गिणती 30

मान्नत मानणे री बिधि

1 मूसे इस्राएली गोत्रो बीचा ते खास-खास मर्दा खे बोलेया, "यहोवे ये आज्ञा देई राखी: 2 जेबे कोई मर्द यहोवे री मान्नत मानो या आपणे आपू खे यहोवे साथे वादा करी की कसम खाओ, तो से आपणा वादा नि तोड़ो; बल्कि जो कुछ तेसरे मुंए ते निकल़ो तिजी रे मुताबिक से करो।*30:2 मत्ती 5:33 3 ओर जेबे कोई जवाणस आपणी कँवारी उम्रा रे, आपणे माए-बाओ रे कअरे रंदे ऊए, यहोवे री मान्नत मानो ओर आपू खे वाचा ते बानो, 4 तो जे तेसा रा बाओ तेसा री मान्नत या तेसा रा ये वचन सुणी की, जेते की तेसे आपणे आपू खे बानी राखेया ओ, तेसा खे कुछ नि बोलो; तेबे तो तेसा री सारी मान्नता बणी री रओ ओर कोई बन्दन कऊँ नि ओ, जेते की तेसे आपणे आपू खे बानी राखेया ओ, से बी बणेया रा रओ। 5 पर जे तेसा रा बाओ तेसा री दित्ती री मान्नता रे बारे दे सुणी की तेसी दिने तेसा रा बरोद करो, तो तेसा री मान्नत या ओरी किस्मा रे बन्दन, जेते की तेसे आपणे आपू खे बानी राखेया ओ, तिना बीचा ते एक बी बणेया रा नि रओ ओर यहोवे ये जाणी की कि तेसा जवाणसा रे बाओ तेसा रा बरोद करी राखेया, इजी रिया तँईं यहोवा तेसा खे एसा मान्नता खे ना पूरा करने रिया बजअ ते माफ करोगा। 6 फेर जे से लाड़े रे वशो रे ओ ओर मान्नत मानो या बिना सोचे समजे एड़ा कुछ बोलो जेते की से बन्दनो रे पड़ो, 7 ओर जे तेसा रा लाड़ा सुणी की तेस दिने तेसा खे कुछ नि बोलो; तेबे तो तेसा री मान्नत बणी री रओ ओर जिने बन्दने की तेसे आपणे आपू खे बानी राखेया ओ से बी बणेया रा रओ। 8 पर जे तेसा रा लाड़ा सुणी की तेसी दिने तेसा खे ना करी देओ, तो जो मान्नत तेसे मानी री ओ ओर जो गल्ल बिना सोच-बिचार कित्ते बोलणे ते तेसे आपणे आपू खे वादा करी की बानी राखेया ओ, से टूटी जाणा ओर यहोवा तेसा जवाणसा खे माफ करो।"

9 फेर बिदुआ या छाडी री जवाणसा री मान्नत या केसी किस्मा रे वादे रा बन्दन कऊँ नि ओ, जेते की तेसे आपणे आपू खे बानी राखेया ओ, तो से बणेया रा रओ।

10 फेर जे कोई जवाणस आपणे लाड़े रे कअरे रंदे ऊए मान्नत मानो, या कसम खाई की आपणे आपू खे बानो, 11 ओर तेसा रा लाड़ा तेसा गल्ला खे सुणी की कुछ नि बोलो ओर ना तेसा रा बरोद करो; तेबे तो तेसा री सारी मान्नता बणी री रओ ओर हर एक बन्दन कऊँ नि ओ जेते की तेसे आपणे आपू खे बानी राखेया ओ, से बणेया रा रओ। 12 पर जे तेसा रा लाड़ा तेसा री मान्नत सुणी की तेसी दिने पूरी रीतिया ते तोड़ी देओ, तो तेसा री मान्नत, जो कुछ तेसा रे मुंए ते आपणे बन्दनो रे बारे दे निकल़ेया रा ओ, तिजी बीचा ते एक बी गल्ल बणी री नि रओ कऊँकि तेसा रे लाड़े सब तोड़ी ता रा; इजी खे यहोवे तेसा जवाणसा खे माफ करना। 13 कोई बी मान्नत या कसम कऊँ नि ओ, जेते की तेसे जवाणसे आपणे ई खलाफ वादा करी राखेया ओ, तिजी खे तेसा रा लाड़ा चाए तो मजबूत करो ओर चाए तोड़ी देओ; 14 मतलब जे तेसा रा लाड़ा रोज-रोज तेसा खे कुछ बी ना बोलो, तो से तेसा खे सबी मान्नता ओर बन्दनो ते जिने की से बानी री ओ मजबूत करी देओआ कऊँकि तिने सुणने रे दिनो ते तिजी रे बारे दे कुछ नि बोलेया। इजी खे तिने से मजबूत कित्ते राए, 15 ओर जे से तिजी खे सुणी की बऊत दिन ऊणे ते बाद तोड़ी देओ, तो तेसखे आपणी जवाणसा रे पापो री सजा मिलणी। 16 यहोवे मूसे खे लाड़े-लाड़िया रे आपू बीचले सम्बन्दो रे बारे दे ओर बाओ ओर तेसरे कअरे रंदे ऊए कँवारी बेटिया रे सम्बन्दो रे बारे दे, जिना बिदिया री आज्ञा दित्ती से येई ए।