गिणती 8

दिऊएया खे बाल़ने री बिधि

1 तेबे यहोवे मूसे खे बोलेया, 2 "हारूणो खे समजयाई की ये बोल कि जेबे तूँ दिऊए बाल़ो तेबे सेयो ईंयाँ बाल़ने कि सातो दिऊएया रा प्रयासा दिऊए राखणे री फट्टिया रे सामणे ओ।"

3 इजी खे हारूणे तेड़ा ई कित्तेया, मतलब जो आज्ञा यहोवे मूसे खे दित्ती थी तिजी रे मुताबिक तिने दिऊए बाल़े कि सेयो दिऊए राखणे री फट्टिया रे सामणे प्रयासा देओ। 4 दिऊए राखणे री फट्टिया री बणावट एड़ी थी, मतलब ये थालले पावे ते लई की ऊबे फूला तक कअड़े रे सूईने री बणाई राखी थी; जेड़ा नमूना यहोवे मूसे खे दखाई राखेया था तिजी रे मुताबिक ई तिने दिऊए राखणे री फट्टी बणाई।

लेविया खे पवित्र करना

5 तेबे यहोवे मूसे खे बोलेया, 6 "इस्राएलिया बीचा ते लेवी वंशो रे लोका खे लग करी की तिना खे रवाजा रे मुताबिक शुद्ध करो। 7 तिना खे शुद्ध करने खे तूँ एड़ा कर कि पवित्र करने वाल़ा पाणी तिना पाँदे छिड़की दे, तेबे सेयो आपणे सारे शरीरो रे सारे बाल़ कटवाओ ओर सारे टाल्ले तोओ, सेयो आपणे आपू रवाजा रे मुताबिक शुद्ध ऊई जाणे। 8 तेबे सेयो तेलो साथे मिलेया रा मैदा नज्जो री बलिया समेत एक बाच्छू लई लो, फेर तैं पापबलिया खे एक दूजा बाच्छू लणा। 9 तूँ लेविया खे मिलणे वाल़े तम्बूए रे सामणे लई आया ओर फेर इस्राएलिया री सारी मण्डल़िया खे कट्ठा करेया। 10 तेबे तूँ लेविया खे यहोवे रे आगे लई आया, तेबे इस्राएली लोक आपणे-आपणे आथ तिना पाँदे राखो, 11 तेबे हारूण तिना लेविया खे यहोवे रे सामणे इस्राएलिया री तरफा ते ईलाई री पेंटा रे रूपो रे चढ़ाओ कि सेयो यहोवे री सेवा करने वाल़े ठईरो। 12 तेबे लेवी आपणे-आपणे आथ तिना बाच्छूआ रे सिरो पाँदे राखो; तेबे तिना बाच्छूआ बीचा ते लेविया रिया तँईं प्राश्चित करने खे एक बाच्छू पापबलिया खे ओर दूजा होमबलि करी की यहोवे खे चढ़ाओ। 13 ओर लेविया खे हारूण ओर तेसरे पाऊआ रे सामणे खड़ा करना, फेर लेवी वंशो रे लोक ईलाणे री पेंटा जेड़े मां यहोवे खे अर्पण करो।"

14 ईंयाँ तैं लेवी वंशो रे लोक इस्राएलिया बीचा ते लग करने ओर सेयो मेरे ई ऊणे। 15 ओर जेबे तूँ लेविया खे शुद्ध करी की ईलाई री पेंटा खे अर्पण करी चुको, तिजी ते बाद सेयो मिलणे वाल़े तम्बूए रे काम करने खे पीतरे आया करो। 16 कऊँकि लेवी वंशी इस्राएलिया बीचा ते माखे पूरी तरअ ते देई राखे ओर मैं सेयो इस्राएलिया बीचा ते एकी-एकी जवाणसा रे जेठेया बच्चेया रे बदले आपणे बणाई ले रे। 17 इस्राएलिया रे जेठे बच्चे, चाए माणूंआ रे ओ, चाए डांगरा रे ओ सब मेरे ए; कऊँकि मैं सेयो तेस बखते आपू खे पवित्र ठराई राखे जेबे मैं मिस्र देशो रे सब जेठे बच्चे काये थे। 18 ओर मैं इस्राएलिया रे सबी जेठेया बच्चेया रे बदले लेवी लई ले रे। 19 लेवी वंशो रे लोक मैं हारूण ओर तेसरे पाऊआ खे इस्राएलिया बीचा ते दान करी की देईते रे कि सेयो मिलणे वाल़े तम्बूए दे इस्राएलिया रिया तँईं सेवा रा काम ओर प्राश्चित करेया करो, केथी एड़ा नि ओ कि जेबे इस्राएली पवित्र जगा रे नेड़े आओ तेबे तिना पाँदे कोई बऊत बड़ी आफत पड़ो।

20 लेविया रे बारे दे यहोवे री आज्ञा रे मुताबिक मूसा, हारूण ओर इस्राएलिया री सारी मण्डल़िए तिना साथे ठीक तेड़ा ई कित्तेया। 21 लेविए तो आपू खे पापो ते शुद्ध करी की आपणे टाल्ले तोई ते; तेबे हारूणे यहोवे रे सामणे तिना खे ईलाई री पेंटा रे जरीये तिना रे प्राश्चितो खे अर्पण कित्तेया। 22 ओर तिजी ते बाद लेवी हारूण ओर तेसरे पाऊआ रे सामणे मिलणे वाल़े तम्बूए दे आपणा-आपणा सेवा रा काम करने खे गये ओर जो आज्ञा यहोवे मूसे खे लेविया रे वंशो रे बारे दे दित्ती थी तिजी रे मुताबिक सेयो तिना ते बर्ताव करने लगे।

लेविया रा सेवा करने रा बखत

23 तेबे यहोवे मूसे खे बोलेया, 24 "जो लेविया खे करना ए से ये कि 25 साला री उम्रा ते लई की तिजी ते ज्यादा उम्रा रे सेयो मिलणे वाल़े तम्बूए रे काम करने खे पीतरे आजीर ओया करो; 25 ओर जेबे 50 साला रे ओ तेबे तेसा सेवा खे नि आओ ओर तेती काम नि करो; 26 पर सेयो आपणे लेवी पाईया साथे मिलणे वाल़े तम्बूए रे कामो रे मताद करी सकोए, पर सेयो आपू कोई बी सेवा रा काम नि करो। तूँ लेविया खे इना कामा री जिम्मेबारी सम्बाल़ी देया।"