गिणती 13

पेतिया खे कनान देशो खे पेजणा

1 यहोवे मूसे खे बोलेया, 2 "कनान प्रदेश जेसखे आँऊ इस्राएलिया खे देऊँआ तेते जगा रा पेत लणे खे कुछ मर्दा खे पेज; सेयो लोक एड़े ओ जो तिना रे पितरा रे एक-एक गोत्रो रे एक-एक परदान मर्द ओ।" 3 इजी खे यहोवे ते ये आज्ञा पाई की मूसे सेयो मर्द पारान नाओं री सुनसाण जगा ते पेजी ते, सेयो सारे इस्राएलिया रे परदान थे।

4 तिना रे नाओं ये ए: रूबेनो रे गोत्रो बीचा ते जक्कूरो रा पाऊ शम्मू;

5 शिमोनो रे गोत्रो बीचा ते होरिए रा पाऊ शापात;

6 यहूदा रे गोत्रो बीचा ते यपुन्ने रा पाऊ कालेब;

7 इस्साकारो रे गोत्रो बीचा ते यूसुफो रा पाऊ यिगाल;

8 एप्रैमो रे गोत्रो बीचा ते नूनो रा पाऊ होशे;

9 बिन्यामीनो रे गोत्रो बीचा ते रापूए रा पाऊ पलती;

10 जबूलूनो रे गोत्रो बीचा ते सोदीए रा पाऊ गद्दीएल;

11 यूसुफ वंशिया रे, मनश्शे रे गोत्रो बीचा ते सूसिए रा पाऊ गद्दी;

12 दानो रे गोत्रो बीचा ते गमल्लीए रा पाऊ अम्मीएल;

13 आशेरो रे गोत्रो बीचा ते मीकाएलो रा पाऊ सतूर;

14 नप्ताली रे गोत्रो बीचा ते वोप्सी रा पाऊ नहूबी;

15 गादो रे गोत्रो बीचा ते माकी रा पाऊ गूएल।

16 जिना मर्दा खे मूसे देशो रा पेत लणे खे पेजेया था तिना रे नाओं येई ए ओर नूनो रे पाऊ होशे रा नाओं मूसे यहोशू*13:16 यहोशू मतलब यहोवा बचाणे वाल़ा ए राखेया। 17 मूसे तिना खे कनान देशो रा पेत लणे खे पेजदे बखते बोलेया, "इसीए दक्खण देश नेगेबो रिये ऊई की पाह्ड़ी देशो रे उतरो दे जाओ, 18 फेर तेस पाह्ड़ी देशो रे जाई की तेसा जमीना खे देखी लओ कि से केड़ी ए ओर तिदे बसे रे लोका खे बी देखी लओ कि सेयो तागतबर ए या कमजोर ए, सेयो कम ए या ज्यादा लोक ए, 19 ओर जेते देशो रे से बसी रे से केड़ा ए, अच्छा ए या बुरा ए ओर सेयो केड़ी-कड़ी बस्तिया रे बसी रे ओर तम्बूआ रे रओए या गढ़ या किले रे रओए?, 20 ओर से जमीन केड़ी ए, पजणे वाल़ी ए या बंजर ए ओर तिदे डाल़ ए कि नई। तुसे इम्मती साथे तेस देशो री फसला बीचा ते कुछ लंदे बी आएओ।" से शुरूए रे पाक्के रे अंगूरा रा बखत था 21 इजी खे तिने चली की सीन नाओं री सुनसाण जगा ते लई की रहोबो तक, जो हमातो री बाटा रे ए, तेस सारे देशो खे देखी की तिजी रा पेत लया। 22 सेयो दक्खण देश नेगेबो रिये ऊई की हेब्रोनो तक गए; तेती अहीमन, शेशै, ओर तल्मै नाओं रे अनाकवंशी रओ थे। हेब्रोन शईर तो मिस्रो रे सोअन शईरो ते सात साल पईले बसाई राखेया था 23 तेबे सेयो एशकोल नाओं री काअटिया तक गए ओर तेथा ते एक डाल़ी दाखा रे गुच्छेया समेत तोड़ी ओर दो माणूं तिजी खे एकी डण्डे पाँदे लटकाई की चकी की चलीगे; तिजी साथे सेयो अनार ओर दाऊगल़े बीचा ते बी कुछ-कुछ फल़ ली आए। 24 तेते जगा रा नाओं एशकोल काअटी राखेया कऊँकि इस्राएली लोक तेथा ते जो दाखा रा गुच्छा तोड़ी की ली आए थे।

पेतिया रा वापस आऊणा

25 40 दिना ते बाद सेयो तेस देशो रा पेत लई की आपणे डेरे रे आईगे। 26 सेयो पारान सुनसाण जगा रे कादेश नाओं रे देशो रे मूसा ओर हारूण ओर इस्राएलिया री सारी मण्डल़िया गे पऊँचे ओर तेती तिना खे ओर सारी मण्डल़िया खे तेते देशो रे फल़ दखाए ओर तेते देशो रे बारे दे बताया। 27 तिने मूसे खे ये बोली की तेते जगा रे बारे दे बताया, "जेते देशो रे तुसे आसे पेजे थे तिदे आसे गए; से देश तो सच्चो खेई बऊत ई पजणे वाल़ा ए ओर तिजी री फसला बीचा ते येई ए। 28 पर तेते देशो रे रणे वाल़े तागतबर ए ओर तिना रे शईर बऊत बड़े ए ओर गढ़ो वाल़े ए ओर आसे तेती अनाकवंशी बी देखे। 29 दक्खण देशो रे तो अमालेकी लोक बसी रे ओर उतरी पाह्ड़ी देशो रे हित्ती, यबूसी ओर एमोरी लोक रओए ओर समुद्रो रे कनारे-कनारे ओर यरदन नदिया रे कनारे पाँदे कनानी लोक बसी रे।" 30 पर कालेबे मूसे रे सामणे प्रजा रे लोका खे चुप कराणे रिया तँईं बोलेया, "आसे एबु तिना पाँदे अमला करी की तेस देशो खे आपणे अक्को रे करी लईए; कऊँकि आसा रे एड़ा करने री तागत ए।" 31 पर जो ओर लोक तेस साथे गए थे तिने बोलेया, "आसे तिना लोका पाँदे अमला नि करी सकदे; कऊँकि सेयो आसा ते जादा तागतबर ए।" 32 ओर ईंयाँ तिने इस्राएलिया रे सामणे तेते देशो रा जेतेरा पेत तिने लया था ये बोली की चूठा ब्योरा बी दित्तेया, "से देश जेतेरा पेत लणे आसे गए थे एड़ा ए, जो आपणे लोका खे खाई जाओए ओर जितणे लोक आसे तेते देशो रे देखे सेयो सब देखणे रे बऊत ई बड़े-बड़े ए। 33 फेर आसे तेती नपीली लोक बी देखे; नपीली जातिया रे लोक अनाकवंशी लोका बीचा ते पैदा ऊई रे ओर आसे आपणी नजरा रे तिना सामणे तो कीड़े जेड़े दिशो थे ओर एड़े ई तिना री नजरा रे बी आसे दिशणे लगी रे थे।"