गिणती 12

मूसे री खराईया रा सबूत

1 मूसे तो एक कूशी जवाणसा साथे ब्या करी ला था। इजी खे मरियम ओर हारूण तेसरी तेसा ब्याई री कूशी जवाणसा रे खलाफ बोलणे लगे; 2 तिने बोलेया, "यहोवे मूसे साथे ई गल्ला नि कित्तिया बल्कि तिने आसा साथे बी गल्ला कित्तिया।" तिना री ये गल्ल यहोवे सुणी। 3 एबे मूसा तो सारी तरतिया पाँदे रणे वाल़े माणूंआ ते बऊत ज्यादा नम्र सबाओ रा था।

4 इजी खे तेबुई यहोवे मूसा ओर हारूण ओर मरियमा खे बोलेया, "तुसे तीनो मिलणे वाल़े तम्बूए गे चली जाओ।" तेबे सेयो तीनो निकल़ी की आईगे। 5 तेबे यहोवे बादल़ो रे खम्बे रे उतरी की तम्बूए रे दरवाजे पाँदे खड़े ऊई की हारूण ओर मरियमा खे बुलाया; जेबे सेयो दोनो निकल़ी की यहोवे गे आईगे।

6 तेबे यहोवे बोलेया, "मेरिया गल्ला सुणो, जे कोई तुसा बीचे भविष्यवक्ता ओ, तो तेस पाँदे आऊँ यहोवा आपणे आपू खे दर्शणो रे जरीये प्रगट करूँगा या सुफने रे तेस साथे गल्ला करूँगा। 7 पर मेरा दास मूसा एड़ा निए; से तो मेरे सबी इस्राएली लोका बीचे सच्चा ए। 8 तेस साथे आऊँ चोरिए नि, पर आमणे-सामणे ओर साफ-साफ गल्ला करूँआ ओर से मां यहोवे रा रूप सामणे देखोआ। इजी खे तुसा खे मेरे दास मूसे री निन्दा नि करनी चाईयो।" 9 यहोवा मरियम ओर हारूणो पाँदे बऊत गुस्से ऊआ ओर यहोवा तेथा ते चलीगा; 10 जेबे बादल़ तम्बूए पाँदा ते उठीगा ओर मरियम कोढ़ो रे रोगो ते बर्फा जेड़ी सफेद ऊईगी ओर हारूणे मरियमा री तरफा खे देखेया कि से कोढ़ी ऊईगी री।

11 हारूणे मूसे खे बोलेया, "ओ मेरे स्वामी; आसे दुँईं जणेया जो मूर्खो जेड़ा काम करी की पाप कित्तेया, ये पाप आसा पाँदे नि लगणे दे। 12 मरियमा खे तेसा मरी री पैदा ऊई री बेटिया जेड़ी नि राख, जेसा रा जिस्म आपणी माया रे पेटो ते निकल़दे ई आदा गल़ेया रा ओ।" मतलब कदी-कदी एड़ा बच्चा आदी गल़ी री चामड़िया जेड़ा जम्मोआ।

13 तेबे मूसे यहोवे ते अर्ज करी की बोलेया, "ओ परमेशर, मईरबानी करी की एसा खे एते बमारिया ते ठीक करी दे।"

14 पर यहोवे मूसे खे बोलेया, "जे तेसा रा बाओ तेसा खे थिड़कदा, तो क्या से साता दिना तक शर्मिंदा नि रंदी? इजी खे से साता दिना तक डेरे ते बारे रओ, तिजी ते बाद से पीतरे आई जाओ।"

15 तेबे मरियम साता दिना तक डेरे ते बारे रई ओर जदुए तक मरियम फेर वापस नि आई तदुए तक लोक तेथा ते आगे नि गए। 16 तेसा रे आऊणे ते बाद तिने हसेरोतो ते चली की पारान नाओं री सुनसाण जगा रे आपणे डेरे खड़े कित्ते।