1 एल्हेरेलेइ हुनी ज़ैना मसीह यीशु मां आन, तैन पुड़ सज़ाहरो हुक्म नईं। 2 किजोकि पवित्र आत्मा तुसन ज़िन्दगी देलो, ज़ै यीशु मसीह करां एइती ते तै तुसन पाप ते मौती करां आज़ाद केरेलो। 3 किजोकि ज़ैन कम कानूने इश्शे पापी स्भावेरे वजाई सेइं कमज़ोर भोइतां न केरि बटु, तैन परमेशरे कियूं, मतलब अपने मट्ठे इश्शे पैपी केरो ज़ेरो भोनेरे लेई, ते पापेरे बलिदानेरे लेई भेज़ू, परमेशरे मसीहेरे जिसमे मां पापेरी सज़ाह दित्ती। 4 परमेशरे एन एल्हेरेलेइ कियूं ताके अस अपने पापी स्भावेरे मुताबिक नईं, पन पवित्र आत्मारे मुताबिक च़ेलतां ज़ै हुक्म कानून देते तैस केरि बटम। 5 किजोकि ज़ैना लोक पापी स्भावेरे मुताबिक ज़िन्दगी बीतातन, तैना पापेरे बारे मां सोचतन, पन ज़ैना लोक पवित्र आत्मारे मुताबिक ज़िन्दगी बीतातन, तैना आत्मिक गल्‍लां केरे बारे मां सोचतन। 6 अगर इश्शो मन इश्शे पापी स्भावेरे मुताबिक च़लते त अस मरमेले, पन अगर इश्शो मन आत्मारे मुताबिक च़लते त असन ज़िन्दगी ते शान्ति मैल्हेली। 7 किजोकि पापी स्भावेरे मुताबिक च़लनू परमेशरे सेइं बैर रखनोए, किजोकि न त पापी सुभाव परमेशरेरे कानूनेरे अधीने, ते न कानूनेरे मुताबिक च़ेलि बटते। 8 ते ज़ैना पापी स्भावेरे मुताबिक च़लतन तैना परमेशरे खुशी न केरि बटन।

9 पन ज़ैखन परमेशरेरो आत्मा तुसन मां बसते, ते तुस पापी स्भावेरे मुताबिक न च़लथ बल्के पवित्र आत्मारे मुताबिक च़लतथ, अगर कोन्ची मां पवित्र आत्मा नईं त तै मसीहेरो मैन्हु नईं। 10 ते अगर मसीह तुसन मांए, त जिसम पापेरे वजाई सेइं मरेलो, पन आत्मा धार्मिकतारे वजाई सेइं ज़ींतीए। 11 ते अगर तैसेरी आत्मा ज़ैने यीशु मुड़दन मरां ज़ींतो कियो तुसन मांए। ते ज़ै मसीह तैने मुड़दन मरां ज़ींतो कियो, तैए तुश्शे भी नाश भोनेबाले जिसमे अपनि आत्माई सेइं ज़ींतो केरेलो, ज़ै तुसन मांए। 12 हे ढ्लाव ते बेइनव, असेईं एन्च़रे न लोड़े ज़ीयेरू ज़ेन्च़रे अस अपने पापी स्भावेरे मुताबिक ज़ींनू चातम, पन असेईं एन्च़रे ज़ीयोरू लोड़े ज़ेन्च़रे परमेशरेरो आत्मा चाते। 13 किजोकि अगर तुस अपने पापी स्भावेरे मुताबिक ज़ीले त तुस मरेले, पन अगर तुस पवित्र आत्मारे मुताबिक च़लेले त तुस अपने पापी सुभावेरां कम्मां केरनां बंद केरेले ते फिरी तुस ज़ींते राले। 14 किजोकि ज़ेत्रे परमेशरेरे आत्मारे च़लाने सेइं च़लतन तैन्ना परमेशरेरे बच्‍चेन। 15 किजोकि ज़ै आत्मा तुसन मैल्होरोए तुसन फिरी गुलाम बेनतां रानेरे लेई नईं, बल्के तै तुसन परमेशरेरे बच्‍चे बनाते। तैसेरे ज़िरिये अस परमेशरे जो हे बैपू, हे बाजी ज़ोतम। 16 पवित्र आत्मा एप्पू इश्शी आत्मा सेइं मिलतां गवाही देते, कि अस परमेशरेरे बच्‍चेम। 17 किजोकि अस परमेशरेरे बच्‍चेम ते असां तैना बरकतां हासिल केरमेले ज़ैना परमेशर अपने लोकां केरे लेई रेखोरिन, ते मसीहेरे लेई भी ज़ैन परमेशरे रखोरूए, तैन भी अस मसीह सेइं साथी हासिल केरमेले; किजोकि अगर अस मसीहेरे ज़ेरे दुख झ़ैलमेले त अस भी मसीहे साथी महिमा हासिल केरमेले।

18 मीं पूरू याकीने, कि ज़ैना दुख अस झ़ैल्‍लने लगोरेम, तैस महिमारे सामने, ज़ै परमेशर असन देनेबालोए, किछ भी नईं। 19 किजोकि सैरी रच़नरी चीज़ां बड़े बे सबरी सेइं तैस वक्तेरो इंतज़ार केरने लेगोरिन, कि ज़ेइस परमेशरे इन बांदो केरनू तैसेरे सच़्च़े बच्‍चे कौन आन। 20 किजोकि ज़ैन किछ परमेशरे बनाव, तैन सैरी चीज़ेइं अपनि कीमत गुवाई, एल्हेरेलेइ नईं कि तैना अपने आप चैती थी, पन परमेशरे एन भोने दित्तू। पन फिरी भी उमीदे। 21 कि सृष्टि एप्पू भी खुशी आहे कि विनाशे करां छुटकारो हासिल केरतां, परमेशरेरे बच्‍चां केरे महिमारी आज़ैदी मां खुशी मनाली। 22 किजोकि अस ज़ानतम कि सारी सृष्टि मिलतां हुना तगर कर लातीए ते तकलीफी मां तड़फतीए, ज़ेन्च़रे दोज़ींती गल्हे बिशनेरी तकलीफ भोतीए। 23 सिर्फ तैन्ना नईं पन अस भी ज़ैन एजने बैली महिमारो पेइले फलेरो सुवाद च़खनेरे लेई पवित्र आत्मा दित्तो, पन अस हेजू भी परमेशरेरे वक्ते बलगने लगोरेम ज़ैखन परमेशर अपने बच्‍चे केरे रूपे मां कबूल केरेलो, ते असन जिसमेरे बुरैई करां छुटकारो देलो। 24 हुनी परमेशरे असन मुक्ति दित्तोरीए, असन ई उमीदे। पन अगर तुस कोन्ची चीज़ी हासिल केरनेरे लेई उमीद केरथ ज़ै तुसन कां पेइली आहे, त फिरी तै उमीद नईं। किजोकि ज़ैस चीज़ी कोई हेरने लगोरोए तैसेरी उमीद कुन केरे? 25 पन ज़ैस चीज़ी अस न लहम, अगर तैसेरी उमीद रखतम, त सबरी सेइं तैस बलगते भी रातम।

26 एन्च़रे पवित्र आत्मा इश्शी मद्दत केरते ज़ैखन अस परमेशरे पुड़ भरोसो रखने मां कमज़ोर भोतम, किजोकि अस न ज़ानम, कि प्राथना केन्च़रे केरतन; पन पवित्र आत्मा एप्पू कर लेइतां ज़ै बयानेरे बेइरे, इश्शे लेई बिनती केरतीए। 27 ते परमेशर ज़ै मनां केरो ज़ान्ने बालोए ज़ानते, कि पवित्र आत्मा कुन लगोरो ज़ोने। किजोकि तै पवित्र लोकां केरे लेई परमेशरेरे मेर्ज़ी सेइं बिनती केरते।

28 ते अस ज़ानतम, कि ज़ैना लोक परमेशरे सेइं प्यार केरतन, परमेशर तैन केरे लेई सब गल्‍लां केरे ज़िरिये भलियाई पैदा केरते; मतलब तैन केरे लेई ज़ैना तैनी अपने मेर्ज़रे मुताबिक च़ुनोरेन। 29 किजोकि तैने ज़ैना पेइले च़ुने, ते पेइले ठहराए भी कि तैसेरे मट्ठेरे रूपे मां भोन, ताके तै बड़े ढ्लान मां ज़ेठो भोए। 30 फिरी ज़ैना तैने पेइले ठहराए, तैना च़ुने भी, ते ज़ैना च़ुने, तैना धर्मी भी ठहराए, ते ज़ैना धर्मी ठहराए तैन महिमा भी दित्तोरीए।

31 ते अस एन गल्‍लां केरे बारे मां कुन ज़ोम? अगर परमेशर इश्शे पासे, ते इश्शे खलाफ कौन भोइ बटते? 32 परमेशरे अपनु मट्ठू भी अपने लेई न रख्खू, बल्के तैन इश्शे सेब्भी केरे लेई तैसेरे दुश्मना केरे हवाले कियूं, ते तै मसीह सेइं असन तैन सब किछ देलो ज़ेसेरो वाधो तैने असन सेइं कियोरोए। 33 अस परमेशरेरे च़ुनोरम, कोई असन पुड़ परमेशरेरे सामने दोष न लेई बटे, किजोकि तैए ज़ैने अस धर्मी ठहरावरेम। 34 फिरी कौने ज़ै सज़ारो हुक्म देलो? कोई नईं, यीशु मसीह तैए ज़ै मरो, बल्के मुड़दन मरां ज़ींतो भोव, ते परमेशरेरे देइने पासे, ते इश्शे लेई बिनती भी केरते। 35 कौन असन मसीहेरे प्यारे करां अलग केरि बटते? मुसीबत या तंगी, या ज़ुलम, या काल, या नगूपन, या खतरो, या तलवार? इन मरां कोई भी चीज़ असन मसीहेरे प्यारे करां अलग न केरि बटे। 36 ज़ेन्च़रे पवित्रशास्त्रे मां लिखेरूए, "तेरे लेई अस हर वक्त मौतरे खतरे मां रहतम; अस मैरोने बैली भैड्डां केरे ज़ेरे गने जेवरेम।" 37 पन ज़ैने असन सेइं प्यार कियोरोए, तैसेरे ज़िरिये असन पूरे तरीके सेइं एन सैरी बुरी गल्‍लां पुड़ ज़ीत हासिल आहे। 38 किजोकि मीं पूरू याकीने, कि न मौत, न ज़िन्दगी, न स्वर्गदूत, न हुकूमतां, न ज़ै वक्त च़लोरोए, न एजनेबालो वक्त, न शक्ति, न उचार, 39 न डुग्घार ते न कोई होरि सृष्टि, असन परमेशरेरे प्यारे करां ज़ै इश्शे प्रभु यीशु मसीह मांए अलग केरि सकेली।