1 हे ट्लारव, हर एक्‍की मैन्हेरू याकीन न केरा ज़ै दावो केरते कि परमेशरेरी आत्मा तैस मांए, बल्के आत्मां अज़माथ कि तै परमेशरेरी तरफांए कि नईं; किजोकि बड़े झूठे नबी दुनियाई मां निसोरेन। 2 परमेशरेरी आत्मा तुस इस रीति सेइं पिशैनी बटतथ, कि ज़ै आत्मा इन मन्ने, कि यीशु मसीह जिसमे मां एवरोए तै परमेशरेरे तरफांए। 3 ते ज़ै आत्मा यीशु न मन्ने, तै परमेशरेरे तरफां नईं, ते तैए मसीहेरी खलाफत केरनेबाली आत्माए, ज़ेसेरे बारे मां तुसेईं शुनोरू, कि तै एजने बालीए, ते अज़ भी दुनियाई मांए। 4 हे ट्लारे बच्‍चव, तुस परमेशरेरे लोक आथ, ते तुसेईं तैन झूठन पुड़ ज़ींत हासिल कियोरीए, किजोकि पवित्र आत्मारी शक्ति ज़ै तुसन मांए तै शैतानेरे शेक्ति करां बड्डी, ज़ै दुनियाई पुड़ राज़ केरते। 5 तैना झूठे नबी दुनियारेन, एल्हेरेलेइ तैना दुनियारी गल्‍लां ज़ोतन, ते दुनियारे लोक तैन केरि शुन्तन। 6 अस परमेशरेरेम, ज़ै परमेशरे ज़ानते, तै इश्शी शुन्ते, ज़ै परमेशरे न ज़ांने तै इश्शी न शुने, एल्हेरेलेइ अस तैस आत्माई ज़ै सच़ ज़ोतीए ते ज़ै आत्मा झूठ ज़ोतीए पिशानतम।

7 हे ट्लारव, अस एक्‍की होरि सेइं प्यार केरम; किजोकि प्यार परमेशरे करा आहे, ज़ै कोई प्यार केरते, तै परमेशरेरो बच्‍चोए, ते परमेशरे ज़ानते। 8 ज़ै होरन सेइं प्यार न केरे, तै परमेशरे न ज़ाने, किजोकि परमेशर प्यारे। 9 ज़ै प्यार परमेशर असन सेइं केरते, तै इस सेइं बांदो भोव, कि परमेशरे अपनु अकैल्‍लू मट्ठू दुनियाई मां भेज़ू, कि तैस पुड़ विश्वास केरने सेइं असन हमेशारी ज़िन्दगी मैल्हे। 10 प्यार इस सेइं नईं कि असेईं परमेशरे सेइं प्यार कियो, पन इस मांए, कि तैने असन सेइं प्यार केरो, ते इश्शे पापां केरे छुटकारेरे लेई अपनु मट्ठू भेज़ू। 11 हे ट्लारव, ज़ैखन परमेशरे असन सेइं एरो प्यार कियो, त असेईं भी एक्‍की होरि सेइं प्यार कियोरो लोड़े। 12 परमेशर कधी केन्चे नईं लाहोरो; अगर अस एप्पू मांमेइं प्यार रखम, त परमेशर असन मां बनो रहते; ते तैसेरो प्यार असन मां सिद्ध भोवरोए।

13 इस सेइं अस ज़ानतम, कि अस परमेशरे मां बनो रहतम, ते परमेशर असन मां, किजोकि तैने असन अपने आत्माई मरां दित्ती। 14 ते असेईं हेरू भी, ते गवाही भी देतम, कि बाजी परमेशरे, मट्ठू दुनियाई मां मुक्ति देनेबालो केरतां भेज़ोरूए। 15 ज़ै इन मन्ते, कि यीशु परमेशरेरू मट्ठूए, परमेशर तैस मां बनोरो रहते, ते तै परमेशरे मांए। 16 ते ज़ै प्यार परमेशर असन सेइं केरते, तै असेईं ज़ानो, ते असन तैस पुड़ विश्वासे, परमेशर प्यारे, ज़ै प्यारे मां बनोरो रहते, ते परमेशर तैस मां बनोरो रहते। 17 इस सेइं प्यार असन मां सिद्ध भोव, कि असन न्यायेरे दिहैड़ी दिलेरी भोए, किजोकि ज़ेरो तै आहे, तेरे अस भी दुनिया मां अहम। 18 प्यारे मां डर न भोए, बल्के सिद्ध प्यार डरे दूर केरते, किजोकि डरेरो रिश्तो सज़ाही सेइं भोते, ते ज़ै डरते, तै प्यार मां सिद्ध नईं। 19 अस परमेशरे सेइं ते होरन सेइं एल्हेरेलेइ प्यार केरतम, कि पेइलो परमेशरे असन सेइं प्यार कियो। 20 अगर कोई ज़ोए कि, "अवं परमेशरे सेइं प्यार केरताईं," पन अपने ढ्लाए सेइं बैर रख्खे, तै झूठोए, किजोकि ज़ै विश्वासी ढ्लाए सेइं ज़ै तैने लाहोरोए प्यार न केरे, त परमेशरे सेइं भी ज़ै तैने लाहोरो नईं, प्यार न केरि सके। 21 ते तैस करां असन ई हुक्म मैलते, कि ज़ै अपने परमेशरे सेइं प्यार केरते, तै विश्वासी ढ्लाए सेइं भी प्यार केरते।