गिणती 31

मिद्यानिया ते बदला लणे रा बखाण

1 तेबे यहोवे मूसे खे बोलेया, 2 "मिद्यानिया लोका ते इस्राएलिया रा बदला लओ; तिजी ते बाद तूँ आपणे लोका साथे जो मरीगे रे मिली जाणा।"

3 तेबे मूसे लोका खे बोलेया, "आपू बीचा ते मर्दा खे युद्ध करने रिया तँईं अथियारा साथे त्यार करो कि सेयो यहोवे री योजना रे मुताबिक मिद्यानिया पाँदे अमला करी की तिना ते बदला लओ। 4 इजी खे सेयो इस्राएलो रे सबी गोत्रा बीचा ते हर एक गोत्रा रे 1-1 ह्जार मर्दा खे युद्ध करने खे पेजो।"

5 तेबे इस्राएलो रे सबी कुला बीचा ते हर गोत्रो ते 1-1 ह्जार मर्द चूणे, मतलब युद्ध करने खे अथियारो साथे 12 ह्जार मर्द थे। 6 तेबे मूसे हर एक गोत्रो बीचा ते तिना ह्जार-ह्जार मर्दा खे, एलीआजार पुरोईतो रे पाऊ पीनहासो साथे युद्ध करने खे पेजेया, जेसरी जिम्मेवारिया रे पवित्र जगा रे पांडे ओर सेयो रड़सिंगे थे जो लोका रे जरीये मुसीबता रा ईशारा करने खे जोरे-जोरे की बजाए जाओ थे।

7 जो आज्ञा यहोवे मूसे खे दित्ती थी तिजी रे मुताबिक तिने मिद्यानिया ते युद्ध करी की सब मर्द काईते। 8 ओर तिने तिना काये रेया मर्दा साथे एवी, रेकेम, सूर, हूर ओर रेबा नाओं रे पाँजो मिद्यानी राजे बी काईते ओर बोरो रा पाऊ बिलाम बी तिने तलवारी साथे काईता। 9 ओर इस्राएली लोके मिद्यानी जवाणसा बाल-बच्चेया समेत बन्दी बणाई तिया ओर तिना रे गाय-बल़द, पेडा-बाकरिया ओर तिना री सारी जायदात लूटी ली। 10 फेर तिने तिना रे सब रणे रे शईर ओर तिना रे सब छावणिया फूकी तिया; 11 तेबे सेयो सब बन्दी बणाए रे आदमी ओर डांगर ओर सारी लूटी री जायदात लई की चलीगे। 12 फेर सेयो पकड़ी राखे बन्दिया, डांगरा ओर लूटी री जायदाता खे लई की यरीहो रे नेड़े यरदन नदिया रे कनारे पाँदे, मोआबो रे मैदानो रे डेरे रे नेड़े मूसा ओर एलीआजार पुरोईत ओर इस्राएलिया री मण्डल़िया गे लई आए।

लड़ाईया ते सेना री वापसी

13 तेबे मूसा ओर एलीआजार पुरोईत ओर मण्डल़िया रे सब परदान डेरे ते बारे तिना रा स्वागत करने खे निकल़े। 14 ओर मूसा 1 ह्जार ओर 100 री सेना खे चलाणे वाल़ेया सेनापतिया ते, जो युद्ध करी की वापस आए थे गुस्सा ऊई की बोलणे लगेया, 15 "तुसे सब जवाणसा जिऊँदिया कऊँ छाडी तिया? 16 देख, बिलामो री सईमतिया ते, पोर नाओं री जगा रे बारे दे इस्राएलिया ते यहोवे रे खलाफ तोखा इने ई जवाणसे कराया ओर यहोवे री मण्डल़िया दे महामारी फैली। 17 इजी खे एबे बाल-बच्चेया बीचा ते हर एकी पाऊए खे ओर तिना सबी जवाणसा खे जिने मर्दा साथे शारीरिक सम्बन्द बणाई राखे ओ तिना सबी खे काई देओ। 18 पर जितणी बेटिए मर्दा साथे सम्बन्द नि बणाई राखे ओ तिना सबी खे तुसे आपू खे जिऊँदिया राखो। 19 ओर तुसे लोक साता दिना तक डेरे ते बारे रओ ओर तुसा बीचा ते जितणेया कोई प्राणी काई राखेया ओ ओर जितणेया कोई मरेया रा छुँईं राखेया ओ, सेयो सब आपणे-आपणे बन्दिया समेत आपणे आपू खे तीजे ओर सातुए दिने नियमा रे मुताबिक पापो ते छुड़ाई की पवित्र करो। 20 ओर सब टाल्ले ओर चामड़े ते बणी री सब चीजा ओर बाकरिया रे बाल़े की ओर लकड़िया ते बणी री सबी चीजा खे बी नियमा री रीतिया रे मुताबिक तोई की शुद्ध करनिया।"

21 तेबे एलीआजार पुरोईते सेना रे तिना मर्दा खे जो युद्ध करने गए थे बोलेया, "व्यवस्था री जेसा रवाजा री आज्ञा यहोवे मूसे खे दित्ती से ये ए, 22 तुसे सूईना, चाँदी, पीतल़, लोआ, टीन ओर सीसा, 23 जो कुछ आगी रे ठईरी सको तिजी खे आगी रे पाई देओ, तेबे से शुद्ध ठईरना; तेबे बी से अशुद्धता ते छुड़ाणे वाल़े पाणिए की रीतिया रे मुताबिक शुद्ध कित्तेया जाओ; पर जो कुछ आगी रे नि ठईरो तिजी खे शुद्ध करने रिया तँईं तिना पाँदे पाणी छिड़को।"

24 फेर तुसे सातुए दिने आपणे टाल्ले तोओ, तेबे तुसे शुद्ध ऊई जाणे, तिजी ते बाद तुसे डेरे रे आई सकोए।

लूटी री चीजा खे बाँडणा

25 फेर यहोवे मूसे खे बोलेया, 26 "एलीआजार पुरोईत ओर मण्डल़िया रे पितरा रे कराने रे खास-खास मर्दा खे साथे लई की तूँ लूटे रे माणूंआ खे ओर डांगरा खे गिणी लओ; 27 फेर लूटे रे मालो खे दुँईं इस्सेया रे बांडी की एक इस्सा तिना सिपाईया खे जो युद्ध करने खे गए थे ओर दूजा इस्सा मण्डल़िया खे देया।"

28 फेर जो सिपाई युद्ध करने खे गए थे, तिना री लूटा बीचा ते 500 बीचा ते एक यहोवे रिया तँईं लग करी की राखो, जे सेयो आदमी या गाय-बल़द या गह्दे या पेडा-बाकरिया ओ, 29 500 बीचा ते एक लग कित्ती री पेंट यहोवे री मानी की एलीआजार पुरोईतो खे देई देणी।

30 "फेर इस्राएलिया रे आदे इस्से री लूटा रे मालो बीचा ते, जे सेयो आदमी या गाय-बल़द या गह्दे या पेडा-बाकरिया या केसी किस्मा रे डांगर ओ तो पंजा बीचा ते एक लई की यहोवे रे रणे री जगा री रखवाल़ी करने वाल़े लेविया खे देणा।"*31:30 गिण. 31:42-47, गिण. 3:7,8, 25, 31, 36

31 यहोवे री एसा आज्ञा रे मुताबिक जो तिने मूसे खे दित्ती मूसा ओर एलीआजार पुरोईते कित्तेया। 32 जो चीजा सेना रे मर्दे आपू-आपू खे लूटा बीचा ते लईया थिया तिजी ते ज्यादा री लूट ये थी; मतलब 6 लाख 75 ह्जार पेडा-बाकरिया, 33 72 ह्जार गाय-बल़द, 34 61 ह्जार गह्दे, 35 ओर माणूंआ बीचा ते जिने जवाणसे केसी मर्दो साथे सम्बन्द नि बणाई राखेया था सेयो सब 32 ह्जार थिया।

36 जो सिपाई युद्ध करने खे गए थे तिना रे आदे इस्से रे पेडा बाकरिया 3 लाख 37 ह्जार 500 थी, 37 जिना बीचा ते 675 पेडा-बाकरिया यहोवे री पेंटा रिया तँईं लग करी राखिया थिया। 38 ओर गाय-बल़द 36 ह्जार थे, जिना बीचा ते यहोवे री पेंटा रिया तँईं 72 गाय-बल़द लग करी राखे थे। 39 ओर 30 ह्जार 500 गह्दे थे, जिना बीचा ते यहोवे री पेंटा रिया तँईं 61 गह्दे लग करी राखे थे। 40 ओर माणूं 16 ह्जार थे जिना बीचा ते यहोवे री पेंटा रिया तँईं 32 माणूं लग करी राखे थे। 41 जो पेंट यहोवे री थी से मूसे यहोवे री आज्ञा रे मुताबिक एलीआजार पुरोईतो खे दित्ती।

42 इस्राएलिया री मण्डल़िया रा आदा इस्सा जो मूसे युद्ध करने वाल़े मर्दा गे ते लग कित्तेया था 43 इस्राएली मण्डल़िया रे आदे इस्से रे 3 लाख 37 ह्जार 500 पेडा-बाकरिया थी। 44 36 ह्जार गाय-बल़द, 45 ओर 30 ह्जार 500 गह्दे, 46 जिना बीचे 16 ह्जार बेटिया थिया। 47 इस्राएली लोका रे एस आदे इस्से बीचा ते, यहोवे री आज्ञा रे मुताबिक मूसे, माणूं या डांगर 50 बीचा ते एक लई की यहोवे री रणे री जगा री रखवाल़ी करने वाल़े लेविया खे दित्ते।

48 तेबे 1,000 ओर 100 री सेना रे अधिकारी जो ह्जारा ओर 100 पाँदे राखी राखे थे, सेयो मूसे गे आई की बोलणे लगे, 49 "जो सिपाई आसा रे वशो रे थे तिना री तेरे दासे गिणती करी ती ओर तिना बीचा ते एक पनि कटेया। 50 इजी खे जो सूईने रे गईणे आसा खे मिली रे, कड़े, आर, छापा, बाल़िया ओर बाजूबन्द तिना खे आसे यहोवे रे सामणे आपणे प्राणा रे बदले प्राश्चित करने खे यहोवे री पेंटा खे ली आई रे।"

51 तेबे मूसे ओर एलीआजार पुरोईते तिना ते सेयो सब सूईने रे गईणे लई ले। 52 ओर 1,000 ओर 100 री सेना खे चलाणे वाल़े अधिकारिए जो पेंटा रा सूईना यहोवे खे पेंट करी की दित्तेया से लगभग 191 किलो था। 53 युद्ध करने वाल़ेया तो आपणी-आपणी लूट लई ली थी।*31:53 गिण. 31:32; बिध. 20:14 54 ये सूईना मूसा ओर एलीआजार पुरोईते 1 ह्जार ओर 100 री सेना रे अधिकारिए ते लई की मिलणे वाल़े तम्बूए रे पऊँचाई ता ताकि इस्राएलिया खे यहोवे रे सामणे याद कराणे वाल़ी चीज ठईरो।*31:54 निर्ग. 30:16