गिणती 9

दूजी बार फसह रा त्योआर

1 यहोवे सीनै री सुनसाण जगा रे मूसे खे इस्राएलिया रे मिस्र देशो ते निकल़ने रे दूजे सालो रे पईले मीन्ने दे एड़ा बोलेया, 2 "इस्राएली लोका खे एड़ा बोल कि फसह रे त्योआरो खे तिजी रे ठीक बखतो पाँदे मनाया करो। 3 एस ई मीन्ने रे चौदुए दिने साँजके बखते तुसे लोक तिजी खे सबी रवाजा रे मुताबिक तिजी रे ठराए रे बखतो पाँदे मानणा।"

4 तेबे मूसे इस्राएली लोका खे फसह रा त्योआर मनाणे खे बोली ता। 5 ओर इस्राएलिये पईले मीन्ने रे 14 वे दिने साँजके बखते सीनै री सुनसाण जगा रे तिंयाँ ई फसह रा त्योआर मनाया जिंयाँ यहोवे मूसे खे आज्ञा दित्ती थी। 6 पर तिना बीचा ते कुछ लोक तेस दिने एकी माणूंए री मौत ऊणे री बजअ ते ओर तेसरी लाश दबाणे री बजअ ते अशुद्ध ऊईगे थे तेसी बजअ ते सेयो फसह रा त्योआर नि मनाई सके; इजी खे सेयो तेसी दिने मूसा ओर हारूणो गे जाई कि मूसे ते पूछणे लगे, 7 "आसे एकी माणूंए री लाश छूणे रिया बजअ ते अशुद्ध ऊईगे रे; पर आसे इस्राएली लोका साथे ठराए रे सई बखतो पाँदे यहोवे खे चढ़ावा कऊँ नि चढ़ाईए?"

8 मूसे तिना खे बोलेया, "ठईरो, आऊँ सुणी लऊँ यहोवा तुसा खे इजी रे बारे दे क्या आज्ञा देओआ।"

9 इजी खे मूसा तम्बूए रे यहोवे ते पूछणे खे गया ओर यहोवे मूसे खे ईंयाँ बोलेया, 10 "इस्राएलिया खे बोल कि चाए तुसा लोका बीचा ते या तुसा रे वंशो बीचा ते कोई बी केसी लोथा री बजअ ते अशुद्ध ऊईगा ओ या दूरो री यात्रा पाँदे ओ, तेबे बी से यहोवे खे फसह रा त्योआर मनाई सकोआ। 11 पर सेयो तिजी खे दूजे मीन्ने रे 14 वे दिने साँजके बखते ई मनाओ ओर सेयो तेस फसह रे बलि कित्ते रे डांगरो रे मासो खे बिना सजेड़े री रोटी ओर कड़ुए सागो साथे खाओ। 12 सेयो तिजी बीचा ते कुछ बी प्यागा खे नि राखो, ओर ना तेस फसह रे मिन्टूए री कोई आड्डी तोड़ो सेयो तेस फसह रे त्योआरो री सारी रवाजा खे मानो।*9:12 यूह. 19:36 13 पर जे कोई माणूं शुद्ध ऊँदे ऊए या सफर ना करदे ऊए फसह रे त्योआरो खे नि मानो, तेबे से माणूं आपणे लोका बीचा ते नाश कित्तेया जाओ, कऊँकि तेस माणूंए खे यहोवे रा चढ़ावा सई बखतो पाँदे नि ल्याऊणे री बजअ ते आपणे पापो री सजा पुगतणी पड़नी। 14 जे कोई परदेशी तुसा साथे रओआ तो से बी यहोवे खे फसह रा त्योआर रवाजा रे नियमा रे मुताबिक मनाओ, जे से देसी ओ या परदेशी तिना दुँईं खे एक ई बिधान रणा।"

रणे री जगा पाँदे बादल़ ओर आग

15 जेस दिने लेविए मिलणे वाल़ा तम्बू जेते खे गवाईया रा तम्बू बी बोलेया जाओआ खड़ा कित्तेया, तेस दिने बादल़ तेस पाँदे आई की ठईरी गा ओर से बादल़ तेस मिलणे वाल़े तम्बूए पाँदे साँजा ते प्यागा तक आगी जेड़ा दिशदा रया। 16 हर रोज एड़ा ई ओया करो था कि दिनो खे बादल़ आई जाओ था ओर राती खे आग दिशो थी। 17 ओर जेबे बादल़ मिलणे वाल़े तम्बूए पाँदा ते उठी जाओ था तेबे इस्राएली लोक तेथा ते चली पड़ो थे ओर जेते जगा पाँदे बादल़ रूकी जाओ था तेथी इस्राएली लोक आपणे डेरे खड़े करो थे। 18 यहोवे री आज्ञा ते इस्राएली आपणा तम्बू निकयाल़ी की चली पड़ो थे ओर यहोवे री आज्ञा तेई सेयो डेरे खड़े करो थे ओर जितणे दिना तक से बादल़ पवित्र तम्बूए पाँदे ठईरेया रा रओ था तितणे दिना तक सेयो डेरे लगाई राखो थे। 19 जेबे बादल़ बऊत दिना तक मिलणे वाल़े तम्बूए पाँदे रओ था तेबे इस्राएली लोक यहोवे री आज्ञा मानो थे ओर आगे चलो नि थे। 20 कदी-कदी से बादल़ थोड़े ई दिना तक तम्बूए पाँदे रओ था ओर सेयो यहोवे री आज्ञा रे मुताबिक डेरे पाई राखो थे ओर फेर यहोवे री आज्ञा तेई सेयो तेथा ते आगे चलेया करो थे। 21 कदी-कदी बादल़ साँजके बखतो ते लई की प्यागा तक रओ था ओर जेबे से प्यागा उठी जाओ था तो सेयो तेथा ते चली पड़ो थे, से बादल़ चाए रात ओ या दिन जेबे उठी जाओ तेबुई से चली पड़ो थे। 22 से बादल़ मिलणे वाल़े तम्बूए पाँदे चाए दो दिना तक या एकी मीन्ने तक या चाए साल परी ठईरेया रा रओ तदुए तक इस्राएली लोक आपणे डेरे रे रओ थे ओर चलो नि थे; पर जेबे से बादल़ तम्बूए पाँदा ते उठी जाओ था तेबे सेयो चली पड़ो थे।

23 यहोवे री आज्ञा ते सेयो आपणे डेरे खड़े करो थे ओर यहोवे री आज्ञा तेई सेयो तेथा ते आगे चलो थे; जो आज्ञा यहोवा मूसा रे जरीये देओ था, तिजी खे सेयो मानेया करो थे।