1 यहोवे मूसे खे बोलेया, 2 "तूँ मण्डल़िया खे बुलाणे रिया तँईं ओर छावणिया ते कदी निकल़ना तिजी खे चाँदिए रे दो रड़सिंगे बणाई लओ। 3 जेबे सेयो दो बार बजाए जाओ, तेबे सारी मण्डल़ी मिलणे वाल़े तम्बूए रे दरवाजे पाँदे तांगे कट्ठी ऊई जाओ। 4 जे एक ई बार रड़सिंगा बजाया जाओ, तो इस्राएलो रे कुलो रे खास परदान मर्द जो बारा गोत्रा रे लोक ए सेयो तांगे कट्ठे ऊई जाओ। 5 जेबे तुसे लोक रड़सिंगे खे पईले जोरे की बजाओ, तो पूर्व दिशा री छावणिया रे गोत्रो रे लोक चलणा शुरू करी देओ। 6 ओर जेबे तुसा लोका खे दूजी बार रड़सिंगे री आवाज जोरे की सुणो, तेबे दक्खण दिशा री छावणिया रे गोत्रो रे लोक चलणा शुरू करी देओ। ये बजाणे री आवाज तिना खे चलणे रा ईशारा ऊणा। 7 पर जेबे लोका खे कट्ठा करी की सभा करनी ओ तेबे बी रड़सिंगा बजाणा पर जोरे की नि बजाणा। पर ये निकल़ी की चली पड़ने खे नि ऊणा। 8 ओर हारूणो रे वंशो रे लोक जो पुरोईत ये सेयो तिना रड़सिंगेया खे बजाया करो। इना रड़सिंगेया खे ईंयाँ बजाणा तुसा री पीढ़िया ते पीढ़िया तक सदा खे एक रवाज रओ। 9 ओर जेबे तुसे आपणे देशो रे केसी सताणे वाल़े दुश्मणो ते लड़ने खे निकल़ो, तेबे रड़सिंगेया खे जोरे की बजाणा, तेबे तुसा रे परमेशर यहोवे खे तुसे याद आऊणे ओर तुसे आपणे दुश्मणा ते बचाए जाणे। 10 आपणी खुशिया रे दिना रे ओर आपणे ठराए रे त्योआर मनांदे बखते ओर नये चाँदो रे त्योआरो रे ओर आपणी होमबलि ओर मेलबलि चढ़ांदे बखते रड़सिंगेया खे बजाणा; इजी ते तुसा रे परमेशरो तुसा साथे कित्तेया रा वादा याद करना कऊँकि आऊँ तुसा रा परमेशर यहोवा ए।"

11 इस्राएली लोका रा मिस्र देशो ते निकल़ी की आऊणे रे दूजे सालो रे दूजे मीन्ने रे 20 वे दिने बादल़ गवाईया रे मिलणे वाल़े तम्बूए पाँदा ते उठीगा, 12 तेबे इस्राएली सीनै री सुनसाण जगा ते निकल़ी की एकी जगा ते दूजी जगा खे चली पड़े ओर बादल़ पारान नाओं री सुनसाण जगा रे रूकी गा। 13 तिना रा चलणा यहोवे री तेसा आज्ञा रे मुताबिक ऊआ जो तिने मूसे खे दित्ती थी। 14 ओर सबी ते पईले यहूदा गोत्रो री छावणिया रे लोक चलणे लगे, ओर सेयो आपणे चूण्ड बणाई की चले ओर तिना रा सेनापति अम्मीनादाबो रा पाऊ नहशोन था।

15 ओर इस्साकारो रे गोत्रो रा सेनापति सूआरो रा पाऊ नतनेल था।

16 ओर जबूलूनो रे गोत्रो रा सेनापति हेलोनो रा पाऊ एलीआब था।

17 तेबे मिलणे वाल़ा तम्बू उतारेया ओर गेर्शोनी ओर मरारी लोक पवित्र तम्बू लई की चली पड़े।

18 तेबे रूबेन गोत्रो री छावणिया रे लोक चले ओर सेयो आपणे चूण्डो रे मुताबिक चले ओर तिना रा सेनापति शदेऊरो रा पाऊ एलीसूर था।

19 ओर शिमोन गोत्रो रा सेनापति सुरीशद्दैए रा पाऊ शलूमीएल था।

20 ओर गाद गोत्रो रा सेनापति दूएलो रा पाऊ एल्यासाप था।

21 तेबे कहातिया रे कुलो रे लोक पवित्र चीजा चकी की चली पड़े ओर तिना रे पऊँचणे ते पईले ई गेर्शोनी ओर मरारी लोके मिलणे वाल़ा तम्बू तेते नई जगा रे खड़ा करिता।

22 फेर एप्रैम गोत्रो री छावणिया रे लोक चलणे लगे ओर सेयो बी चूण्ड बणाई की चले ओर तिना रा सेनापति अम्मीहूदो रा पाऊ एलीशामा था।

23 ओर मनश्शे गोत्रो रा सेनापति पदासूरो रा पाऊ गम्लीएल था।

24 ओर बिन्यामीन गोत्रो रा सेनापति गिदोनो रा पाऊ अबीदान था।

25 आखरी रे दान गोत्रो रे लोक जो रक्षा करने वाल़े थे जो सबी छावणिया ते पीछे थे चलणे लगे ओर सेयो आपणे चूण्ड बणाई की चले ओर तिना रा सेनापति अम्मीशद्दै रा पाऊ अहीएजेर था।

26 ओर आशेर गोत्रो रा सेनापति ओक्रानो रा पाऊ पगीएल था।

27 ओर नप्ताली गोत्रो रा सेनापति एनानो रा पाऊ अहीरा था।

28 जेबे-जेबे इस्राएली गोत्रो रे लोक आपणे-आपणे चूण्डो रे मुताबिक चलो थे तेबे-तेबे सेयो ईंयाँ ई आगे बढ़ो थे।

29 एकी दिने मूसे आपणे सऊरे रूएल मिद्दानिये रे पाऊ होबाबो खे बोलेया, "आसे लोक तेते जगा री यात्रा करने लगी रे जेतेरे बारे दे यहोवे आसा खे बोलेया, ‘मां से तुसा खे देणी’; इजी खे तूँ बी आसा साथे चल ओर आसा तेरा पला करना; कऊँकि यहोवे इस्राएलो रे बारे दे पलाई करने रा वादा करी राखेया।"

30 पर होबाबे तेसखे जबाब दित्तेया, "मां नि जाणा; मां आपणे देश ओर टब्बरो वाल़ेया गे वापस चली जाणा।"

31 तेबे बी मूसे बोलेया, "आसा खे नि छाड, कऊँकि एते सुनसाण जगा रे केई-केई डेरा खड़ा करना चाईयो, ये ताखे ई पता ए तां ई आसा खे सई बाट बताणी। 32 ओर जे तूँ आसा साथे चलो, तो पक्का जो पलाई यहोवे आसा साथे करनी तिजी रे मुताबिक आसा बी तां साथे सब कुछ मिली की बाँडणा।"

33 तेबे इस्राएलिए यहोवे रे पाह्ड़ो पाँदा ते निकल़ी की तिऊँ दिना रा सफर कित्तेया ओर तिना तिऊँ दिना री बाटा रे यहोवे री वाचा रा सन्दूक तिना खे रामो री जगा टोल़दा ऊआ तिना रे आगे-आगे चलदा रया। 34 जेबे से डेरे री जगा छाडी की तेथा ते चलो थे तेबे हर रोज यहोवे रा बादल़ तिना पाँदे छांए करदा रओ था। 35 ओर जेबे-जेबे लोक वाचा रा सन्दूक लई की चलो थे तेबे-तेबे मूसा ये बोलेया करो था,

"ओ यहोवा उठ ओर तेरे दुश्मण चऊँ कनारे बिखरी जाओ

ओर तेरे बैरी तेरे सामणे ते नठी जाओ।"

36 ओर जेबे-जेबे से रूकी जाओ था तेबे-तेबे मूसा बोलेया करो था,

"ओ यहोवा, ह्जारो-ह्जार इस्राएलिया गे

वापस आईजा।"