1 एल्हेरेलेइ अवं पुछ़ताई, कुन परमेशरे अपने लोक शारे? नईं, कधे नईं! अवं भी त इस्राएली आईं, अब्राहमेरे खानदाने ते बिन्यामीनेरे गोट्ले मरां आईं। 2 परमेशरे अपने तैना लोक न शारे, ज़ैना तैने पेइले च़ुने, कुन तुस न ज़ानथ, कि पवित्रशास्त्र एलिय्याहेरे बारे मां कुन ज़ोते, कि एलिय्याह नेबे इस्राएली लोकां केरे खलाफ परमेशरे कां बिनती केरते? 3 तैने ज़ोवं, "हे प्रभु, तैनेईं तेरे नबी मारे, ते तेरी बलिदान केरनेरी ठारां बरबाद की, ते सिर्फ अवं अकैल्‍लो बच़ोरोई ज़ै तीं मन्ने बालोईं, हुनी तैना मीं भी मारने चातन।" 4 पन परमेशरे एलिय्याहे जुवाब दित्तो, "मीं अपने लेई 7000 मड़द रखोरेन, ज़ैनेईं बाल देबतेरे मूरती कां मथ्थो नईं टेकोरो।" 5 एन्च़रे इस वक्ते भी थोड़े ज़ेरे लोक बच़ोरेन, ज़ैना परमेशरे अपने अनुग्रह वजाई सेइं च़ुनोरेन। 6 अगर इन परमेशरेरे अनुग्रहे सेइं भोवरूए, ते फिरी मूसेरे कानूनेरे मुताबिक कम केरने सेइं नईं, नईं त फिरी अनुग्रह, अनुग्रह न राव।

7 ते फिरी नितीजो कुन भोव? कि इस्राएली ज़ेसेरी तोपी मां आन, तै तैन न मैल्हो; पन च़ुनोरेन मैल्हो, ते होरे बाकी लोक सखत कियोरेन। 8 ज़ेन्च़रे पवित्रशास्त्रे मां लिखेरूए, "परमेशरे अज़्ज़ेरे दिहाड़ी तगर तैन केरो मन ते दिल सुस्त कियो, ते एरी एछ़्छ़ी दित्ती कि ताके तैना लेही न बटन, ते एरे कन ताके तैना शुनी न बटन।"

9 ते राज़ो दाऊद ज़ोते,

"अवं परमेशरे कां प्राथना केरताईं कि तै तैन केरे तिहारन मां ट्लेइ बटे ते फसाए,

ते परमेशर तैन झुकाए ते तैन सज़ाह देइ बटे।

10 ते तैन केरि एछ़्छ़न पुड़ आंधरू भोए, ताके तैना लेही न बटन,

ते परमेशर तैन, तैन केरि परेशैनी केरे वजाई सेइं दुखी केरि बटे।"

11 त अवं पुछ़ताई, कुन यहूदी लोक ठोकर लगनेरे वजाई सेइं हमेशारे लेई बिछ़ड़े? नईं, कधे नईं! पन तैन केरे विश्वास न केरनेरे वजाई सेइं गैर कौमन मुक्ति मैल्ही ताके तैन जलन भोए। 12 ते अगर तैन केरे विश्वास न केरनेरे वजाई सेइं गैर कौमरे लोकां केरू भलू भोवं, हकीक्ति मां गैर कौमां केरे लेई बड़ू रोड़ू भोल्हु ज़ेइस यहूदी लोक परमेशरे कां वापस एज्जेले।

13 अवं तुसन गैर कौमरे लोकन सेइं एन ज़ोताईं। कि अवं गैर कौमरे लोकां केरो प्रेरित आईं, ते अपने सेवारे बारे मां घमण्ड केरि। 14 ताके अवं कोन्ची तरीके सेइं अपने लोकन जलन करेइतां तैन मरां किछन मुक्ति दूवेईं। 15 किजोकि इस्राएली लोकां केरू शारू गानू दुनियारे लोकां केरे लेई मेल मिलापेरी वजा बनी, ते तैन केरू यीशु कबूल केरनू कि तै मसीह आहे, एन एरू भोल्हु ज़ेन्च़रे मुड़देरू ज़ींतू भोनू! 16 ते किजोकि पूर्वज अब्राहम ते दादे-पड़दादे पवित्र थिये ते तैन केरि खानदानी भी पवित्र भोल्ही, ज़ैखन चढ़तलरो पेइलो पेइड़ो परमेशरेरे लेई च़ाढ़नेरे वजाई सेइं पवित्र भोवरोए, त पूरू सन्नोरू अट्टू भी पवित्र भोवरूए, ते ज़ैखन ज़ील पवित्र भोवं, त डाल भी पवित्ररन।

17 इस्राएली लोक ज़ैतूनेरे बुट्टेरे डैलड़ी केरे ज़ेरे आन ते इश्शे दादे-पड़दादे अब्राहम, इसहाक ते याकूब एस बुट्टेरे ज़ीलां केरे ज़ेरे आन, ते अगर किछ डैलड़ी ट्लोड़ी जेई, त तुस गैर कौमरे लोक जंगली ज़ैतूनेरे ज़ेरे आथ, ते तुस तैस असली ज़ैतूने मां कलम कियोरेथ ते ज़ीलां केरे खुराकारे हकदार भोवरेथ। 18 त तीं तैन डैलड़न पुड़ ज़ैना ट्लोड़ी जेई ते शैरी जेई तैन पुड़ घमण्ड न लोड़े कियेरू, ते अगर तू घमण्ड केरस त याद रख कि तू ज़ीलन नईं, पन ज़ील तीं सम्भालाते। 19 फिरी तू ज़ोलो, "डैलड़ी एल्हेरेलेइ ट्लोड़ी, कि अवं कलम भोईं।" 20 इन सच़्च़े, तैना त विश्वास न केरनेरे वजाई सेइं ट्लोड़ी जेई, पन तू विश्वासे सेइं बनोरो रहतस, एल्हेरेलेइ घमण्ड न केर, पन डर। 21 किजोकि परमेशरे असली डैलड़न पुड़ दया न की, त तुसन पुड़ भी दया न केरेलो ज़ैना कलम कियोरेथ। 22 एल्हेरेलेइ परमेशरेरी दया ते सखती हेर! ज़ैना पाप केरनेरे वजाई सेइं झ़ड़े तैन पुड़ सखती, पन तेरे लेई दया, ते तू अपने आपे पुड़ तैसेरी दया बनोरी राने दे, नईं त तू भी कट्टो गालो। 23 ते अगर यहूदी लोक फिरी विश्वास केरन, त कलम केरे गानेन किजोकि परमेशर एन केरनेरे लेई शेक्ति बालोए। 24 किजोकि अगर तू तैस ज़ैतून, ज़ै स्भावे सेइं जंगलीए कट्टो जेव, ते ज़ै असलीए तैसेरे खलाफ रोड़े ज़ैतूने मां लव जेव, ते इना असली डैलड़ी आन अपने ज़ैतून मां किजो न लेई गैली।

25 हे ढ्लाव ते बेइनव, अवं न चैई कि तुस गैर कौमरे लोक अपने बारे मां घमण्ड केरेथ। इस्राएली लोकन सेइं कुन भोव, अवं एस भेदेरे बारे मां तुसन सेइं ज़ोताईं, कि ज़ांतगर गैर कौमां केरे बड़े लोक मसीह कां न एज्जन, तांतगर किछ इस्राएली लोकां केरो दिल सखत रालो। 26 ते एन्च़रे सैरी इस्राएली लोकन मुक्ति मैल्‍लनीए; ज़ेन्च़रे पवित्रशास्त्रे मां लिखेरूए, "छुटानेबालो सिय्योनेरां (यरूशलेम) एज्जेलो, ते अभक्ति इस्राएली लोकन करां दूर केरेलो। 27 ते तैन सेइं मेरो ई करार भोल्हो, कि अवं तैन केरे पाप माफ़ केरेलो।" 28 खुशखेबरारे वजाई त तैना तुश्शे लेई परमेशरेरे बैरिन, पन परमेशरेरे च़ुन्नेरे वजाई सेइं ते तैन केरे बुज़ुर्गन दित्तोरे वचनेरे वजाई सेइं परमेशर तैन सेइं हेजू भी प्यार केरते। 29 किजोकि परमेशरे अपने वरदान्न करां ते अपने कुजाने करां कधे अपनो मन न बदले। 30 किजोकि ज़ेन्च़रे पेइले तुसेईं परमेशरेरो हुक्म न थियो मन्नोरो, पन हुना इस्राएली लोकां केरे हुक्मन मन्ने सेइं तुसन पुड़ दया भोइ। 31 तैना हेजू भी हुक्म न मन्नेबालेन कि ज़ै दया तुसन पुड़ भोवरीए तैन पुड़ भोल्ही। 32 किजोकि सेब्भी लोकेईं हुक्म नईं मन्नोरो एल्हेरेलेइ तैना कैदी केरे ज़ेरे बनोरेन। पन परमेशरे एन एल्हेरेलेइ कियूं ताके तैन सेब्भन पुड़ दया केरि बटे।

33 वाह! परमेशर सेब्भी केरे लेई भलोए ते ज्ञानी ते अक्लमन्दे, कोई भी तैसेरे खियालन बियान न केरि बटे ते कोई तैसेरी बत्तां न सेमझ़ी बटे। 34 ज़ेन्च़रे पवित्रशास्त्रे मां लिखेरूए,

"कोई न ज़ाने प्रभुएरे मने मां कुने

या तैस सलाह देनेबालो कौने?

35 या केने पेइले तैस किछ दित्तू

ज़ेसेरो बदलो तैस दित्तो गाए?"

36 किजोकि सब किछ परमेशरेरी तरफां आहे। तैन्नी सब किछ बनाव, ते तैसेरे ज़िरिये, ते तैसेरेलेइ सब किछे। तैसेरी आदर सदा भोती राए। आमीन।