16 ते ज़ै प्यार परमेशर असन सेइं केरते, तै असेईं ज़ानो, ते असन तैस पुड़ विश्वासे, परमेशर प्यारे, ज़ै प्यारे मां बनोरो रहते, ते परमेशर तैस मां बनोरो रहते। 17 इस सेइं प्यार असन मां सिद्ध भोव, कि असन न्यायेरे दिहैड़ी दिलेरी भोए, किजोकि ज़ेरो तै आहे, तेरे अस भी दुनिया मां अहम। 18 प्यारे मां डर न भोए, बल्के सिद्ध प्यार डरे दूर केरते, किजोकि डरेरो रिश्तो सज़ाही सेइं भोते, ते ज़ै डरते, तै प्यार मां सिद्ध नईं।