गिणती 27

सलोफादो री बेटिया री बिनती

1 तेबे यूसुफो रे पाऊ मनश्शे रे वंशो रे कुलो बीचा ते सलोफाद, जो हेपेरो रा पाऊ ओर गिलादो रा पोता ओर मनश्शे रे पाऊ माकीरो रा पड़पोता था, तेसरी पाँज बेटिया जिना रे नाओं महला, नोवा, होग्ला, मिल्का ओर तिर्सा ए सेयो मूसे गे आईया। 2 सेयो मिलणे वाल़े तम्बूए रे दरवाजे पाँदे खड़े रे मूसा ओर एलीआजार पुरोईत ओर परदान ओर सारी मण्डल़िया रे सामणे नेड़े आईकि बोलणे लगिया, 3 "आसा रा बाओ सुनसाण जगा रे मरीगा; पर से तेसा मण्डल़िया रा नि था जो कोरह री मण्डल़िया साथे ऊई की यहोवे रे खलाफ कट्ठी ऊई थी, से आपणे ई पापो री बजअ ते मरेया ओर तेसरे कोई पाऊ नि था। 4 तो म्हारे बाओ रा नाओं तेसरे कुलो रे पाऊ नि ऊणे री बजअ ते कऊँ मिटी जाओ? आसा रे चाचेया बीचे आसा खे बी बरासता री जमीना रा कुछ इस्सा देओ।" 5 तिना री ये बिनती मूसे यहोवे गे सुणाई।

6 यहोवे मूसे खे उत्तर दित्तेया, 7 "सलोफादो री बेटिया जो बोलणे लगी रिया से ठीक बोलोईया, इजी खे तूँ तिना रे चाचेया बीचे तिना खे बी जरूर कुछ बरासता री जमीन तिना रे बाओ रा इस्सा तिना खे देई दे। 8 तूँ इस्राएलिया खे ये बोल, ‘जे कोई माणूं बिना पाऊए ते मरी जाओ, तो तेसरा इस्सा तेसरी बेटिया रे आथो रे सम्बाल़ना। 9 ओर जे तेसरे कोई बेटी बी नि ओ तो तेसरा इस्सा तेसरे पाईया खे देणा। 10 ओर जे तेसरे पाई बी नि ओ, तो तेसरा इस्सा चाचेया खे देणा। 11 ओर जे तेसरे कोई चाचा बी नि ओ तो, तेसरे कुलो बीचे तेसरा जो टब्बरो रा सबी ते नेड़े रा ओ तेसखे तेसरा इस्सा देणा कि से तिजी रा अक्कदार ओ। इस्राएलिया खे ये न्याय री रवाज ठईरनी, जेड़ा कि यहोवे मूसे खे आज्ञा दित्ती।’ "

मूसे री जगा पाँदे यहोशूए खे चुणना

12 एकी दिने यहोवे मूसे खे बोलेया, "एस अबीराम नाओं रे पाह्ड़ो पाँदे चढ़ी की तेसा जमीना खे देखी लओ जो मैं इस्राएलिया खे देई राखेया। 13 जेबे तूँ तिजी खे देखी लएगा तिजी ते बाद तूँ बी आपणे पाई हारूणो जेड़ा मरी जाणा, 14 कऊँकि सीन नाओं री सुनसाण जगा दे तुसे दुँईं जणेया मण्डल़िया रे चगड़ने रे बखते मेरी आज्ञा खे नि मानी की मेरा बिद्रोह कित्तेया ओर आँऊ सूबल़ा रे नेड़े तिना री नजरा रे पवित्र मानी की मेरा आदर नि कित्तेया।" ये मरीबा नाओं री सुबल़ ए जो सीन नाओं री सुनसाण जगा रे कादेशो रे ए

15 मूसे यहोवे खे बोलेया, 16 "यहोवा, जो सारे प्राणिया री आत्मा रा परमेशर ए, से एसा मण्डल़िया रे लोका पाँदे केसी मर्दो खे ठराई देओ,*27:16 इब्रानी 12:9 17 ताकि से तेसरे सामणे आया जाया करो ओर तिना खे बारे निकयाल़ने ओर तिना खे आगे चलाणे वाल़ा ओ; से इजी खे कि यहोवे री मण्डल़ी बिना गवाल़े री पेड-बाकरिया जेड़ी नि रओ।"*27:17 मत्ती 9:36, मरक 6:34

18 ओर यहोवे मूसे खे बोलेया, "तूँ नूनो रे पाऊ यहोशूए खे जेसरे मेरा आत्मा बसी रा लई जा ओर तेस पाँदे आपणा आथ राख; 19 ओर तेसखे एलीआजार पुरोईतो रे ओर सारी मण्डल़िया रे सामणे खड़ा करी की तिना सबी रे सामणे तेसखे आज्ञा दे। 20 ओर आपणी महिमा बीचा ते तेसखे कुछ दे, जेते कि सारे इस्राएली लोक तेसरी गल्ल मानेया करो। 21 ओर यहोशू एलीआजार पुरोईतो रे सामणे खड़ा ओया करो ओर एलीआजार तेसखे यहोवे ते ऊरीमो री आज्ञा पूछेया करो ओर तेते फैंसले रे मुताबिक से इस्राएलिया री सारी मण्डल़िया समेत तेसरे बोलणे ते बारे जाया करो ओर तेसरे बोलणे ते वापस बी आया करो।" 22 यहोवे री एसा आज्ञा रे मुताबिक मूसे यहोशूए खे लई की, एलीआजार पुरोईत ओर सारी मण्डल़िया रे सामणे खड़ा करी की, 23 तेस पाँदे आपणे आथ राखे ओर तेसखे आज्ञा दित्ती जेड़ा कि यहोवे मूसे खे बोलेया था।