो रे बलिदान

26 फेर पईली फसला रे दिने, जेबे तुसे आपणे बडाईया रे त्योआरो रे यहोवे रिया तँईं अफ़्ते रे त्योआरो रे आओगे तेबे नवें नज्जो री बलि चढ़ाणी, तेस बखते बी तुसा री पवित्र सभा ओ ओर तेस दिने मईणती रा कोई काम नि करना। 27 ओर यहोवे खे सुख देणे वाल़ी खुशबूआ खे दो बाच्छू, एक खाडू ओर एकी-एकी सालो रे सात मिन्टू होमबलि करी की चढ़ाणे। 28 ओर हर एक बाच्छूए साथे नज्जो री बलिया खे तेलो साथे मिलेया रा तीन किलो मैदा ओ; ओर खाडूए साथे तेलो साथे मिले रा दो किलो मैदा ओ, 29 ओर सातो पेडा रे एक-एक मिन्टूए साथे तेलो रे मिलेया रा एक किलो मैदा चढ़ाणा। 30 ओर तिजी साथे आपणे पापो रे प्राश्चितो रिया तँईं एक बाकरा बी चढ़ाणा। 31 हर रोज होमबलि ओर नज्जो री बलि ओर अर्घो ते अलावा ये बी चढ़ाणा ओर ये सब बिना नुक्शो रा ओ।