गिणती 15

नज्जो री बलि ओर अर्घो रा बिधान

1 तेबे यहोवे मूसे खे बोलेया, 2 "इस्राएली लोका खे ये बोल कि जेबे तुसे आपणे रणे खे दित्ते रे देशो रे पऊँचो तेबे जो मां तुसा खे देणा, 3 ओर यहोवे रिया तँईं क्या होमबलि, क्या मेलबलि, कुछ बी चढ़ाओ, चाए से खास मान्नत पूरी करने खे ओ चाए से आपणी इच्छा ते कोई बलि चढ़ाणे रा ओ, चाए कोई तुसा रा कोई खास दिन ओ, या से चाए गाय-बल़द, पेड-बाकरिया खे आगी रे बलि चढ़ाणे रा ओ, जेते की यहोवे खे सुख देणे वाल़ी खुशबू ओ; 4 तेबे जो माणूं तेसा होमबलिया मेलबलिया साथे पेडा रे बच्चे यहोवे खे एक लीटर जैतूनो रे तेलो साथे मिले रा तीन किलो मैदा नज्जो री बलि करी की चढ़ाओ, 5 ओर हर बलिया रे पेडा रे बच्चे साथे एक लीटर अंगूरा रा रस अर्घ करी की चढ़ाणा। 6 ओर जेबे तुसे खाडूए री बलि देओ तो डेढ़ लीटर जैतूनो रे तेलो साथे मिलेया रा चार किलो मैदा नज्जो री बलि करी की चढ़ाणा; 7 ओर तेते नज्जो री बलिया रा अर्घ यहोवे खे अच्छी खुशबू देणे वाल़ा 250 ग्राम अंगूरा रा रस चढ़ाणा, 8 ओर जेबे तूँ यहोवे खे होमबलिया री कोई खास मान्नत पूरी करने खे बलि या मेलबलि करी की बाच्छू चढ़ाओ, 9 तेबे बाच्छूए खे चढ़ाणे वाल़ा तेस साथे दो लीटर तेलो साथे मिलेया रा 6 किलो मैदा नज्जो री बलि करी की चढ़ाओ। 10 ओर तिजी साथे दो लीटर अंगूरा रा रस चढ़ाओ, से यहोवे खे सुख देणे वाल़ी खुशबू आगी रे चढ़ाई री बलि ऊणी।"

11 एक-एक बल़द या खाडू या पेडा रे बच्चे या बाकरिया रे बच्चे साथे ईंयाँ ई चढ़ावा चढ़ाया जाओ। 12 तुसा रे बलिया रे डांगरो री जितणी गिणती ओ, तेसा ई गिणतिया रे मुताबिक एकी-एकी साथे एड़ा ई करेया करो। 13 जितणे इस्राएल देशो रे ओ सेयो यहोवे खे सुखदायक खुशबू देणे खे आगी रे चढ़ाई री बलि चढ़ांदे बखते ईंयाँ ई करेया करो।

परदेशिया रिया तँईं बिधान

14 ओर जे कोई आऊणे वाल़ी पीढ़िया रे परदेशी या ओर कोई जो तुसा साथे रओआ ओर से यहोवे खे सुख देणे वाल़ी खुशबू आगी रे चढ़ाई री बलि चढ़ाणा चाओ तो जिंयाँ तुसे करोगे तिंयाँ ई से बी करो। 15 मण्डल़िया रे तुसा लोका खे ओर तुसा साथे रणे वाल़े परदेशी दोनो खे एक ई रवाज तुसा री पीढ़िया-पीढ़िया रे सदा खे ठईरो; जेड़े तुसे ए तेड़े ई परदेशी बी यहोवे खे रणे। 16 तुसा खे ओर तुसा साथे रणे वाल़ेया परदेशिया खे एक ई रवाज ओर एक ई बिधान ए।

17 तेबे यहोवे मूसे खे बोलेया, 18 "इस्राएलिया खे मेरा ये वचन सुणा कि जेबे तुसे तेस देशो रे पऊँचो जेती आँऊ तुसा खे लई चली रा, 19 ओर जेबे तुसे तेते देशो रे पैदा ऊणे वाल़ा नज्ज खाओ, तेबे यहोवे रिया तँईं चकी री पवित्र पेंट चढ़ाया करो। 20 आपणे पईले गूँदे रे आटे री एक पापड़ी चकी री पेंट करी की यहोवे खे चढ़ाणी; जिंयाँ तुसे खल्याणो ते पईली फसला बीचा ते कुछ चकी की पेंट चढ़ाओगे तिंयाँ ई से बी चढ़ाया करनी। 21 आपणी हर पीढ़िया रे आपणे पईले गूँदे रे आटे बीचा ते कुछ चकी की यहोवे खे पेंट देया करनी।"

पूला ते कित्तेया रा पाप

22 एबे जे तुसे मण्डल़िया रे लोक इना सबी आज्ञा बीचा ते जो यहोवे मूसे खे दित्ती थी तिना बीचा ते कोई बी अणजाणे रे नि मानी तो, 23 मतलब जेस दिनो ते यहोवा आज्ञा देणे लगेया ओर आगली तुसा री पीढ़िया-पीढ़िया रे तेस दिनो ते तिने जो आज्ञा मूसे रे जरीये दित्ती नि मानी तो, 24 जे तुसा ते ये पाप अणजाणे रे ते ऊई रा ओर मण्डल़िया खे पता नि ओ तो सारी मण्डल़ी यहोवे खे सुखदायक खुशबू देणे वाल़ा होमबलि करी की एक बाच्छू ओर तिजी साथे रवाजा रे मुताबिक तिजी री नज्जो री बलि ओर अर्घ चढ़ाओ ओर पापबलिया खे एक बाकरा चढ़ाओ। 25 तेबे पुरोईत इस्राएलिया री सारी मण्डल़िया खे प्राश्चित करो तो तिना खे माफ कित्तेया जाणा; कऊँकि तिना रा पाप अणजाणे ते ऊईरा ओर सेयो आपणी पूला रिया तँईं यहोवे रे सामणे बलिदान ल्याए ओर आपणी पापबलि ओर नज्जो री बलि तेस सामणे चढ़ाई। 26 इजी खे इस्राएलिया री सारी मण्डल़िया रा ओर तिना बीचे रणे वाल़े परदेशिया रा बी से पाप माफ कित्तेया जाणा, कऊँकि से पाप सबी ते अणजाणे रे ऊईरा।

27 पर जे कोई एक माणूं पूला ते कोई पाप करो तो से पापबलि चढ़ाणे खे एकी सालो री बाकरी ली आओ। 28 पुरोईत अणजाणे ते पाप करने वाल़े माणूंए रिया तँईं यहोवे रे सामणे प्राश्चित करो; तेबे एस प्राश्चितो री बजअ ते तेसरा से पाप माफ कित्तेया जाणा। 29 जो कोई अणजाणे ते कोई पाप करो, चाए से इस्राएली देशो रा ओ या तुसा बीचे परदेशी ऊई की रओआ, सबी खे तुसा रा एक ई बिधान ओ।

जाणी बूजी की कित्ते रे पापो रा बिधान

30 आपणे देशो रा चाए परदेशो रा जो कोई माणूं जाणी-बूजी की पाप करोआ, तो से यहोवे रा बेज्जती करने वाल़ा ठईरना ओर से माणूं आपणे लोका बीचा ते निकाल़ेया जाओ। 31 से माणूं जो यहोवे रा वचन तुच्छ जाणोआ ओर तेसरी आज्ञा नि मानदा, इजी खे से माणूं जरूर आपणे लोका बीचा ते निकाल़ेया जाओ ओर तेसखे तेसरे पापो री सजा मिलणी।

रामो रे दिनो खे ना मानणे री सजा

32 जेबे इस्राएली लोक सुनसाण जगा रे रओ थे, तिना खे एक माणूं रामो रे दिने लकड़ी कट्ठा करदा ऊआ मिलेया। 33 तेबे जिना लोका खे से लकड़ी कट्ठा करदा ऊआ मिलेया, सेयो तेसखे मूसा ओर हारूण ओर सारी मण्डल़िया गे लईगे। 34 तिने से जेला रे राखेया, कऊँकि एड़े माणूंए ते क्या करना चाईयो से बताई नि राखेया था। 35 तेबे यहोवे मूसे खे बोलेया, "से आदमी जरूर मारेया जाओ; सारी मण्डल़िया रे लोक डेरे रे बारे तेस पाँदे पात्थर बाओ।" 36 जेड़ी यहोवे मूसे खे आज्ञा दित्ती थी तिजी रे मुताबिक सारी मण्डल़िया रे लोके तेसखे डेरे ते बारे लई जाई की पात्थर बाए ओर से मरीगा।

याद कराणे वाल़ी चालर

37 तेबे यहोवे मूसे खे बोलेया, 38 "इस्राएली लोका खे बोल कि आपणी हर पीढ़िया रे आपणे टाल्लेया रे कनारिया पाँदे चालर लगाया करनी ओर एकी-एकी कनारिया री चालरा पाँदे एक नीला फीथा लगाया करना; 39 ओर से चालर इजी खे ए कि जेबे-जेबे तुसे तिजी खे देखो तेबे-तेबे यहोवे री सारी आज्ञा तुसा खे याद आई जाओ ओर तुसे तिजी खे मानेया करो ओर तुसे आपणे-आपणे मन ओर आपणी-आपणी नजरा रे वशो रे ऊई की व्याभिचार नि करो जेड़ा करदे आई रे।*15:39 रोमी 11:16, मत्ती 23:5 40 तेबे तुसे यहोवे री सारी आज्ञा खे याद करी की तिजी खे मानो ओर आपणे परमेशरो खे पवित्र बणो। 41 आँऊ यहोवा तुसा रा परमेशर ए, जो तुसा खे मिस्र देशो ते निकयाल़ी की ली आया कि आँऊ तुसा रा परमेशर ठईरूँ; कऊँकि आँऊ तुसा रा परमेशर यहोवा ए।"