गिणती 20

मरियमा री मौत

1 आगले सालो रे पईले मीन्ने रे सारी इस्राएली मण्डल़िया रे लोक सीन नाओं री सुनसाण जगा रे आईगे ओर कादेश शईरो रे रणे लगे ओर तेती मरियम मरी गी ओर तेती तेसा खे माट्टी दित्ती मतलब से दबाईती।

मूसा ओर हारूणो रा पाप

2 तेती मण्डल़िया रे लोका खे पाणी नि मिलेया; इजी खे सेयो मूसा ओर हारूणो रे खलाफ कट्ठे ऊए। 3 सेयो लोक ये बोली कि मूसे ते शकाईत करने लगे, "पला ऊँदा कि आसे तेस बखते ई मरी जांदे जेबे आसा रे पाई यहोवे रे सामणे मरीगे! 4 तुसे यहोवे री मण्डल़िया खे एते सुनसाण जगा रे कऊँ ली आई रे कि आसे आपणे डांगरा समेत एती मरी जाईए? 5 ओर तुसे आसे मिस्रो ते कऊँ निकयाल़ी कि एसा बुरिया जगा रे पऊँचाए? एती ना तो नज्ज ए, ना ई दाऊगल़े या अंगूर या अनार कुछ पनिए, एथो तक कि पीणे खे पाणी पनिए।"*20:5 इब्रानी 3:8 6 तेबे मूसा ओर हारूण मण्डल़िया रे लोका बीचा ते निकल़ी की पवित्र तम्बूए रे दरवाजे पाँदे जाई कि आपणे मुंए रे पारे पड़ी गे ओर यहोवे री महिमा तिना खे दिशी।

7 यहोवे मूसे खे बोलेया, 8 "एसा आपणियां सोठिया खे लओ ओर तूँ आपणे पाई हारूणो समेत मण्डल़िया रे लोका खे कट्ठा करी कि तिना रे देखदे-देखदे एसा चट्टानी ते गल्ला कर, तेबे तेसा आपणा पाणी देणा; ईंयाँ तूँ चट्टानी बीचा ते तिना खे पाणी निकयाल़ी कि मण्डल़िया रे लोका खे ओर तिना रे डांगरा खे पल़्या।" 9 यहोवे री एसा आज्ञा रे मुताबिक मूसे यहोवे रे सामणे ते सोठी लई ली।

10 फेर मूसे ओर हारूणे मण्डल़िया खे तेसा चट्टानी रे सामणे कट्ठा कित्तेया, तेबे मूसे तिना लोका खे बोलेया, "ओ तोखा करने वाल़ेयो, सुणो; क्या आसा खे एसा चट्टानी बीचा ते तुसा खे पाणी निकयाल़ना पड़ना?" 11 तेबे मूसे चट्टानी ते गलाणे री बजाए सोठी चकी की चट्टानी पाँदे दो बार बाई ओर तिजी ते बऊत पाणी निकल़ेया, तेबे मण्डल़िया रे लोक आपणे डांगरा समेत पीणे लगे।*20:11 1 कुरिन्थ 10:4 12 पर मूसा ओर हारूणो खे यहोवे बोलेया, "तुसे जो मां पाँदे विश्वास नि कित्तेया ओर आँऊ इस्राएलिया री नजरा सामणे पवित्र नि जाणेया, इजी खे तुसे एसा मण्डल़िया खे तेस देशो रे पऊँचाई नि सकणे जो मैं तिना खे देई राखेया।" 13 तेते जगा रा नाओं मरीबा पड़ेया जेती इस्राएलिये यहोवे ते बईस कित्ती थी ओर जेती यहोवे तिना बीचे आपू खे पवित्र साबित कित्तेया।

एदोमो रे राजे रे जरीये बाट नि देणी

14 फेर मूसे कादेशो ते एदोमो रे राजे गे दूतो रे जरीये ये संदेशा पेजेया, "तेरा पाई इस्राएल ये बोलोआ कि आसा पाँदे जो-जो क्ल़ेश पड़े से तूँ जाणेया; 15 म्हारे बुजुर्ग मिस्रो रे गए थे ओर आसे मिस्रो रे बऊत दिना तक रये; जेती मिस्रिए आसा रे बुजुर्ग ओर आसा साथे बऊत बुरा बर्ताव कित्तेया; 16 पर जेबे आसे यहोवे री दुहाई दित्ती तेबे तिने मारी सुणी ओर एकी दूतो खे पेजी की आसा खे मिस्रो ते निकयाल़ी की ली आया; इजी खे एबे आसे कादेश शईरो रे ए जो तेरे ई बन्ने पाँदे ए। 17 इजी खे एबे आसा खे आपणे देशो बीछीए जाणे दे। आसे वादा करूँए कि आसे केसी डोरूए रे या दाखा रे बगीचे रिये ऊई की नि चलूँगे ओर तुसा रे कुएँ रा पाणी पनि पिऊँगे; आसे सड़का-सड़का रिये ऊई की चलूँगे ओर जदुए तक तेरे देशो ते बारे नि चली जाऊँगे तदुए तक आसा बीचा ते कोई ना दाँणे ना खूँजे कनारे मुड़ने।" 18 पर एदोमो रे राजे तेसगे संदेशा पेजेया, "तूँ मेरे देशो रिये ऊई कि नि जा, जे तूँ जबरन जाणे री कोशिश करो तो मां आपणी सेना तलवार लई की तेरा मुकाबला करने खे पेजणी।" 19 इस्राएलिए फेर तेसगे संदेशा पेजेया, आसे सड़का-सड़का रिये ई चलूँगे ओर जे आसे या आसा रे डांगर तुसा रा पाणी पिओगे, तो आसे तिजी रा मोल देऊँगे, आसा खे ओर कुछ नि चाईयो, बस पैरा जोगी जगा जाणे खे चाईयो। 20 पर एदोमो रे राजे बोलेया, "तूँ आई नि सकणा।" ओर एदोम बड़ी सेना लई कि तागती साथे तेसरा मुकाबला करने खे निकल़ेया। 21 ईंयाँ एदोमे इस्राएलो खे आपणे देशो रिये ऊई की जाणे देणे ते ना करी ती। तेबे इस्राएल तेसरी तरफा ते मुड़ी की चलीगा।

हारूण पुरोईतो री मौत

22 तेबे सारे इस्राएली लोक कादेश शईरो ते निकल़ी की होर नाओं रे पाह्ड़ो रे नेड़े आईगे।*20:22 गिण. 33:37, 21:4 23 ओर एदोम देशो रे बन्ने पाँदे होर पाह्ड़ो पाँदे यहोवे मूसा ओर हारूणो खे बोलेया, 24 "हारूण आपणे मरे रे बुजुर्गा साथे मिली जाणा; तुसे दुँईं जणेया जो मरीबा नाओं री सूबल़ा गे मेरा कईणा नि मानी की मां साथे तोखा कित्तेया, इजी री बजअ ते से तेस देशो रे नि जाई सकणा जो मैं इस्राएलिया खे देई राखेया।*20:24 बिध. 32:50 25 एबे तूँ हारूण ओर तेसरे पाऊ एलीआजारो खे होर पाह्ड़ो पाँदे लई चल; 26 ओर हारूणो रे टाल्ले खुलाई की तेसरे पाऊ एलीआजारो खे पणयाई दे; कऊँकि हारूण तेथी आपणे मरे रे बुजुर्गा साथे मरी की मिली जाणा।" 27 यहोवे री तेसा आज्ञा रे मुताबिक मूसे कित्तेया; सेयो सारी मण्डल़िया रे देखदे होर पाह्ड़ो पाँदे चढ़ीगे। 28 तेबे मूसे हारूणो रे टाल्ले खुलाई की तेसरे पाऊ एलीआजारो खे पणयाए ओर हारूण तेथी पाह्ड़ो पाँदे मरी गा। तेबे मूसा ओर एलीआजार पाह्ड़ो पाँदा ते उतरी गे। 29 ओर जेबे इस्राएलो री सारी मण्डल़िए देखेया कि हारूणो रे प्राण निकल़ी गे, तेबे इस्राएलो रे सारे कराने रे लोक तेसखे 30 दिना तक दुख मनांदे रये।*20:29 उत्प. 50:3, बिध. 34:8