1 राज़े 17

एलिय्याह नेबेरे कम्मां केरि शुरुआत

1 एलिय्याह नंव्वेरो अक नबी गिलाद प्रदेशेरे तिशबे नगरेरो रानेबालो थियो। एक्सां तैने अहाब राज़े कां एइतां तैस सेइं ज़ोवं, "इस्राएलेरो परमेशर यहोवा ज़ेसेरे हज़ूरी मां अवं हाज़र रहताईं, तैसेरी कसम कि इन सालन मां ज़ांतगर अवं न ज़ोईं तांतगर झ़ड़ी न बखेली, ते न ट्लेल पेली।"✝17:1 लूक. 4:25;याक. 5:17;प्रका. 11:6. 2 तैखन यहोवा तैस सेइं ज़ोवं, 3 "इट्ठां च़ेलतां पूरबेरे पासे गा ते करीत नंव्वेरे नाले मां ज़ै यरदन दरियारे पूरबे मांए तैड़ी गेइतां छ़ेप्पी गा। 4 तैस नालेरू पानी तू पीयां, ते मीं कंव्वन हुक्म दित्तोरोए कि तैना तीं तैड़ी खाने जो देन।" 5 एल्हेरेलेइ यहोवारू एन वचन मेनतां तै यरदन दरियाएरे पूरबे मां करीत नंव्वेरे नाले कां गेइतां छ़ेप्पी जेव। 6 ते रोज़ झ़ेझ़ां ते ड्लवझ़ां कंव्वां तैसेरे लेई रोट्टी ते मास आनतां थियां ते तै नालेरू पानी पीतो थियो। 7 किछ दिहाड़ना बाद इस्राएल मुल्खे मां झ़ड़ी न भोनेरे वजाई सेइं नालो शुक्‍की जेव। 8 तैखन यहोवा एलिय्याह सेइं ज़ोवं, 9 "तू सीदोन प्रदेशेरे सारफत नगरे मां गेइतां तैड़ी रा। शुन, मीं तैट्ठेरी एक्‍की विधवा कौन्शी हुक्म दित्तोरोए कि तै तेरे लेई खाने पीनेरो इंतज़ाम केरे।"✝17:9 लूक. 4:26. 10 तैखन तै तैट्ठां अग्रोवं च़लो जेव, ते सारफत नगरे मां जेव, नगरेरे फाटके कां गेइतां कुन हेरते, कि अक विधवा कौन्श कैड़ु घेरने लगोरीए, तैनी तैस कुजेइतां ज़ोवं, "कोन्ची भांडे मां मेरे पीनेरे लेई थोड़ू ज़ेरू पानी आन।" 11 ज़ैखन तै पानी आन्ने च़लोरी थी, त तैनी तैस जो हक़ देइतां ज़ोवं, "एंइते बार मेरे लेई रोट्टरो अक टुक्ड़ो ऐन्हां।" 12 पन तैस कौन्शां ज़ोवं, "तेरे परमेशर यहोवारी कसम मेरे कां अक भी रोट्टी नईं ते सिर्फ लोंदे मां अक मुठड़ी अट्टू ते भांडे मां थोड़ो ज़ेरो तेले, ते अवं थोड़ां ज़ेरां कैड़ु गांते बार नेइतां ते अपने ते अपने मट्ठेरे लेई रोट्टी बनेई, ते फिरी असां तैस खाम, ते फिरी मेरि गाम।" 13 तैखन एलिय्याह नेबे तैस सेइं ज़ोवं, "डर न; घरे गा ते ज़ेन्च़रे तीं ज़ोवरूए तेन्च़रे केर, पन पेइले मेरे लेई अक निकड़ी ज़ेरि रोट्टी पकेइतां आन, ते फिरी अपने लेई ते अपने मट्ठेरे लेई बना। 14 किजोकि इस्राएलेरो परमेशर यहोवा एन ज़ोते, कि ज़ांतगर यहोवा ज़मीनी पुड़ झ़ड़ी न बखालो तांतगर न त तैस लोंदे मरां अट्टू मुकेलू, ते न तैस भांडे मरां तेल मुकेलो।" 15 तैखन तै च़ली जेई, ते एलिय्याहेरे ज़ोनेरे मुताबिक कियूं, तेइसेरे देंते तै कौन्श ते तैसारो घरानो बड़े दिहाड़न तगर खातो राव। 16 यहोवारे तैस वचनेरे मुताबिक ज़ैन तैनी एलिय्याहेरे ज़िरिये ज़ोवरू थियूं, तैस लोंदे मरां अट्टू खतम न भोवं ते न तैस भांडे मरां तेल घटो।

17 किछ च़िरेरां बाद तैस कौन्शरू मट्ठू ज़ै घरेरी मालिकन थी, बिमार भोइ जेवं, ते तैसेरी बिमारी बेधी जेई कि एड़ी तगर नोबत अई कि तैस शाह घिन्नो बन्द भोइ जेव। 18 तैखन तै एलिय्याहे सेइं ज़ोने लगी, "हे परमेशरेरे नबी! मीं तेरू कुन बिगाड़ेरूए? कुन तू मेरे कां एल्हेरेलेइ एवरोस कि मेरू मट्ठू मेरि गाए, ते मेरे पाप याद करास?" 19 तैनी तैस कौन्शी सेइं ज़ोवं, "अपनु मट्ठू तू मीं दे;" तैखन तैस कौन्शां तैन मट्ठू तैसेरे कुम्मे मां छ़ेडतां तैनी बेइयें कमरे मां रख्खू, ज़ैड़ी तै एप्पु रहतो थियो, तैनी तैन खट्टी पुड़ रख्खू। 20 तैखन एलिय्याह उच्‍ची आवाज़ी मां प्राथना की, "हे मेरे परमेशर यहोवा! कुन तीं एस कौन्शरू मट्ठू मैरतां, ज़ैसारे कां अवं बिशोरोईं, एस पुड़ भी आफत आनोरीए?" 21 तैखन तै मट्ठे पुड़ ट्लाई बार लेटो, ते तैनी यहोवा कां प्राथना केरतां ज़ोवं, "हे मेरे परमेशर यहोवा! एस मट्ठेरे प्राण एसमां फिरी वापस आन।" 22 एलिय्याहेरी प्राथना यहोवा शुनी, ते मट्ठेरे प्राण तैस मां फिरी आए ते तैन खड़ू भोवं। 23 तैखन एलिय्याहे तैन मट्ठू बेइयें छतरां कमरे मरां बुन्हीं छती आनू, ते एन ज़ोइतां एलिय्याहे तैन मट्ठू तैसेरी अम्मरे हथ्थे मां सौंफू, "हेर तेरू मट्ठू ज़ींतूए।" 24 तैखन तैस कौन्शां एलिय्याहे सेइं ज़ोवं, "हुनी मीं याकीन भोवं कि तू परमेशरेरो नबी आस, ते ज़ैन वचन यहोवा तेरे ज़िरिये ज़ुवाते तैन सच़ भोते।"