1 अवं मसीह मां सच़ ज़ोताईं, झूठ न ज़ोईं, ते मेरो ज़मीर भी पवित्र आत्माई मां गवाही देते। 2 कि मीं बड़ो दुखे, ते मेरो दिल लगातार मेरे लोकां केरे लेई उदास भोते। 3 किजोकि मेरे यहूदी ढ्ला ते बेइनां केरे लेई, अवं हमेशारे लेई श्रापित भोथो ते मसीह करां अलग भोथो अगर इस वजाई सेइं तैन मुक्ति मैलती। 4 तैना इस्राएलिन; ते तैना परमेशरेरे लेपलक बच्‍चे भोनेरे लेई च़ुनोरेन, ते परमेशरेरे अपनि महिमा तैन पुड़ बांदी की। ते तैनी तैस सेइं करार कियो, ते तैन मूसेरो कानून दित्तो। ते तैनी तैन अपनि आराधना ते अपने खूबसूरत वाधे पूरे केरनेरे लेई हासिल केरनेरो मौको दित्तो। 5 अब्राहम, इसहाक ते याकूब तैन केरे दादे पड़दादे थिये, ते मसीह भी जिसमेरे लिहाज़े सेइं तैने मरां अव, तै परमेशरे ते सेब्भन करां बाए ज़ै सेब्भन पुड़ राज़ केरते, तैसेरी महिमा हमेशा भोती राए। आमीन।

6 पन इन नईं, कि परमेशरेरू वचन टलू कि, सारे ज़ैना इस्राएलेरे वंशन, तैना सब सच़्च़े इस्राएली नईं। 7 ते न अब्राहमेरे वंश मां ज़र्म भोने सेइं सब परमेशरेरे बच्‍चे भोन। पन पवित्रशास्त्रे मां परमेशर अब्राहमे सेइं ज़ोते, "ज़ैना इसहाकेरे वंशे मरां पैदा भोल्हे तैन्ने तेरू वंश मन्नू गालू।" 8 मतलब ज़ैना जिसमेरे तरीके सेइं ज़र्म घिन्तन तैना परमेशरेरे बच्‍चे नईं, पन सिर्फ वाधेरे बच्‍चे अब्राहमेरे बच्‍चे गने गातन। 9 किजोकि वाधेरू वचन इने, "अवं एग्री साल इस वक्ते फिरी एज्जेलो, ते सारारू अक मट्ठू भोनूए।" 10 ते सिर्फ एन नईं, पन ज़ेइस रिबका भी एक्‍की सेइं मतलब इसहाके सेइं दोज़ींती थी ते तैसेरे पेटे मां दूई बच्‍चे थिये। 11,12 ते हेजू तगर तैना बच्‍चे न थिये ज़र्मोरे, ते न तैनेईं रोड़ू या बुरू कियेरू थियूं, कि परमेशरे रिबका सेइं ज़ोवं, तेरू बड्डू मट्ठू निकड़ेरी सेवा केरेलू। परमेशरे एन एल्हेरेलेइ ज़ोवं कि एन हिराए, कि तै अपनि मेर्ज़ी सेइं फैसले केरते ते इन तैन मट्ठां केरे रोड़ां या बुरे कम्मां केरे वजाई सेइं न थियूं। 13 ज़ेन्च़रे पवित्रशास्त्रे मां लिखेरूए, "मीं याकूबे सेइं प्यार कियो, पन एसावेरो इन्कार कियो।"

14 ते अस कुन ज़ोम, कि परमेशर न्याय केरते कि तै ज़ैस चाते च़ुनते? नईं, कधे नईं! 15 किजोकि परमेशर मूसे सेइं ज़ोते, "अवं ज़ैस केन्ची पुड़ दया केरनि चैई, तैस पुड़ दया केरेलो ते ज़ैस पुड़ तरस केरनो चैई तैस पुड़ तरस केरेलो।" 16 एल्हेरेलेइ परमेशर तैस च़ुनेलो ज़ैस पुड़ तै दया हिरानी चाते; तैसेरी इच्छा लोक ज़ैन चातन या केरनेरी कोशिश केरतन तैस पुड़ निर्भर नईं। 17 किजोकि पवित्रशास्त्रे मां परमेशरे मिस्रेरे राज़े फ़िरौने* सेइं ज़ोवं, "मीं तू एल्हेरेलेइ राज़ो बनोरोस, कि तीं मां अपनि शक्ति हिरेईं, ते मेरे नंव्वेरो प्रचार सैरी ज़मीनी पुड़ भोए।" 18 ते ज़ैस पुड़ तै चाते, तैस पुड़ दया केरते; ते ज़ैस चाते ढीठ केरते।

19 ते किछ लोक मीं सेइं ज़ोले, "अगर एन्च़रे, त फिरी परमेशर केन्च़रे फैसलो केरि बटते कि अस गलत आम? एल्हेरेलेइ कोई भी तैस ज़ैन तै चाते केरने करां न रोकी बटे।" 20 हे मैन्हु, तू कौन आस, ज़ै तू परमेशरे सेइं बेंस केरतस? कुन बनोरी चीज़ बनानेबाले सेइं ज़ोई बटतीए, "तीं अवं एरी किजो बनाई?" 21 कुन कुम्हारे मित्ती पुड़ अधिकार नईं, कि एक्‍की लुनदे मरां, अक भांड आदरारे लेई बनाए, ते होरू निरादरारे लेई बनाए? 22 (परमेशरे अपने बनावरो लोकन सेइं ज़ैन तै चाए तैन केरनेरो अधिकारे) ज़ैना नाश भोनेरे काबल थिये, तैन केरे खलाफ परमेशर अपनो क्रोध हिरानो ते अपनि सामर्थ बांदी केरनी चातो थियो, पन तैसेरे बदले मां तैनी सबर की। 23 (तैनी एन कियूं) किजोकि तै हिरानू चातो थियो (मसीहेरे मौतरे बलिदानेरे ज़िरिये) तै केत्रो महाने, ज़ैखन तै तैन लोकन पुड़ दया केरते ज़ैना तैनी अपनि महिमाई मां शामल भोने लेई च़ुनोरेन। 24 मतलब असन पुड़ ज़ैना तैने न सिर्फ यहूदन मरां बल्के गैर कौमन मरां भी च़ुने।

25 ज़ेन्च़रे तै होशे नेबेरे किताबी मां ज़ोते,

"ज़ैना मेरे लोक न थी, तैन अवं अपने लोक ज़ोलो।

ते ज़ैना लोक मेरे ट्लारे न थिये, तैन जो ट्लारे ज़ोइलो।

26 ते तैस्से ठैरी ज़ैड़ी परमेशरे ज़ोवरू थियूं, तुस मेरे लोक नईं,

तैस्से ठैरी ज़ींतो परमेशर तैन जो ज़ोलो तुस मेरे बच्‍चे।"

27 ते यशायाह नबी इस्राएली लोकां केरे बारे मां ज़ोते, "चाए इस्राएलेरी कुटमेरी गिनती समुद्रेरे किनारे रेतरी ज़ेरि बड़ी जादे भोल्ही फिर भी तैन मरां थोड़े बच़ेले। 28 किजोकि प्रभु जल्दी दुनियारे सेब्भी लोकां केरो सेखती सेइं न्याय केरेलो।" 29 ज़ेन्च़रे यशायाह नेबे पेइलू भी ज़ोवरू थियूं, "कि सर्वशक्तिमान परमेशरे इश्शे लेई इश्शू वंश न बच़ाथो, त अस सदोम ते अमोरा नगरां केरे ज़ेरे भोने थिये, ज़ैना परमेशरे पूरे तरीके सेइं बरबाद कियां।"

30 ते अस कुन ज़ोम? इन कि ज़ैना गैर कौमां केरे लोक ज़ैना धार्मिकता न थी तोपते, तैनेईं धार्मिकता हासिल की, मतलब तै धार्मिकता ज़ै विश्वासे सेइं आहे। 31 पन इस्राएली लोक मूसेरो कानून मेनतां परमेशरे करां धर्मी ज़ुवानू चाते थिये, पन तैन न भोइ बटु। 32 किजो नईं? एल्हेरेलेइ कि तैना विश्वासे सेइं नईं, पन मूसेरो कानून मेनतां धर्मी भोनेरी कोशिश केरते थिये, तैनेईं तैस ठोकर खानेबाले घोड़े सेइं ठोकर खाइ। 33 ज़ेन्च़रे पवित्रशास्त्रे मां लिखेरूए, "हेरा अवं सिय्योने मां अक ठेस लानेबालो घोड़, ते ठोकर खाने बाली चट्टान रखताईं; ते ज़ै तैस पुड़ विश्वास केरेलो, तै शरमिन्दा न भोल्हो।"