गिणती 18

पुरोईत ओर लेविया रे सेवा रे काम

1 यहोवे हारूणो खे बोलेया, "पवित्र जगा रे खलाफ पापो री सजा तां ओर तेरे पाऊआ ओर तेरे बाओ रे कराने खे पुगतणी पड़नी; पर तुसा रे पुरोईता रे कामो रे पापो री सजा तां ओर तेरे पाऊआ खे पुगतणी पड़नी। 2 इजी खे लेवी गोत्र जो तेरे खास परिवारो रे गोत्रो वाल़े जो तेरे पाई ए, तिना खे बी आपू साथे लई आया कर कि सेयो तां साथे रओ ओर जेबे तूँ ओर तेरे पाऊ गवाईया रे तम्बूए रे सामणे ओ तेबे सेयो तेरी मताद करेया करो। 3 से जो तांगे सम्बाल़ी राखेया तिजी री ओर सारे तम्बूए रे कामो री बी देख-रेख करेया करो; पर सेयो पवित्र जगा रे पांडेया ओर बेदिया रे नेड़े नि जाओ, एड़ा नि ओ कि सेयो ओर तुसे लोक बी मरी जाओ। 4 सेयो तां साथे मिली की मिलणे वाल़े तम्बूए रे कामो री ओर तिना रे समानो री देख-रेख करने री जिम्मेबारी सम्बाल़ी लओ; पर जो तेरे कुलो रा नि ओ से तुसा लोका रे नेड़े नि आओ। 5 पवित्र तम्बू ओर बेदिया री रखवाल़ी तुसेई करेया करो, जेते कि इस्राएली लोका पाँदे फेर मेरा गुस्सा नि पड़को। 6 देखो, मैं आपू तुसा रे लेवी पाई इस्राएलिया बीचा ते लग करी कि सेयो पवित्र तम्बूए री सेवा करने खे तुसा खे तोफेया रे रूपो रे यहोवे खे देईते रे।*18:6 इब्रानी 9:6 7 पर बेदिया री ओर बीचले पड़दे रे पितरलिया गल्ला री सेवा खे तूँ ओर तेरे पाऊ आपणे पुरोईतो रे पदो री रखवाल़ी करना। आँऊ तुसा खे पुरोईतो रा काम एक दानो रे रूपो रे देऊँआ ओर जो कोई तेरे कुलो रा नि ओ जे से पवित्र जगा रे नेड़े आओ तो से काया जाओ।"

पुरोईता री मतादा रिया तँईं पेंट

8 तेबे यहोवे हारूणो खे बोलेया, "सुण, आँऊ आपू ताखे मेरिया तँईं चढ़ाई री पेंट सम्बाल़ी देऊँआ, मतलब इस्राएलिया रिया ल्याई री पवित्र कित्ती री चीजा आँऊ तेरे ओर तेरे पाऊआ रा सदा रा अक्क करी की देई देऊँआ।*18:8 1 कुरिन्थ 9:13 9 जो सबी ते ज्यादा पवित्र चीज आगी रे नि चढ़ाई जाओ से तेरिया ऊणिया, मतलब इस्राएलिया रे सबी चढ़ावे बीचा ते तिना री सारी नज्जो री बलि, सारी पापबलि ओर सारी दोषबलि, जो सेयो माखे देओ, से तेरे ओर तेरे पाऊआ खे सबी ते पवित्र ठईरो। 10 तिजी खे बऊत पवित्र चीज जाणी की खाया करना; तिजी खे तुसा रे कराने रा हर एक मर्द खाई सकोआ; सेयो ताखे पवित्र ए। 11 फेर ये चीजा बी तेरिया ई ओ, जितणी पेंटा इस्राएली लोक ईलाणे खे देओ ए, तिजी खे आँऊ ताखे ओर तेरे माठे-बेटिया खे सदा रा अक्क करी कि देई देऊँआ; तेरे कराने रे जितणे शुद्ध ओ से तिजी खे खाई सकोए। 12 फेर तेरिया तँईं खरे ते खरा जैतूनो रा तेल, नया अंगूरा रा रस ओर कणक, इना री पईली फसल जो सेयो यहोवे खे देओए, से आँऊ ताखे देऊँआ। 13 तिना रे देशो री सबी किस्मा री पईली फसल, जो सेयो यहोवे खे लई आओ, से सब तेरी ई ठईरो; तेरे कराने रे जितणे शुद्ध माणूं ओ सेयो तिजी खे खाई सकोए। 14 इस्राएलिया बीचा ते जो कुछ बी माखे अर्पण करेया जाओ से बी तेरा ई ठईरो। 15 सबी प्राणिया बीचा ते जितणे पईले नर बच्चे ओ, जिना खे लोक यहोवे खे चढ़ाओ, चाए सेयो माणूंआ रे, चाए डांगरा रे पईले बच्चे ओ, सेयो सब तेरे ई ओ; पर माणूंआ रे ओर अशुद्ध डांगरा रे पईले बच्चेया खे तिना रा दाम लई की छाडी देओ। 16 जिना खे तुसे छुड़ाणा चाओए जेबे सेयो एकी मीन्ने रे ओ तेबे तिना रिया तँईं आपू खे ठराए रे मोलो रे मुताबिक, मतलब पवित्र जगा रे शकेलो रे साबो ते पाँज चाँदिए रे सिक्के लई की तिना खे छाडी देओ। 17 पर गाय या पेड या बाकरिया रे पईले नर मिन्टूआ खे नि छाडणा; कऊँकि सेयो तो पवित्र ए। तिना रा खून बेदिया पाँदे छड़काणा ओर तिना री चर्बी बलि करी की फूकणी, जेते की यहोवे खे सुख देणे वाल़ी खुशबू मिलो; 18 तिना रा मास तेरा ठईरो ओर ईलाई री छाती ओर दाँणी खुटी बी तेरी ई ठईरो 19 पवित्र चीजा री जितणी पेंट इस्राएली यहोवे खे देओए, तिना सबी खे आँऊ ताखे ओर तेरे माठे-बेटिया खे सदा रा अक्क करी की देई देऊँआ; ये तो ताखे ओर तेरे वंशो खे यहोवे री सदा खे लूणो री वाचा*18:19 लूणो री वाचा मतलब पक्का वादा ए।"

20 फेर यहोवे हारूणो खे बोलेया, "इस्राएलिया रे देशो रे तेरी कोई बरासत नि ऊणी ओर ना तिना बीचे तेरा कोई इस्सा ऊणा; कऊँकि तिना बीचे तेरी बरासत ओर तेरा इस्सा आँऊ ईए।"

लेविया री मतादा खे पेंट

21 आँऊ मिलणे वाल़े तम्बूए रे सेवा करने वाल़े लेवी गोत्रो रे लोका खे तिना री सेवा रे बदले इस्राएलिया रा सबी रा दसुआ इस्सा तिना खे बरासता रे रूपो रे देई देऊँआ।*18:21 इब्रानी 7:5 22 आगो खे इस्राएली लोक मिलणे वाल़े तम्बूए रे नेड़े नि आओ, नई तो तिना खे आपणे पापो री सजा पुगतणी पड़नी ओर सेयो मरी जाणे। 23 पर लेवी मिलणे वाल़े तम्बूए रे सेवा करेया करो, ओर तिना खे आपणे पापो रे कामो री सजा आपू ई पुगतणी पड़नी; ये तुसा री ओर आऊणे वाल़ी पीढ़िया रे सदा री रवाज ठईरो ओर इस्राएलिया बीचे तिना रा जमीना रे कोई इस्सा नि ऊणा। 24 तिजी रे बदले इस्राएली लोक जो दसुआ इस्सा यहोवे खे चकी री पेंट करी की देओगे, से आँऊ लेविया खे बरासता रे रूपो रे तिना रा इस्सा करी की देई देऊँआ, तेबेई तो मैं तिना रे बारे दे बोलेया कि इस्राएलिया बीचे कोई बी जमीना रा इस्सा तिना खे नि मिलणा।

लेविया रा दसुआ इस्सा

25 फेर यहोवे मूसे खे बोलेया, 26 "तूँ लेवी वंशो रे लोका खे बोल कि जेबे-जेबे तुसे इस्राएली लोका रे आथा ते से दसुआ इस्सा लओ तेबे-तेबे तुसे तेते दसुए इस्से बीचा ते यहोवे खे चकी री पवित्र पेंट करी की तिजी रा दसुआ इस्सा देणा। 27 तुसा री ये मिली री पेंट खल्याणो रा नज्ज या अंगूरा रे रसकुण्डो रे नये रसो जेड़ी मानी जाणी। 28 ईंयाँ ई तुसे बी आपणे सबी दसुए इस्से बीचा ते, जो इस्राएलिया री तरफा ते पाणा, तिजी बीचा ते यहोवे खे एक चकी री पेंट चढ़ाणी ओर यहोवे खे ये चढ़ाई री पेंट हारूण पुरोईतो खे देया करनी। 29 जितणे दान तुसे पाओ तिजी बीचा ते हर एकी रा खरे ते खरा पाअग, जो पवित्र ए, से यहोवे खे चढ़ाई री पेंट करी की देणी। 30 इजी खे तूँ लेवी वंशो रे लोका खे बोल कि जेबे तुसे तिजी रा खरे ते खरा इस्सा देओ, तेबे ये तुसा खे खल्याणो रा नज्ज ओर अंगूरा रे रसकुण्डो रे रसो रे बराबर गिणेया जाणा; 31 ओर तिजी खे तुसे आपणे करानेया समेत केसी बी जगा रे खाई सकोए, कऊँकि मिलणे वाल़े तम्बूए री जो सेवा तुसा करनी तिजी रा बदला येई ऊणा।*18:31 मत्ती 10:10, 1 कुरिन्थ 9:13 32 ओर जेबे तुसे तिजी रा खरे ते खरा इस्सा चकी की देओ तेबे तुसे तिजी री बजअ ते पापी नि रणे। पर इस्राएली लोका री पवित्र कित्ती री चीजा खे अपवित्र नि करना, एड़ा नि ओ कि तुसे मरी जाओ।"