1 सुलैमाने अपनो मेहल भी बनाव, ते तैस बनाने मां 13 साल लग्गे।

2 तैनी लबानोनेरो बन नंव्वेरो मेहल बनाव ज़ेसेरी लम्बाई 10 हथ, ते चौड़ाई 50 हथ ते ऊँचाई 30 हथ थी; तै त गैइड़ेरे खम्भां केरि च़ेवर बारन पुड़ बनाव ते गैइड़ेरी कन्डेलां छ़ेडोरी थी। 3 ते 45 खम्भन पुड़ गैइड़ेरी छती बाले कमरे बने मतलब एक्‍की-एक्‍की मंज़ली मां 15 कमरे बने। 4 ट्लेइए मंज़लन मां केड़ी लेवरी थी, ते ट्लेइने छतन मां दैरी आमने-सामने बेनोरी थी। 5 ते सेभी दारां ते चुकाठां केरि लकड़ी चौरस थी, ते ट्लाईए छतां केरि दैरी आमने-सामने बेनि।

6 तैनी खम्भन बालो अक बड्डो कमरो बनाव ज़ेसेरी लम्बाई 50 हथ ते चौड़ाई 30 हथ थी, इन खम्भां केरे सामने खम्भन बालो अक ओसारो, ते तैसेरे सामने अक छज्जी भी बनेवरी थी ज़ै बेइरीं पासे थी।

7 फिरी तैनी न्यायेरे तखतेरे लेई अक ओसारो बनाव, ज़ैस जो न्यायेरो कमरो ज़ोवं जेवं, ज़ैस मां फर्शे करां लेइतां छती तगर गैइड़ेरी तेख्ती लेवरी थी।

8 तैसेरे रानेरे मेहल ज़ैन तैस ओसारेरे अन्तर अक होरू अंगन बनू, तैन भी तैस्से तरीके सेइं बनू। फिरी तैस्से ओसारेरे सामने करां सुलैमाने फ़िरौनेरी कुइअरे लेई ज़ैस सेइं तैने ड्लाह बनेवरो थियो, अक होरो मेहल बनाव।

9 एना सैरी इमारतां बेइर अन्तर मुनीयादी करां लेइतां छती तगर बड़े कीमती ते तराशोरे घोड़ेईं सेइं बनेवरी थी, ज़ैना नैपतां कटोरे थिये; ते तैना बेइरीं अंगने करां लेइतां बड्डे अंगन तगर लेवरे थिये। 10 तैसेरी मुनीयाद कीमती ते बड्डे-बड्डे मतलब 10-10 ते 8-8 हथ लम्मे घोड़ेईं सेइं बनेवरी थी। 11 ते बाह भी बड़े कीमती घोड़ लगोरे थिये, ज़ैना नापी सेइं तराशोरे थिये, ते गैइड़ेरी लकड़ी भी लगोरी थी। 12 बड्डे अंगनेरे च़ेवरे पासन घड़ाई कियोरे घोड़ां केरे ट्लाई रद्दे, ते गैइड़ेरी लेकड़रो अक रद्दो थियो, ज़ेन्च़रे यहोवारे भवनेरे एन्त्री अंगने मां ते भवनेरे बड्डे ओसारे मां लगोरे थिये। 13 फिरी सुलैमान राज़े सोर नगरे मरां हूराम मिस्त्री कुजव। 14 तैन नप्ताली गोट्ल मरां कोन्ची विधवा कौन्शरू मट्ठू थियूं, ते तैसेरो बाजी सोर नगरेरो रानेबालो अक ठंठार थियो, तै पितलरे हर किसमेरे कारीगिरी मां माहिर थियो, एल्हेरेलेइ तै सुलैमान राज़े कां एइतां पितलरू सारू कम केरने लगो। 15 तैनी पितलरे 18-18 हथ उच्‍चे खम्भे बनाए, ते एक्‍की-एक्‍केरो घेरो 12 हथ सूत थियो इना भी अन्त्रमेईं खाली थिये, ते इसेरी धातरी मोटाई च़ेवर अंगल थी। 16 तैनी खम्भन पुड़ बह लानेरे लेई पितलरी दूई केंगनी बनेई; तैन सेभी केरि ऊँचाई पंच़-पंच़ हथ थी। 17 तैसेरां बाद तैन खम्भां केरि च़ोटी पुड़ केंगनी केरे लेई च़ेवर खानां केरि सत-सत जैली, ते शंगलां केरि सत-सत झालरां बेनि। 18 तैनी खम्भे भी एस तरीके सेइं बनाए कि खम्भां केरि च़ोटी पुड़ अक-अक कंगनी ढकनेरे लेई च़ेवरे पासन जैली केरि एक्‍की-एक्‍की बारी पुड़ अनारां केरि दूई बारां भोन। 19 ज़ैना केंगनी ओसारां केरे खम्भां केरे च़ोटन पुड़ बेनि, तैन मां च़ेवर-च़ेवर हथ उच्‍चां सोसनेरां फूड़ू बनोरां थियां। 20 ते हर एक्‍की खम्भेरे च़ोटी पुड़, तैस गोलाई कां ज़ै जैली सेइं लगोरी थी, अक होरी कंगनी बनी, ते हर एक्‍की केंगनी पुड़ ज़ैना बारी सेइं च़ेवरे पासन अनार बारां सेइं बनोरे थिये, तैना 200 थिये। 21 तैना खम्भे तैनी भवनेरे ओसारे कां खड़े किये, ते देइने पासेरो खम्भो खड़ो केरतां तैसेरू नवं याकीन रख्खू; ते बांए पासेरो खम्भो खड़ो केरतां तैसेरू नवं बोअज रख्खू। 22 ते खम्भां केरि च़ोटी पुड़ सोसनेरे फूड़ू केरि शकल बनेवरी थी, एस्से तरीके सेइं खम्भां केरू कम पूरू भोवं। 23 फिरी तैनी अक बड्डू कुण्डू बनावं, ज़ैन एक्‍की पासेरां होरि पासे तगर 10 हथ बिल्‍लू थियूं, ते तैन गोल थियूं, ते तैसेरी ऊँचाई पंच़ हथ थी, ते तैसेरी गोलाई च़ेवरे पासन 30 हथ सूते बराबर थी। 24 ते तैसेरे च़ेवरे पासन हैठमेईं एक्‍की-एक्‍की हथ्थे पुड़ दश-दश डैलड़ी बनेई, ज़ैना कुण्डेरे च़ेवरे पासन थी; ज़ैखन तै ढालो जेव; तैखन एना डैलड़ी भी दूई बारन मां ढेलोरी थी। 25 ते तैन कुण्ड 12 बनेवरे दांतन पुड़ रख्खू जेव ज़ैन मरां ट्लाई उत्तर, ट्लाई पश्चिम, ट्लाई दक्षिण, ते ट्लाई पूर्वेरे पासे तुत्तरां फेरतां थिये ते तैन्ने पुड़ कुण्ड थियूं ते तैन सेभी केरो पेत्रियों हिस्सो एन्त्री पासे थियो। 26 ते कुण्डेरी मोटाई मुठड़ी बराबर थी, तैसेरो कन्ढो कुटोरेरे कन्ढेरो ज़ेरो थियो ते सोसनेरे फूड़ू केरो ज़ेरो बनोरो थियो, ते तैस मां लगभग 40000 लीटर पानी लगतू थियूं। 27 फिरी तैनी पितलरे 10 ठेले बनाए, ते हर एक्‍की ठेलेरी लम्बाई च़ेवर हथ ते चौड़ाई भी च़ेवर हथ ते ऊँचाई ट्लाई हथ थी। 28 तैन केरे पेइड़ां केरि बनावट एन्च़रे सेइं थी; तैन केरि पेटरी थी, ते पेटरन मां मझ़मेइं जोड़ भी थिये।

29 ते जोड़ां केरे मझ़ाटे पेटरन पुड़ शेर, दांत ते करूब बनोरे थिये ते जोड़न पुड़ भी अक-अक होरो ठेलो बनोरो थियो, ते शेर ते दांतां केरे बुन लेटकती झालरां बनेवरी थी। 30 हर एक्‍की ठेलेरे लेई पितलरे च़ेवर पेइहे ते पितलरी धुरी बनेवरी थी; ते हर एक्‍केरे च़ेवरे कून्न सेइं लगोरे आधार भी ढैलतां बनेवरे थिये, ज़ैना हौदी केरे बुन तगर पुज़ते थिये, ते हर एक्‍की आधारेरे पासे झालरां बनेवरी थी। 31 कुण्डेरू तुत्तर ज़ैन ठेलां केरि केंगनी केरे बुन ते बह भी थियूं तैन अक हथ उच्‍चु थियूं, ते ठेलेरे तुत्तरेरी चौड़ाई डैढ हथ थी, तैन पेइड़ां केरि बनावटरू ज़ेरू गोल थियूं ते तैसेरे तुत्तरेरे आसे-पासे घड़ाई कियोरी थी, ते तैन केरि पेटरी गोल नईं, चकोर थी। 32 ते च़ेवरे पेइहे, पेटरी केरे बुन थिये, ते हर एक्‍की ठेलेरे पेइहन मां धुरी भी लेगोरी थी; ते हर एक्‍की पेइहेरी ऊँचाई डैढ हथ थी। 33 पेइहां केरि बनावट, रथ्थेरे पेइहां केरि ज़ेरि थी, ते तैन केरि धुरी, चक्र, आरे ते नाभां सब ढैलोरी थी। 34 ते हर एक्‍की ठेलेरे कूने पुड़ च़ेवर आधार थिये, ते आधार ते ठेले दूईये एक्‍की टुक्ड़ेरे बनोरे थिये। 35 ते हर एक्‍की ठेले पुड़ अधो हथ उच्‍ची च़ेवरे पासन गोलाई थी, ते ठेले पुड़ेरी टेकां ते पेटरी ठेले सेइं ज़ुड़ोरी एक्‍की टुक्ड़े सेइं बेनोरी थी। 36 ते टेकां केरे पाटन ते पेटरन पुड़ ज़ेत्री ठार ज़ैस पुड़ थी, तैस मां तैने करूब, ते शेर, ते खजूरेरे बुट घड़ाई केरतां बनाए, ते च़ेवरे पासन भी झालरां बनेई। 37 एस्से तरीके सेइं तैनी दश्शे ठेले बनाए, ते सेभी केरो अक्‍के साँचो ते अक्‍के नाप, ते अक्‍के आकार थियो। 38 तैनी पितलरां दश कुण्डां बनां। हर एक्‍की कुण्डे मां लगभग 800 लीटर पानी एइतू थियूं; ते सेभी केरि चौड़ाई च़ेवर-च़ेवर हथ थी, ते दश्शे ठेलन मां अक-अक कुण्डू थियूं। 39 तैनी पंच़ कुण्डां भवनेरे दक्षिणेरे पासे, ते पंच़ उत्तरेरे पासे रखां; बड्डू कुण्ड तैनी भवनेरे दक्षिण-पूर्वेरे पासे रख्खू। 40 हूरामे कुण्डां, फेवड़ी ते कुटोरे भी बनाए। हूरामे सुलैमान राज़ेरे लेई यहोवारे भवने मां ज़ेत्रू कम केरनू थियूं, तैन सब पूरू कियूं। 41 मतलब दूई खम्भे ते तैन केंगनी केरि गोलाई ज़ै दूईये खम्भन पुड़ थी, ते दूईये खम्भन पुड़ेरी गोलाई ढकनेरे लेई दूई-दूई जैली ते जैली केरे लेई 400-400 अनार, 42 मतलब खम्भन पुड़ ज़ै गोलाई थी, तैन केरे ढकनेरे लेई मतलब एक्‍की-एक्‍की जैलरे लेई अनारां केरि दूई-दूई बारां; 43 दश ठेले ते तैन पुड़ दश कुण्डां। 44 अक बड्डू कुण्डू ते तैस हैठ रखनेरे लेई 12 दांत ते हँडे, फेवड़ी, ते कुटोरे बने। 45 इना सब चीज़ां ज़ैना हूरामे यहोवारे भवनेरे खातर सुलैमान राज़ेरे लेई बनेई, तैना चमकते पितली सेइं बनां। 46 राज़े तैन यरदनेरे वैदी मां सुक्‍कोत ते सारतानेरे मझ़ाटे मौसन मित्तरे ज़मीनी मां ढालां। 47 ते सुलैमाने तैन सैरी चीज़ां केरो वज़न न थियो कियोरो, किजोकि तैन चीज़ां केरो वज़न बड़ो जादे थियो। एल्हेरेलेइ ज़ै पितल लगोरी थी तैसेरे वज़नेरो पतो न थियो।

48 यहोवारे भवनेरे लेई सोन्नेरी वेदी ते सोन्नेरी तै मेज़ ज़ैस पुड़ च़ैढ़ोरी रोट्टी रखते थी, तैन सब सुलैमाने बनावं। 49 ते खालिस सोन्नेरे दीवट, ज़ैना एन्त्री पासे पवित्र ठारारे सामने पंच़ दक्षिण पासे रख्खे; ते पंच़ उत्तेरे पासे रख्खे; ते सोन्नेरां फूड़ू 50 दीये ते चिमटे खालिस सोन्नेरे तशले, किन्ची, कुटोरे, धूपदान ते कड़छ़ ते एन्त्रियों भवन ज़ैस ज़ो परमपवित्र ठार ज़ोतन, ते भवन ज़ैस जो मन्दर ज़ोतन, दूईयां केरां दारां केरे पल्‍लां केरे लेई सोन्नेरे कब्ज़े बने।

51 एन्च़रे सेइं सुलैमान राज़े यहोवारे भवनेरू कम पूरू कियूं। तैखन सुलैमान राज़े अपने बाजी दाऊदेरू अर्पित कियोरू सोन्नू चाँदी ते भांडां भवने मां पुज़ेइतां यहोवारे भवनेरे भण्डारे मां रखां।