गिणती 22

बिलाम ओर मोआबो रा राजा बालाक

1 तेबे इस्राएलिये निकल़ी की यरीहो शईरो गे यरदन नदिया रे वारले कनारे मोआबो रे मैदानो रे डेरे खड़े कित्ते। 2 ओर सिप्पोरो रे पाऊ राजा बालाके देखेया कि इस्राएलो रे लोके एमोरिया साथे क्या-क्या कित्तेया। 3 तेबे मोआबे ये जाणी की कि इस्राएली बऊत जादा ए, तिना लोका ते बऊत जादा डरीगा; एथो तक कि मोआब इस्राएलिया री बजअ ते बऊत ई दुःखी ऊआ। 4 तेबे मोआबिये मिद्यानी बुजुर्गा खे बोलेया, "एबे एस चूण्डो आसा रे चऊँ कनारे रे लोक ईंयाँ खाई देणे, जिंयाँ बल़द डोरूआ रा अरा काआ खाई जाओआ।" तेस बखते सिप्पोरो रा पाऊ बालाक मोआबो रा राजा था; 5 ओर इने पतोर शईरो खे, जो फरात नदिया रे कनारे पाँदे बोरो रे पाऊ बिलामो रे कुलो वाल़ेया री जमीन थी, तेती बिलामो गे सन्देशा देणे वाल़े दूत पेजे कि सेयो ए बोली कि तेसखे बुलाई लो, "सुण एक चूण्ड मिस्रो ते निकल़ी की आई रा ओर जमीन तिना ते टखी गी री ओर एबे सेयो मेरे सामणे ई आई की रणे लगी गे रे। 6 इजी खे आओ ओर तिना लोका खे मेरिया तँईं स्राप दे, कऊँकि सेयो मांते जादा तागतबर ए, तेबे ऊई सकोआ कि आसे तिना ते जीती जाणे ओर आसे सब जणे इना खे आपणे देशो ते मारी की निकयाल़ी देऊँ; कऊँकि ये तो आँऊ जाणूंआ कि जेसखे तूँ आशीर्वाद देआ से आशीषा ते परी जाओआ ओर जेसखे तूँ स्राप देआ तेसखे स्राप लगोआ।"

7 तेबे मोआबी ओर मिद्यानी बुजुर्ग बिलामो गे जासूसी गल्ला बोलणे खे कुछ पैसे लई की चले ओर बिलामो गे पऊँची की बालाको रिया गल्ला सुणाईयां।*22:7 2 पत 2:15, यहूदा 1:1 8 बिलामे तिना खे बोलेया, "आज राती खे एथी रओ, तेबे जो गल्ल यहोवा माखे बोलोगा, तिजी रे मुताबिक मां तुसा खे उतर देणा।" तेबे मोआबो रे हाकिम बिलामो रे कअरे ठईरी गे।

9 तेबे परमेशरे बिलामो गे आई की पूछेया, "तेरे कअरे ये मर्द कुण ए?"

10 बिलामे परमेशरो ते बोलेया, "सिप्पोरो रे पाऊ मोआबो रे राजा बालाके इना गे मांगे ये सन्देशा पेजी राखेया, 11 ‘सुण, जो बड़ा चूण्ड मिस्रो ते निकल़ी की आई रा तिना ते जमीन टखी गी री; इजी खे एबे तूँ आई की मेरिया तँईं तिना खे स्राप दे; तेबे ऊई सकोआ कि आँऊ तिना साथे लड़ी की तिना खे तेथा ते निकल़ने खे मजबूर करुँ।’ "

12 पर परमेशरे बिलामो खे उतर दित्तेया, "तूँ इना साथे मत जा; इना लोका खे स्राप मत दे, कऊँकि मैं इना खे आशीष देई राखी।"

13 दूजे दिने प्यागा ई बिलामे उठी कि बालाको रे हाकिमा खे बोलेया, "तुसे आपणे देशो खे चली जाओ; कऊँकि यहोवा माखे तुसा साथे जाणे री आज्ञा नि देंदा।"

14 तेबे मोआबी हाकिम चलीगे ओर बालाको गे जाई की बोलेया, "बिलामे आसा साथे आऊणे ते ना करी ती।"

15 तेबे बालाके फेर ओर हाकिम पेजे, जो पईलकेया ते ज्यादा जाणे माने रे ओर गिणतिया रे बी ज्यादा थे। 16 तिने बिलामो गे जाई कि बोलेया, "सिप्पोरो रा पाऊ बालाक ईंयाँ बोलोआ कि मांगे आऊणे ते किजी री बजअ ते ना नि कर; 17 कऊँकि मां ताखे बऊत जादा इज्जत देणी ओर जो कुछ तां मांते बोलणा सेई मां करना; तूँ बस आईजा ओर तिना लोका खे मेरिया तँईं स्राप दे।"

18 पर बिलामे बालाको रे सन्देशा देणे वाल़ेया खे जबाब दित्तेया, "चाए बालाक आपणे कअरो खे सूईने-चाँदिए साथे परी की माखे देई दो, तेबे बी आँऊ आपणे यहोवे री आज्ञा कटाई की या बढ़ाई की बदली नि सकदा। 19 इजी खे तुसे आज राती खे एथी ई टिके रे रओ ताकि आँऊ जाणी लऊँ कि यहोवा माखे ओर क्या बोलोआ।"

20 ओर परमेशरे तेसी राती आईकि बिलामो गे बोलेया, "सेयो मर्द ताखे बुलाणे खे आई रे, इजी खे तूँ उठी की तिना साथे जा; पर जो गल्ल आँऊ ताखे बोलूँ तिजी रे मुताबिक करना।"

बिलाम ओर तेसरी गह्दी

21 तेबे बिलाम प्यागा उठेया ओर आपणी गह्दिया पाँदे काठी बानी की मोआबी हाकिमा साथे चली पड़ेया। 22 पर जेबे से तिना लोका साथे जाणे लगेया तो परमेशरो रा गुस्सा पड़केया ओर यहोवे रा दूत तेसरा बरोद करने खे बाट रोकी की खड़ा ऊईगा। बिलाम तो आपणी गह्दिया पाँदे संवार ऊई की जाणे लगी रा था ओर तेस साथे तेसरे दो सेवक बी थे। 23 तेबे तेसा गह्दिया खे यहोवे रा दूत आथो रे नांगी तलवार लई की बाटा रे खड़ेया रा दिशेया; तेबे गह्दी बाट छाडी की डोरूए खे चली गी; तो बिलामे गह्दिया रे बाई कि से बाटा रे फेर आई जाओ। 24 तेबे यहोवे रा दूत अंगूरा रे बगीचे रे संगड़ी गल़िया रे, जिदे दुँईं कनारे बगीचे री दीवार थी, खड़ा ऊईगा। 25 यहोवे रे दूतो खे देखी कि गह्दी दवाला साथे एड़ी चिपकी गी कि बिलामो रा पैर दवाला साथे फिंचीगा; तेबे तिने गह्दिया रे फेर बाई। 26 तेबे यहोवे रा दूत आगे बढ़ी की एकी संगड़ी जगा रे खड़ा ऊईगा, जेती ना तो दाँणे कनारे आटणे री जगा थी ना खूँजे कनारे। 27 तेती यहोवे रे दूतो खे देखी की गह्दी बिलामो खे लई की बैठी गी; फेर तो बिलामो रा गुस्सा पड़केया ओर तिने गह्दिया खे डण्डे की बाई। 28 तेबे यहोवे गह्दिया रा मूँ खोली ता ओर से बिलामो खे बोलणे लगी, "मैं तेरा क्या करी राखेया कि तैं मांदे तीन बार बाई?"*22:28 2 पत 2:16

29 बिलामे गह्दिया खे बोलेया, "तैं दूजे री नजरा रे आँऊ आसिया जोगा कित्तेया। जे मेरे आथो रे तलवार ऊँदी तो तूँ मां एबु काई देणी थी।"

30 गह्दिए बिलामो खे बोलेया, "आँऊ तेरी सेई गह्दी ए, जेसा पाँदे तूँ जन्मो ते लई की आजो तक बैठदा आई रा। आँऊ तां साथे कदी एड़ा करुँ थी।" तो तिने बोलेया, "ना।" 31 तेबे यहोवे बिलामो री आखी खोलिया ओर तेसखे यहोवे रा दूत आथो रे नांगी तलवार लई की बाटा रे खड़ेया रा दिशेया; तेबे तिने चूकी की मुंए रे पारे पड़ी की माथा तेकेया।

32 तेबे यहोवे रे दूते तेसते पूछेया, "तैं आपणी गह्दिया खे तीन बार कऊँ बाई? सुण, तेरा बरोद करने खे आँऊ ई आई रा कऊँकि तूँ मेरे सामणे उल्टी चाल चलोआ; 33 ये गह्दी माखे देखी की मेरे सामणे ते तीन बार अटी। जे ये मेरे सामणे ते नि अटदी, तो पक्का आँऊ एबुओ तक ताखे काई देंदा, पर एसा खे जिऊँदा छाडी देंदा।"

34 तेबे बिलामे यहोवे रे दूतो खे बोलेया, "मैं पाप करी राखेया; आँऊ ये नि जाणूं था कि तूँ मेरा सामणा करने खे बाटा रे खड़ी रा। एबे जे ये तेरी नजरा रे बुरा ए, तो आँऊ वापस ऊई जाऊँआ।"

35 यहोवे रे दूते बिलामो खे बोलेया, "इना मर्दा साथे तूँ चली जा पर सेई गल्ल बोलणी जो मां ताखे बोलणी।" तेबे बिलाम बालाको रे हाकिमा साथ चलीगा।

राजा बालाक रे जरीये बिलामो रा स्वागत

36 ये सुणी की कि बिलाम आऊणे लगी रा, राजा बालाक तेस साथे मिलणे खे मोआबो रे तेस शईरो तक जो तेस देशो रे अर्नोन नदिया रे बन्ने पाँदे ए गया। 37 बालाके बिलामो खे बोलेया, "मैं बड़ी उम्मीदा ते तूँ बुलाया था पर तूँ मांगे नि आया। तैं तो आँऊ एते जोगा पनि समजेया कि ताखे इज्जत देई सकूँ।"

38 बिलामे बालाको खे बोलेया, "देख, आऊँ तांगे तो आई रा पर एबे आँऊ आपणी इच्छा ते नि बोली सकदा? जो गल्ल परमेशर मेरे मुंए रे पाओगा, सेई गल्ल मां बोलणी।" 39 तेबे बिलाम बालाको रे साथे-साथे चलेया ओर सेयो किर्यथूसोतो तक आए। 40 तेती बालाके बल़द ओर पेड-बाकरिया बलि कित्तिया ओर बिलाम ओर तेस साथले हाकिमो खे बी बलिया रा मास पेजेया। 41 दूजे दिने प्यागा बालाक बिलामो खे बालो री ऊच्ची जगा पाँदे लईगा ओर तेथा ते तेसखे थाले सब इस्राएली लोक दिशी गे।