1 ज़ैखन दाऊद राज़ो बड़ो बुढो भोवरो थियो, ते तैसेरे सेवक तैस कम्बलां केरू छ़ुंहूं देते थिये, पन फिरी भी तैस ठंड लगती थी। 2 एल्हेरेलेइ तैसेरे अधिकैरेईं तैस सेइं ज़ोवं, "इश्शे मालिक राज़ेरे लेई जुवान कुई तोप्पी गाए, ज़ै राज़े कां रेइतां तैसेरी सेवा केरती राए ते राज़े कां झ़ुल्‍ले, ते इश्शे मालिक राज़े गर्मी पुज़ती राए।" 3 तैखन तैन्न सारे इस्राएल मुल्खे मां खूबसूरत कुई तोपते-तोपते शूनेम नगरेरी जुवान कुई मैल्ही ज़ेसेरू नवं अबीशग थियूं, तै तैनेईं राज़े कां आनी। 4 तै कुई बड़ी खूबसूरत थी; ते तै राज़ेरी दासी बेनतां तैसेरी सेवा केरती राई; पन राज़े तैस सेइं जिसमानी रिश्तो न बनाव। 5 एक्सां दाऊदेरी कौन्श हग्गीतेरू मट्ठू अदोनिय्याह घमण्डे सेइं ज़ोने लगू, "अवं राज़ो बनेलो।" एल्हेरेलेइ तैनी रथ ते सुवार ते एप्पु करां अग्री-अग्री दौड़ने बाले 50 अंगरक्षक रख्खे। 6 तैने इन एल्हेरेलेइ कियूं किजोकि तैसेरे बाजे दाऊद राज़े तै ज़रमने करां लेइतां कधे एन ज़ोइतां न थियो डांटोरो, "तीं एन्च़रे किजो कियूं।" तै बड़ो खूबसूरत थियो, ते अबशालोमेरे बाद तै ज़र्मोरो थियो। 7 एक्सां अदोनिय्याह सरूयाहेरे मट्ठे योआबे सेइं ते एब्यातार याजके सेइं गलबात की, ते तैनेईं तैस सेइं साथी रेइतां तैसेरी मद्दत की, कि तै राज़ो बने। 8 पन सादोक याजक ते यहोयादारू मट्ठू बनायाह, ते नातान नबी, शिमी, रेई, ते दाऊदेरे शूरबीरेईं अदोनिय्याहेरू साथ न दित्तू।

9 एक्सां अदोनिय्याहे जोहेलेत नंव्वेरे घोड़े कां ज़ै एनरोगेल नागेरे नेड़े, भैड्डां, दांत ते पालोरे जानबर बलि किये, ते अपने सारे ढ्ला ते राजकुमार ते राज़ेरे सारे अधिकारी कुजाए। 10 पन तैनी नातान नबी ते बनायाह ते शूरबीर ते अपनो ढ्ला सुलैमान न कुजव। 11 तैखन नातान नेबे सुलैमानेरी अम्मा बतशेबा सेइं ज़ोवं, "कुन तीं शुनेरूए कि हग्गीतरू मट्ठू अदोनिय्याह राज़ो बनोरूए ते इश्शे मालिक दाऊद राज़े इस गल्‍लरे बारे मां पतो नईं? 12 एल्हेरेलेइ हुनी एई, अवं तीं सलाह देताईं, कि तू अपनि ते अपने मट्ठे सुलैमानेरी जान बच़ास। 13 तू दाऊद राज़े कां गेइतां तैस एन पुछ़, हे मेरे मालिक! हे राज़ा! कुन तीं कसम खेइतां एपनी दैसी सेइं एन नईं ज़ोवरू, कि तेरू मट्ठू सुलैमान मेरे बाद राज़ो भोल्हो, ते तै मेरे तखते पुड़ बिशेलो? फिरी अदोनिय्याह किजो राज़ो बनोरोए? 14 ज़ैखन तू तैड़ी राज़े सेइं एन्च़रे गल्‍लां केरती राली, तैखन अवं तीं पत्पती एइतां ज़ोइलो कि तू सच़ लगोरिस ज़ोने।"

15 तैखन बतशेबा दाऊद राज़े कां कमरे मां जेई; राज़ो त बड़ो बुढो भोवरो थियो, ते तैसेरी सेवा टेल शूनेम नगरेरी अबीशग केरती थी। 16 तैखन बतशेबा राज़े कां झुकतां प्रणाम कियूं, ते राज़े तैस पुछ़ू, "तू कुन चातिस?" 17 तैसां जुवाब दित्तो, "हे मेरे मालिक, तीं त अपने परमेशर यहोवारी कसम खेइतां एपनी दैसी सेइं ज़ोवरू थियूं, ‘तेरू मट्ठू सुलैमान मेरे बाद राज़ो बनेलो ते तै मेरे तखते पुड़ बिशेलो।’ 18 पन हेर अदोनिय्याह राज़ो बेनतां बिशोरोए, ते हुन्ना तगर मेरे मालिक राज़े इस गल्‍लरे बारे मां पतो नईं। 19 तैनी बड़े दांत, जानबर ते भैड्डां बलि की, ते सारे राजकुमार ते एब्यातार याजक ते योआब सेनापति कुजावरोए, पन तेरो दास सुलैमान नईं कुजेवरो। 20 ते हे मेरे मालिक! हे राज़ा! सारे इस्राएली लोक तीं तकने लगोरेन कि तू तैन सेइं ज़ोस कि इश्शे मालिक राज़ेरे तखते पुड़ तैसेरे बाद कौन बिशेलो। 21 नईं त ज़ैखन इश्शो मालिक राज़ो अपने दादे-पड़दादां केरो ज़ेरो मारेलो, तैखन अवं ते मेरू मट्ठू सुलैमान दूईये पापी गणे गामेले।"

22 ज़ैखन बतशेबा राज़े सेइं गल्‍लां केरि राहोरी थी, तैखन नातान नबी भी तैड़ी अव। 23 ते केन्चे राज़े सेइं ज़ोवं, "नातान नबी भी एवरोए।" तैखन नातान राज़ेरे सामने अव, ते तैनी तुत्तरेरे भारे राज़े कां झुकतां प्रणाम कियूं। 24 तैखन नातान नबी ज़ोने लगो, "हे मेरे मालिक, हे राज़ा! कुन तीं ज़ोवरूए, ‘अदोनिय्याह मेरे बाद राज़ो बनेलो ते तै मेरे तखते पुड़ बिशेलो?’ 25 हेर तैनी अज़ बुन गेइतां बड़े दांत, पालोरे जानबर ते भैड्डां बलि कियोरिन, ते सारे राजकुमार ते सेनापति ते एब्यातार याजक भी कुजावरोए; ते तैना सारे तैसेरे सामने खाते पीते ज़ोने लगोरेन, ‘अदोनिय्याह राज़ो ज़ींतो राए।’ 26 पन अवं तेरो दास, ते सादोक याजक ते यहोयादारू मट्ठू बनायाह, ते तेरो दास सुलैमान तैनी नईं कुजेवरो। 27 कुन एन मेरे मालिक राज़ेरी तरफां भोवं? तीं अपने दासे सेइं एन नईं ज़ोवरू, कि मेरे मालिक राज़ेरे तखते पुड़ मेरे बाद कौन बिशेलो।"

28 तैखन दाऊद राज़े जुवाब दित्तो, "बतशेबा मीं कां कुजेइतां आनां।" ते तै राज़े कां एइतां तैसेरे सामने खड़ी भोइ। 29 राज़े कसम खेइतां ज़ोवं, "यहोवा ज़ै मेरी जान सारे खतरन करां बच़ातो एवरोए, 30 तैसेरी कसम, ज़ेन्च़रे मीं तीं सेइं इस्राएलेरे परमेशर यहोवारी कसम खेइतां ज़ोवरू थियूं, ‘तेरू मट्ठू सुलैमान मेरे बाद राज़ो भोल्हो, ते तै मेरे बदले मेरे तखते पुड़ बिशेलो,’ तेन्च़रे अवं पक्‍कू अज़्ज़ेरी दिहैड़ी मां केरेलो।" 31 तैखन बतशेबा ज़मीनी पुड़ तुत्तरेरे भारे झुकतां राज़े सेइं ज़ोवं, "मेरो मालिक राज़ो दाऊद हमेशा ज़ींतो राए!"

32 तैखन दाऊद राज़े ज़ोवं, "मीं कां सादोक याजक, नातान नबी, यहोयादारू मट्ठू बनायाह कुजेइतां आनां।" ते तैना राज़ेरे सामने आए। 33 राज़े तैन सेइं ज़ोवं, "मेरे अधिकारी साथी नेइतां मेरू मट्ठू सुलैमान मेरे अपने खचरे पुड़ च़ाढ़ा; ते तैस गीहोन पैनेरे नागे कांजो नेथ; 34 ते तैड़ी सादोक याजक ते नातान नबी तैसेरू अभिषेक केरन कि तै इस्राएलेरो राज़ो बने; तैखन तुस सारे नरशिंगो बज़ेइतां ज़ोइयथ, ‘सुलैमान राज़ो ज़ींतो राए।’ 35 ते तुस तैस पत्पती इरां एज्जथ, ते तै एइतां मेरे तखते पुड़ बिश्शे, किजोकि मेरे ठारी तैए राज़ो भोल्हो; ते तैए मीं इस्राएल ते यहूदारो प्रधान बन्नेरे लेई च़ुनोरोए।" 36 तैखन यहोयादारे मट्ठे बनायाहे ज़ोवं, "आमीन! मेरे मालिक राज़ेरो परमेशर यहोवा भी एन्च़रे ज़ोए। 37 ज़ेन्च़रे यहोवा मेरे मालिक राज़े सेइं साथी राव, तेन्च़रे तै सुलैमाने सेइं साथी भी राए, ते तैसेरू राज़ मेरे मालिक दाऊद राज़ेरे राज़े करां भी जादे बधाए।"

38 तैखन सादोक याजक ते नातान नबी ते यहोयादारू मट्ठू बनायाह करेती ते पलेती लोकन सेइं साथी बुन जे, ते सुलैमाने दाऊद राज़ेरे खचरे पुड़ च़ैढ़तां गीहोन पैनेरे नागे कांजो च़ले। 39 तैखन सादोक याजके यहोवारे तेम्बु मरां तेले सेइं भेरतां शिंग कढू, ते राज़ो बन्नेरे लेई सुलैमानेरू अभिषेक कियूं। ते तैना नरशिंगो बज़ाने लगे; ते सारे लोक ज़ोने लगे, "सुलैमान राज़ो ज़ींतो राए।" 40 तैखन सारे लोक तैस पत्पती बेंशोई बज़ाते ते बड़ो आनन्द मनाते उबरे जे, ते तैन केरि आवाज़ी सेइं धरती हिल्‍ली जेई।

41 ज़ैखन अदोनिय्याह ते तैसेरे सारे मेहमानेइं रोट्टी खाई, तैखन तैनेईं तैन केरि आवाज़ शुनी। त योआबे नरशिंगेरी आवाज़ शुन्तां पुछ़ू, "नगरे मां एत्री खलबली ते चिन्डां केरि शौर किजो लगोरीए भोने?" 42 तै हेजू एन ज़ोने लगोरो थियो, कि एब्यातार याजकेरू मट्ठू योनातान अव ते अदोनिय्याहे तैस सेइं ज़ोवं, "अन्तर एई; तू त भलो मैन्हु आस, ते तीं त रोड़ी खबर भी आनोरी भोल्ही।" 43 योनाताने अदोनिय्याहे सेइं ज़ोवं, "सच़्च़े इश्शे मालिक दाऊद राज़े सुलैमान राज़ो बनेवरोए। 44 ते राज़े सादोक याजक, ते नातान नबी ते यहोयादारू मट्ठू बनायाह ते करेती ते पलेती लोक तैस सेइं साथी भेज़े, ते तैनेईं तै राज़ेरे खचरे पुड़ च़ाढ़ोरोए। 45 ते सादोक याजक, ते नातान नेबे गेइतां गीहोन पैनेरे नागे कां राज़ो बन्नेरे लेई तैसेरू अभिषेक कियोरूए; ते तैना तैट्ठां खुशी मनाते-मनाते उबरे एवरेन ते नगरे मां बड़ी हलचल मच़ोरीए, ते ज़ै आवाज़ तुसन शुनोने लगोरीए तै तैए। 46 सुलैमान राज़ेरे तखते पुड़ बिशने भी लगोरोए। 47 फिरी राज़ेरे अधिकारी इश्शे मालिक दाऊद राज़े एन ज़ोइतां धन ज़ोने आए, ‘तेरो परमेशर, सुलैमानेरू नवं, तेरे नंव्वे करां महान केरे, ते तैसेरू राज़ तेरे राज़े करां जादे बधाए;’ ते राज़ो अपने बिछ़ाने पुड़ यहोवारी आराधना की। 48 फिरी राज़े प्राथना की, ‘इस्राएलेरो परमेशर यहोवारी तारीफ़ भोए, ज़ैनी अज़ मेरे हेरते मेरू अक मट्ठू मेरे तखते पुड़ बिशालोरूए।’"

49 तैखन ज़ेत्रे मेहमान अदोनिय्याहे सेइं साथी थिये तैना सारे डेरतां थरकने लगे, ते तैनेईं खड़े उठतां अपनि-अपनि बत्तां नश्शे। 50 ते अदोनिय्याह सुलैमाने करां डेरतां उठो, ते अपनि जान बच़ानेरे लेई गेइतां वेदरां शिंगां ट्लेइतां बिश्शो। 51 तैखन सुलैमाने ऐह खबर मैल्ही, "अदोनिय्याह, सुलैमान राज़े करां एत्रो डेरि जेवरोए कि तैनी गेइतां वेदरां शिंगां एन ज़ोइतां ट्लावरन, कि अज़ सुलैमान राज़ो कसम खाए कि तै मीं अपने दासे तलवारी सेइं न मारेलो।" 52 ई गल शुन्तां सुलैमाने ज़ोवं, "अगर तै भलो मैन्हु बेनतां राए त तैसेरो अक बाल भी तल्‍ले न झ़ड़ेलो, पन अगर तैस मां बुराई मैल्हे त तै मारो गालो।" 53 तैखन सुलैमान राज़े किछ मैन्हु भेज़े ज़ैनेईं तै वेदी करां ओसैलतां आनो ते तैनी सुलैमान राज़े कां झुकतां प्रणाम कियूं, ते सुलैमाने तैस सेइं ज़ोवं, "अपने घरे जो च़लो गा।"