रोमियो 6

पापेरे लेई मर्रे ते मसीहेरे लेई ज़ींते

1 त अस कुन ज़ोम? कुन अस पाप केरते रहम, कि परमेशरेरो अनुग्रह बद्धतो गाए? 2 नईं, कधी नईं! अस ज़ैखन पापेरे लेई मरे ते फिरी किजो अग्रोवं जो पापे मां ज़िन्दगी बीताम? 3 तुस ज़ानतम कि ज़ैखन असेईं सेब्भी लोकेईं यीशु मसीहे सेइं साथी अक भोनेरे लेई बपतिस्मो नीयोरो थियो, तैखन अस तैस सेइं साथी मर्रे थिये। 4 ज़ैखन असेईं बपतिस्मो नीयोरो थियो तैखन अस मसीह सेइं साथी मरे ते दब्बे जे, ताके अस भी नव्वीं ज़िन्दगी ज़ींम, ज़ेन्च़रे मसीह बाजी परमेशरेरी महिमा सेइं मुड़दन मरां ज़ींतो कियो।

5 किजोकि अगर अस बपतिस्मेरे ज़िरिये मसीहेरी मौती मां शामल भोवरेम, त अस भी पक्‍के तैसेरे ज़ेरे ज़ींते भोमेले। 6 अस ज़ानतम कि इश्शी पुरानी इन्सानयत यीशु मसीह सेइं साथी क्रूसे पुड़ च़ाढ़ोरीए, ताके पापेरो जिसम बेफैइदो भोए, ते अस अग्रोवं जो पापेरे गुलैमी मां न रहम। 7 ज़ैखन मैन्हु मरते त तैखन तै पापेरी शेक्ति करां आज़ाद भोते। 8 एल्हेरेलेइ अगर अस मसीह सेइं साथी मरे, ते इश्शो विश्वास ईए कि तैस सेइं साथी ज़ींते भी भोमेले। 9 किजोकि अस एन ज़ानतम, कि मसीह मुड़दन मरां ज़ींतो भोवरोए ते तै फिरी न मरेलो, ते तैस पुड़ फिरी मौतरू राज़ नईं भोनू। 10 ज़ैखन मसीह मरो त तै एक्‍की बार सेब्भी केरे पापेरे लेई मरो; पन हुनी तै ज़ींतोए, ते सिर्फ परमेशरेरे लेई ज़ींतोए। 11 एन्च़रे तुस अपने बारे मां भी सोचा कि तुस पापेरे लेई त मरोरेथ, पन यीशु मसीहे तुसन ज़िन्दगी दित्तोरीए ते तुस परमेशरेरे लेई ज़ींते आथ।

12 एल्हेरेलेइ तुस अपने जानी मां पापेरी इच्छान राज़ केरने न देथ, ते तुस तैन केरे मुताबिक न च़ला। 13 ते अपने जिसमेरे अंगन बुरे कम्मां केरे लेई पापे न सौंफा, पन अपने आपे मुड़दन मरां ज़ींते सेमझ़तां परमेशरे सौंफा। ते अपने जिसमेरे अंगन धार्मिकतारे कम्मां केरे लेई परमेशरे सौंफा। 14 ते तुसन पुड़ पापेरू राज़ न भोल्हु, किजोकि तुस मूसेरे कानूनेरे अधीन नईं बल्के अनुग्रहेरे अधीन आथ।

धार्मिकता ते दास

15 त कुन भोव कि अस एल्हेरेलेइ पाप केरम, कि असां मूसेरे कानूनेरे अधीन नईं बल्के अनुग्रहेरे? नईं, कधे नईं। 16 तुस ज़ानथ, कि ज़ैखन तुस ज़ेसेरो हुक्म मन्नेरे लेई अपनो आप गुलामां केरे ज़ेरे सौंफतथ त तुस तैसेरे गुलाम आथ। चाए पापेरी ज़ेसेरो अन्त मौते, चाए हुक्म मन्नेरे ज़ेसेरो अन्त धार्मिकताए। 17 तुस त पेइले पापेरे गुलाम थिये पन हुनी तुसन ज़ै शिक्षा मैल्होरी थी तैस पूरे दिले सेइं मन्नेबाले भोए, एल्हेरेलेइ अवं परमेशरेरू शुक्र केरताईं। 18 ते हुनी परमेशरे तुस पापेरी शेक्ति करां छुटेइतां आज़ाद किये, ते तुस परमेशरेरे गुलाम बने ताके तुस ज़ैन रोड़ू तैन केरि बटथ। 19 अवं ई मिसाल एल्हेरेलेइ इस्तेमाल केरने लगोरोईं, किजोकि तुश्शे लेई इन समझ़नू मुश्किले। ज़ेन्च़रे तुसेईं पेइले अपनो आप गुलामेरे ज़ेरो बुरां कम्मां केरे लेई अधर्मे ते बुरैइारे लेई सौंफोरे थियो, तेन्च़रे हुनी तुस अपने आपे परमेशरेरी सेवारे लेई सौंफा ताके तुस पूरे तरीके सेइं तैसेरे भोथ।

20 ज़ेइस तुस पापेरे गुलाम थिये, त तुसन परमेशर खुश केरनेरी कोई ज़रूरत न थी। 21 तुसन पुरैनी ज़िन्दगी सेइं कुन फैइदो मैल्हो? सिर्फ तुस शरमातथ, किजोकि ज़ैन तुसेईं कियूं तैसेरो नितीजो सिर्फ मौते। 22 पन हुनी तुस पापे करां आज़ाद भोवरेथ ते तुस परमेशरेरे दास बनोरेथ। किजोकि इना गल्‍लां तुसन पवित्र बनैली ते तुसन हमेशारी ज़िन्दगी मैल्हेली। 23 किजोकि पापेरी मज़दूरी त मौते, पन परमेशरेरू वरदान इश्शे प्रभु यीशु मसीह मां हमेशारी ज़िन्दगीए।